Footer

NGEM AYAT TI KANGRUNAAN ITI AMIN (Maikadua a paset)

“AGRESAYNAKSAN, baket….” insakuntip ni Marco idi nakaawid. Agpilaypilay iti marikriknana nga ut-ot ti tinapalanna iti nataltal nga uggot ti papaya.

“Di mataytayo met iti bisin!” imbaniekes ni Betty nga aglutluto.

“Wen a, ngem siak met ti matay iti rabies!”

“Ket agannadka ngamin a!”

“Isu met! Ngem makagatak latta met! Ayna, saankon nga ammo ti aramidek!” Impalapalna iti basuraan ti pantalon a naray-ab.

“Apay nga imbasuram? Dika la ipategen ti sagut ti kabsatmo?”

“Ania pay ti serbina ket naray-ab la ngaruden! Nawakwak!”

Pinidut ni Betty ti pantalon iti lata a basuraan sana biniding. Nagkatawa. “Mabalin pay met ketdi a takupan ngem, naalasen, lakay. Aramidek laengen a short pant ta imbag la a pagturogmo.”

“Bay-amon! Mangisibboak, kunkunak, ta gayam makagatak, suronkon!”

“Aganuska, lakay, narigat ti agsapul iti trabaho ita. Enrolmentto manen no umay a bulan. Haiskoldan a tallo dagiti annakta. Kasanon ti panagbasada no umikkatka iti trabahom? Ania ti kanentayo? Ti upatayo ditoy pagnanaedantayo?”

“Ania ngarud ti aramidek kadagiti sinal-it nga aso?”

“Dika pay la ketdi mangala iti pang-or ta pang-orem idan!”

“Talaga a dayta ti aramidek no bigat! Itugotko ‘diay arnisko! Saanko la ketdi a pakawanen daydiay a naganak a nangdadael iti pantalonko a kabarbaro!”

“SINURUEM idan a!”

“Ania ti sinuro, Pari Ikko?”

“Cyanide! Ilaokmo iti sardinas tapno maungkeldan! Kapuymon…”

“Pangalaak ngarud iti cyanide?”

“Gumatangka a. Adu kadagiti aglemlemmeng a botika. ”

“Dagiti awanan lisensia?”

“Korek!”

Nagsakuntip ni Marco. Nagpanunot.

“No awan ti cyanide?”

“Gangi! Adu ti lako dagiti aggatgatang iti balitok.”

“Ti mercury?”

“Wen! Ilaokmo iti sardinas tapno maungkeldan!”

“No matiliwanak ngay?”

“Ket dika agpatiliw a!”

“No maammuanda nga agsamsamalak kadagiti aso, di pay idarumdakon! Amangan no kasuandak pay iti panaglabsing iti Animal Welfare Act! Awan la ti sabalin aya a mapanunotmo nga ibalakad kaniak?”

“Adda pay maysa, no kayatmo.”

“Ania dayta ngay?”

“Resbak! Inton rabii. Adda am-ammok a bumulodanta iti dyip.”

“Ania ti kayatmo a sawen?”

“Tapno makaibaleska ania, inta siluan dagidiay nga aso no rabii. Ilakota kadagiti restauran idiay La Trinidad. Panguartaan, pari!” nagkatawa pay daytoy rummuar-umuneg iti pagbaludan a kameng ti Sige-Sige Commando. Agkataytayagda iti lima kadapan ken innem a pulgada, kalalaingan a pammagi ken pamugoten. Inanak ni Marco ti buridek iti uppat nga aburoy a babbai da Ikko ken Belen a komersiante iti nateng.

“Ay, madi, pari! Amangan no saan laeng nga aso ti parikutko no di pay ti pagpiansak wenno pagbayadko iti abogado! Bay-amon a panunoten ti tulongmo. Agyamanak laengen.”

PAMPANURNORENNAN ti Everlasting Street. Nabasanan dagiti metro ditoy. Ti laengen Dahlia Alley iti ungtona ti dina nabasa. Iti pannagna ni Marco, iwaswasiwasna ti arnis. Innem nga aso itay ti nagbuteng iti arnisna. Adda met la kabutengda gayam, kunkunana iti bagina a maragsakan. Ngem idi agpikor iti Dahlia Alley, nginerngeran ti tallo a dadakkel a nangisit a doberman ken dua a dalmatian. Naglagaw pay idi nagsabat dagiti matada ken ti nakarupanget a bulldog.

Naglagaw ni Marco. Lalo idi nakitana a nagdadakkel ken nagtitirad ti saong dagiti aso. Lalo ket nakabutbuteng ti perreng ti bulldog a kasla agruprupa a burdiakong.

“Diak kabaelan dagitoy,” kinunana ti bagina, ngem sakbay a makaatras, dinarupen ti kabassitanda kadagiti innem, ti bulldog nga agar-aruyot pay ti katayna a kunam la no mabisin. Linagto ni bulldog ket impasabatna ti arnis. Nagangek ti bulldog a namalo ti bakrangna.  Ngem bimsag idi aggigiddanen dagiti Doberman ken Dalmatian a dumarop!

“Apo Dios a manangngaasi!” nagik-ikkis a nagpaarayat. Isangsanggana ti arnis.

Napukkawan dagiti aso. Naggapu ti timek iti maysa nga agkabannuag, nakauksob ken adda dakkel nga agila a naitato iti barukongna. Naiputipot a beklat ti tato kadagiti takiagna. Nakaputot iti maong. Beklat met laeng a pimmulipol ti tatona kadagiti gurongna. Iti kanigid a tumeng, nabasa ni Marco ti Bahala Na Gang 501. Iti kanawan a tumeng, nabasana manen ti Camp Sampaguita, New Bilibid Prison, 1990.

Nakagin-awa ni Marco. Immanges iti nauneg idi nagatras dagiti aso sada nagaabay a nagtugaw. Nakataliawda pay laeng kenkuana a sidadaan a dumarup iti aniaman a kanito.

“Saanka ngamin nga agiggem iti malo, kosa, ta kagurada!” immasideg ti lalaki. Kasla kumilaw dagiti mata ti agila a tatona. Bumbumsog dagiti masel ti barukong ken takiagna. Sumilap ti kalbona a nainitan iti agalasdies nga init.

“Adda met ordinansa ti siudad a maiparit ti aso a di maibaud!” inrasonna.

“Husto dayta kunam! Ngem awan met ti ordinansa a maiparit ti agtakaw!” imbales ti lalaki idinto nga immasideg ken pinabayogna pay ti barukongna iti panagbaniekesna. Minulagatanna ni Marco sana minusiigan.

       (Adda tuloyna)