NEWS FEATURE: Binatbatan-World Costume Festival, naburbursi ita a tawen

Ni Salvador A. Espejo

 

VIGAN CITY – Masigurado ti aglaplapusanan a pannakapnek dagiti umay makipagrambak iti panangselebrar ti Vigan City iti Binatbatan Festival agsipud ta namirit kadagiti makalinglingay nga aktibidad a mangitampok iti napnuan pakasaritaan a kultura ken historia daytoy maikatlo a kaduogan a siudad iti pagilian ken World Heritage City.

Lalo pay a mangpangayed iti parambak ti pannakaangay ditoy siudad ti World Costume Festival, pannakaitampok dagiti disenio dagiti nabursi ken tradisional nga aruat a pang-internasional para kadagiti live performances kadagiti festival, pagteng, teatro ken multimedia.

Ita a tawen, ti Vigan City ti napili a pakaangayan ti WCF  babaen ti panangorganisa ti PQ’11 Philippine Working Committee iti pannakikammayetna iti ITI-UNESCO Philippines ken kamkameng ti Organization of International Scenographers Theater Architects and Technicians (OISTAT) Costume Design Group.

Kinuna ni Mayor Eva Marie S. Medina a ti pannakaangay ti World Costume Festival iti Vigan City, naluktan manen ti sabali ken datdatlag a pabuya a mainayon iti pannakarambak iti piesta ti siudad.

Innayon ti mayora a mangisayangkat ti gobierno ti siudad iti pasalip kadagiti lokal a designers ket ti mangabak a disenio ti maisalip iti sumaruno a World Costume Festival.

Napili ti World Heritage Site ti Vigan City a pakaangayan ti WCF saan laeng a gapu iti nabaknang a kulturana kas ipamatmat dagiti duog a pagtaengan a nabangon idi tiempo dagiti Kastila a nakapreserba ken matartaripato agingga iti agdama, no di pay gapu ta addaan daytoy iti nabaknang a tradision iti panagabel babaen ti ima, ti Abel-Iluko, a mangitamtampok iti maisupadi nga Arte ni Ilokano.

Daytoy pay laeng ti maikadua a gundaway a maangay ti WCF ditoy pagilian, umuna idi Nobiembre 2001 iti panagsangaili ti Davao City.

Nagbalin a nakalallagip ti “Paseo de Crisologo” a naangay idi Abril 28 a nakaitampokan ti World Costume Street Parade a nagpartisiparan dagiti siudad ken probinsia iti pagilian a pagdidinnamagan gapu iti isaysayangkatda a festival a pagdudupudopan a mapan buyaen dagiti riniwriw a sangaili ken turista. Dinaydayaw dagiti rineprep a nagbuya ti kinadaeg dagiti nabursi a costume dagiti musa a nangibagi iti Dinagyang Festival ti Iloilo, Sinulog Festival ti Cebu, Masskara Festival ti Bacolod City, Pintados Festival ti Tacloban City, Tawo-Tawo Festival iti Bayawan City ken dadduma pay a maipagpannakkel a festival iti pagilian.

Kinuna ni Medina a maysa a pagiinnadalan amin ti pannakaisayangkat ti WCT iti Vigan City ta uray dagiti ganggannaet a nakipartisipar ket nasdaawda iti adu a pakaaramatan ti shawl ti maysa a disenio nga inaramid ti maysa a lokal a designer ditoy.

Kinuna pay ti mayora a dakkel a maadal dagiti lokal a designers mainaig iti costume construction methodology, kas no kasano ti agaramid kadagiti napipintas a costumes babaen kadagiti barut ken dadduma a materiales.

Malaksid dagiti aktibidad a tinawen nga angayen ti siudad a kas iti trade fair, garden show and arts a naluktan itay Abril 27, ti Gayyem Parade, Kalesa Parade a nakipartisiparan ti 116 a kalesa a nadekoraran, Body Painting Competition and Walk, ken SMB Disco sa Kalye a naangay idi Abril 28, agtultuloy latta ti pasalip iti Boklan Art, Glass Mosaic, Carabao Painting a maangay inton Abril 30; dagiti traditional games, bancathon and fishing competition a maangay inton Mayo 1; ti Ramada traditional games,  Abel House Decor competition, ken Santacruzan inton Mayo 3, kaaldawan ti piesta ti siudad.

Inton Mayo 4, maudi nga aldaw, maangay ti dog show and competition iti Mira Hills ken A-10-Dance iti Plaza Burgos.

Ngem saan a naan-anay ti pannakipagrambak dagiti sangaili no malibtawanda a buyaen ti nalataken a Binatbatan Streetdancing Competition a maangay iti alas tres ti malem ti Mayo 2 a kasaruno ti showdown iti karabianna.

Nupay panawen ti panagkampania para iti masungad nga eleksion, lininay a nalaing dagiti agtuturay ti siudad iti panangidaulo da Vigan City Mayor Eva Marie S. Medina, Vice Mayor Lourdes Baquiran, dagiti city councilors ken nadumaduma a sektor a pakaibilangan ti Vigan City Tourism Council nga idadauluan ni Dennis Rivas, ken dadduma pay a mangipatpateg iti kultura ken nadaeg a pakasaritaan ti Vigan City  a nangplano ken nangisagana kadagiti nadumaduma nga aktibidad ken pabuya a manamnama a mamagbalin daytoy kadagiti kapintasan ken kangayedan a panangrambak ti siudad iti panagpiestana.#