NFA, nakasaganan nga aggatang iti yellow corn

BANTAY, Ilocos Sur – Nakasaganan ti National Food Administration nga aggatang kadagiti apit a dagiti mannalon ditoy probinsia, daytoy ti naammuan manipud iti pangulo daytoy nga ahensia.

Kinuna ni NFA provincial officer Engr. Fortunato Bulao a nakasaganan ti opisina nga aggatang iti yellow corn manipud kadagiti agmulmula ditoy probinsia ket puntiriada a gatangen ti 18,000 sako iti daytoy a panagmamais.

Innayon ni Bulao a P12 kada kilo ti paggatangda iti mais ken adda ituonda nga insentibo a P.20 para  drying fee ken sabali pay a P.20 nga delivery fee no ilako dagiti mannalon ti produktoda iti NFA.

Nupay kasta, kinuna ni Bulao a mabalin nga ilako dagiti mannalon ti produktoda a mais kadagiti corn traders no nangatngato ti panaggatang dagitoy ngem ti opisinana.

Manamnama nga aggatang ti NFA iti mais agingga iti Abril daytoy a tawen.

Kabayatanna, impakaammo ni Bulao a nangupada pay iti sabali a bodega tapno saanda nga agproblema iti pakaipempenan dagiti magatangda nga irik iti probinsia.

Kinuna ni Bulao a malaksid kadagiti bodega nga up-upaanda iti Cabugao, Sta. Maria, Candon City ken Tagudin, addan sabali pay a bodega nga upaan ti NFA iti Candon City.

Adda resolusion  ti NFA iti gobierno probinsial a mangidonar daytoy iti lote a pakabangonan ti bodega ti ahensia ngem adda counterpart ti NFA iti pannakabangon ti pasdek.

Agdagup iti P700,000 ti pagup-upa ti NFA kadagiti bodegana iti irik iti tunggal bulan.#