Nepotismo iti asuk ti sigarilio

Nagatibuor ti ginelgel a baraniw kalpasan a napagbalin a linteg ti Sin Tax bill sipud Enero 1. Sakbayna, nagbalin idi daytoy nga urgent bill. Ta ngamin adda dakkel-nabileg nga ima a mangtengtengngel iti asuk ti sigarilio.Ā  Saan a palubosan dayta nga ima dagiti dadduma pay a bibig a sumusop-rumaman no saanna a kaburburik. Iti ababa a pannao, dagidiay saanna a katribu. Nepotismo ti kastoy a sistema ti negosio. Saan a makatulong iti panagdur-as ti gimong gapu ta awanen ti makunkuna a patas a kompetision iti merkado; adda mapabpaboran.

Daytoy pay ti rason no apay a ti pagilian ti kababaan unay ti presio dagiti bulong ti tabako a maaramid a sigarilio iti sibubukel a lubong. Ngamin awanen ti nasalun-at a kompetision iti panaggatangan-panaglakuan, lalona unay ti birhinia iti Kailokuan. No awan ti kompetision, natural a saan met nga aggunay ti presio ti tagilako. Dagiti mannalon ti agsagaba iti nakana iti dayta saan a panaggunay ti presio.

Kasano koma pay nga adda patas a kompetision iti presio ti tabako no nobenta porsiento agingga iti nobentay kuatro porsiento ti partuat a sigarilio iti pagilian ket maymaysa a kompania ti agar-aramid iti nagduduma a brand? No dayta koma a dagup ket pagbibingayan iti dua wenno ad-adu pay a kompania ti sigarilio,Ā  adda koma nasalun-at a kompetision iti panaggatangan-panaglakuan ti tabakoā€”agkikinnumpetensiada nga aggatang iti produkto.

Timmangken a nepotismo ti rason no apay a ti pagilian ti kababaan ti presio ti produkto a tabako iti sangalubongan. Ti panangpabor ti maymaysa a manufacturer kadaytoy a negosio. Ket siempre, asino pay koma ti mangpabor kadaytoy no di met laeng dagiti nakatugaw? Dayta ti taudan ti ingel ti ginelgel a baraniw! Dayta ti taudan ti saan nga aromatic nga ayamuom ni birhinia! Dayta ti rason nga awan dur-asan dagiti agmulmula iti birhinia.

Gapu iti nepotismo, agriri met dagiti dadduma pay a manufacturer iti sigarilio ta saanda a makaraman uray no sangkadilamot la koma nga asuk ti panaglakuan ta kontroladon ti panagaramidan babaen ti mapabpaboran. No apay a kontrolado, dayta ti agdadata a misterio dagiti makunkuna nga agpampammarang a bannuar dagiti mannalon, dagiti mangipukpukkaw ken mangitantandudo-mangbagbagtin ti bukodda a tugaw, nga isakitda ken adda iti pusoda ni mannalon iti tabako; isuda dagiti manglaplapped iti panagsantak iti fair competition iti merkado.

Nepotismo ti kangrunaan a rason no apay nga immatras dagiti dadduma pay a kompania ti sigarilio nga agpuonan ditoy pagilian ta ad-adda a maugingan dagiti naasideg iti banga. Agsipud ta nariknada ti nadagem nga epekto ti saan a nasalun-at a kompetision pimmanawda iti pagilian, nagpasugnodda. Agingga saan a mapasamak ti reporma ti makunkuna nga excise tax, lalo kadagiti naikkan iti permanente a klasipikasion ti produktoda nga uray no adu ti malakuanda ket isu nga isu ti ibayadda a buis.

Pakairanudan la unay dagiti mannalon ti tabako ti patas a kompetision iti merkado ta ngumato a bukodna ti presio. Pakairanudan met ti gobierno gapu ta bumsog ti ekonomia; iti nepotismo dagiti laeng naugingan nga ima ti bumsog ti bulsada.

Ti sin tax reform measure ti pagilian ket mangited iti saan a pagduaduaan a dur-as ta iwalinna ti pumayagpag a nepotismo.#