NEWS FEATURE: COC ti kandidato para mayor iti Cabugao, kinansela ti Comelec

Tawid News Team

 

CABUGAO, Ilocos Sur – Ganggannaet kadi daytoy agngayangay a para mayor iti Cabugao nga iti naminsan ket kadua ni Mayor Edgardo S. Cobangbang, Jr. a nagarapaap nga isangbayda ti panagbalbaliw ken napintas a panagserbi iti daytoy nga ili?

Nagdesision itay nabiit ti Commission on Elections: kas maibatay kadagiti naidatag a rekord, saan nga eligible ni Amelia Amparo Sunio-Abarquez para iti nasao a puesto.

Iti desisionna a napetsaan iti Pebrero 1, 2003, kinansela ti Commission on Elections ti sertipiko ti kandidatura ni Sunio-Abarquez gapu iti kuestion ti pannakipagilina.

Pinatgan ti Comelec 2nd Division ti petision ni Mayor Edgardo S. Cobangbang, Jr. a mangpakansela iti sertipiko ti kandidatura ni Sunio-Abarquez, agngayangay para mayor ditoy nga ili agsipud ta iti panangusisana kadagiti rekord, napaay ti respondente a nagtungpal kadagiti kondision iti RA No. 9225 partikular tiĀ  Section 5 (2), supra.

Iti panangipila ni Cobangbang iti nasao a petision maikontra ken ni Abarquez iti Comelec, kinunana a permanente a residente wenno imigrante ti respondente iti United States of America, kasungani iti representasionna iti impilana a sertipiko ti kandidaturana.

Kinuna ni Cobangbang nga idi naabak ni Abarquez iti eleksion idi 2007, pimmanaw daytoy iti pagilian ket napan iti United States ket sa la nagsubli iti Cabugao idi agtaray para bise mayor idi 2010 ngem naabak. Kalpasan ti eleksion, napan manen ni Abarquez iti US ket nagnaed sadiay, nagsubli laeng iti Cabugao idi Nobiembre 5, 2012 idi immay nagipila iti sertipiko ti kandidaturana para mayor.

Kinuna pay Cobangbang a saan a pudno ti representasion ni Abarquez a saan a permanente a residente wenno imigrante iti ganggannaet a pagilian agsipud ta saanna a pinaglikudan ti pannakipagilina nga American sakbay wenno kagiddan iti panangipilana iti COCna kas intuding ti linteg.

Kas sagudayen ti Section 5(2) ti RA 9225, saan nga eligible ti maysa a dual citizen nga agtaray para ken agiggem iti aniaman a pabutosan a pampubliko nga opisina.

Kas sungbat ni Abarquez, kategorikal a pinaglibakannaĀ  dagiti alegasion maikontra kenkuana.

Kinuna ni Abarquez a maysa a residente ken nagtultuloy a residente iti Cabugao, Ilocos Sur kasungani ti alegasion ti petisioner.

Kinunana a nupay nagnaed iti US, tinawen nga agsubli iti punganay a balayda iti Cabugao ket naggian pay ditoy iti dua tawen idi inkeddengna ti mangadaptar iti ubing idi 2002.

Nangidatag pay ti respondenteĀ  kadagiti dokumentado a pammaneknek a mangpapigsa itiĀ  takderna a pakairamanan dagiti resolusion nga inyisio ti First Division ken ti En Banc iti SPA No. 07-048.

Karaman ditoy ti affidavit of renunciation ti respondente a napetsaan iti Marso 23, 2007 ken insubmitenaĀ  iti election officer ti Cabugao idi Abril 2, 2007.

Maipalagip a kalpasan nga impila ni Abarquez ti sertipiko ti kandidaturana para mayor ti Cabugao idi Marso 28, 2007, maysa a petision ti naidatag iti Comelec a mangpadiskualipika kenkuana agsipud ta awan ti inaramidnaĀ  a nasapataan a panangtallikud iti pannakipagilina kas American idi impilana ti sertipiko ti kandidaturana.

Kinuna ni Abarquez nga inaramidna dayta sana impresenta ti abit-abitna a napetsaan iti Marso 23, 2007 a nangtallikudanna iti American citizenshipna.

Imbasura ti Comelec ti petision maikontra ken ni Abarquez.

Iti panangpaborna ken ni Abarquez, kinuna ti poll body nga agparparang a regular ken balido ti affidavit of renunciation a pinirmaan ti respondente idi Marso 23, 2007 nga insubmitena idi Abril 2, 2007 iti Election Officer ti Cabugao, ken inragpinna iti position paper nga indatagna idi Abril 12, 2007.

Kinuna ti Comelec a yantangay naaramid ti affidavit of renunciation idi Marso 23, 2007 ken impila ti respondente ti sertipiko ti kandidaturana idi Marso 28, 2007, natungpalna dagiti requirements ti Section 5(2) ti RA 9225.

Ngem kinuna ti Comelec a sabali ti factual milieu ti immuna a kaso iti naud-udi a petision.

(Adda tuloyna)