CANDON CITY – Kinuna ni Cong. Eric Owen Singson a suportaran ti grupo dagiti agdadamo nga agilinlinteg iti Kamara a pakaibilanganna dagiti reporma nga iwayat ti kabarbaro nga administrasion.

Mamati ti diputado a maipatungpal ni Pres. Benigno “Noynoy” Aquino III dagiti karina a reporma idi kampania a mangpugipog iti korapsion iti gobierno.

Kinuna ni Singson a ti grupoda a Neophytes for Reform ti pagrubbuatan ni Aquino iti iwayat ti administrasionna a reporma.

Aglaplapusanan a nabutosan iti kalkalpas nga elesion ni Singson, anak ni nagdiputado Eric Singson, a mangibagi iti maikadua a distrito ti Ilocos Sur.

Sangapulo ket tallo dagiti agdadamo a diputado a kameng ti Liberal Party ti nangbukel iti Neophytes for Reform.#