Negosiante, tinakawan ti kaanakanna

BANTAY, Ilocos Sur – Iti baet nga aggigian iti balay ti ulitegna, naitured daytoy 16-ti-tawenna a lalaki a tinakawan ti naud-udi.

Idi agarup 4:45 ti malem ti Agosto 3, nagpulong iti polis ni John Doria y Paris, 36, naasawaan, negosiante, ken residente iti Barangay Cabalanggan, ditoy nga ili, a natakawan ket mismo a ti kaanakanna a ni Ariel Labarias y Buenavista, 16, natibo iti Barangay Sumbang, Calasiao, Pangasinan ngem agnanaed iti balay ti biktima, ti masuspetsa a nagtakaw.

Segun ken ni Doria, pimmanawda nga agassawa idi agarup 5:00 ti bigat iti nadakamat a petsa ket tinulbekanda ti kuartoda sada napan linuktan ti tiendada iti putohan sadiay Sto. Domingo Public Market.

Nabati iti balay ti suspek, ti dadakkel daytoy a ni Arturo Labarias y Sirineo ken ni Teresita Labarias y Sirineo, 60 years old, ken ni Edwin Laporteza y Galgo, katulong.

Kas maibatay iti report, nadlaw dagiti agassawa nga Arturo ken Teresita nga awan ni Ariel iti balay ket binirokda ngem dida nasapulan. Pinakaammuanda ni Rosely Doria y Labarias, asawa ti biktima, a mapukpukaw ni Ariel.

Imbaga ni Rosely iti inana a luktanda ti ridaw ti kuartoda ket ditoy a naduktalanda a nakalukat ken naibuang ti kabinet, naiwarawara dagiti alikamen iti suelo.

Naduktalanda pay a mapukpukaw dagiti assorted nga alahas a naikabil iti box kas iti kuentas, bracelet, singsing, bangle nga agbalor amin iti sumurok-kumurang P700,000.00; kasta met ti cash money nga agdagup iti sumurok-kumurang P250,000.00 a naikabil iti wallet ken plastic a nadulin iti uneg ti kabinet; ken ti Toshiba laptop nga agbalor iti P15,000.00 a naikabil iti rabaw ti lamisaan iti kuarto dagiti annakda.

Masuspetsa a simrek ti suspek iti bassit nga sliding window ti kuarto ken rimmuar iti makindaya a ridaw iti kuarto.
Agtultuloy ti panagimbestiga dagiti polis iti baet a nagaraw ken nadadaelen dagiti posible nga ebidensia iti naisayangkat a panagtakaw.#