Negosiante, tinakawan ti katulongna

VIGAN CITY – Nagpulong iti polis ditoy ti maysa a negosiante a babai a natakawan iti kuarta ken alahas ket suspetsaenna a ti babaonenda ti nangitaray kadagitoy.

Inreport ni Fanny Tabboga y Barba, 74, naasawaan, negosiante ken residente iti Barangay VI ditoy siudad, a tinakaw ni Nora Quario y suyo, 33, katulong ti biktima ken residente iti Alimanao, Taguegarao, Cagayan a napukaw ti maris kayumanggi a bagna a naglaon iti tallo a wallet, cash money nga agdagup iti P20,000, alahas a mapattapatta nga agbalor amin iti P65,000, driver’s license ken senior citizen’s card.

Naduktalan ti biktima a napukaw ti bagna nga imbatina iti uneg ti kuartona iti alas 7:00 ti bigat ti Septiembre 20 ket sinuspetsana a ti katulong ti nangala agsipud ta saanna metten a mabirokan pay daytoy.

Nangisayangkat dagiti polis iti pursuit operation ngem didan nabirokan ti suspek.#