Footer

NGEM AYAT TI KANGRUNAAN ITI AMIN (Maikapat a paset)

Pinerreng ti bisor ni Marco. Kasla ubet ti takong nga agkimmokimmot ti subsobna. Sa pagammuan, tinangadna ti kuadro iti ngatuenna. “Ammom kadi a nagtitinnawidanmi dayta a kuadro? Maikapatakon. Basaem man…”

Kinudkod ni Marco ti di met nagatel a tuktokna: “Ayat. Namnama. Pammati. Ngem ayat ti kangrunaan iti amin!”

“Husto! Adda aya met meter reader a dina napadasan ti kinamat ti aso? Saan laeng a datayo ditoy BWD. Uray dagiti meter reader ti kuriente ken dagiti bill collector ti telepono ken sky cable. Itoy a trabaho, dagiti laeng makaammo iti kaipapanan dayta a nakasurat iti kuadro dagiti agballigi ken sumaruno a superbisor. Kayatmo latta ti aglusulos?”

Saan a nakatimek. Saan a makaikeddeng. Nagduaannan ti nangkudkod iti di met nagatel a tuktokna kabayatan a naipigket dagiti paningkiten a matana iti kuadro. Sangaagpa ti kadakkel ti barikawwet iti lulonanna.

“Makalawas pay santo dumteng ti effectivity toy resignationmo.  Saanka a lapdan iti panggepmo. Bukodmo a keddeng daytoy. Adda pay met dua a pagpiliak…”

PETSA 29. Tallo laengen nga aldaw,  pirmaanton ti bisor ti resignation paper ni Marco.

Adda ita ni Marco a nakatugaw iti bangko iti sango ti Jamie Joyce Store iti sungaban ti Everlasting Street. Kuminnit ti bara ti agalasdies nga init a di kabaelan a palamiisen ti sagpamisan a pat-ing ti angin. In-inuten ni Marco ti 12 ounce softdrink ken ti sangasupot a mamon a meriendana.

“Siguradoka, Mang Tacio?” dinamagna iti tindero.

“Wen, kunak ngaruden. Martes ken Huebes no agideliber iti surat ni Berto.”

“Pudno kadi ti damagko nga adda anting-antingna?”

“Anting-anting?”

“Saan kano a kamaten dagiti aso?”

Nanglangit ni Mang Tacio. Nabayag a nagpanunot. “Wen sa! Isu laeng ti saan a taulan ti aso ditoy barangay. Kaangtotna pay dagiti Doberman idta ungto idinto a terrorist dagidiay nga aso. Ngem no anting-ating ti kunam, ahuu, iti laeng sine dayta. Lalo kadagiti pelikula ni Ramon Revilla, Sr.”

“Ania ngata ti sekretona?”

“Daytan ne, impaigidnan ti motorsiklona iti sirok ti saleng.”

Agsagsagawisiw pay ni Mang Berto a nangkamang iti kalsada. Iti pattapatta ni Marco, agedaden ti kartero iti innem a pulo. Panayagen, napugot ken narapis. Napartak ti pagnana. Kasla kamangenna ti ungto. Inipus ni Marco a mangkunkunnot iti straw ti naiplastik a softdrink. Bitbit ti kanawanna ti sangasupot a mamon.

Maikapaten a balay ti pinukkawan ni Mang Berto ngem awan man la a pulos ti nagtaul nga aso. Kasla di mamati ni Marco.  No isu ti agbasa iti metro dagita a balbalay,  umalingawngawen dagiti aso iti purok. 

Nabatogan ti lakay ti balay a yan dagiti Doberman.

“Melchor San Pedro, surat!” pinamindua ni Mang Berto nga inlaaw.

Napamulagat ken napanganga pay ni Marco idi saan a ti lalaki nga addaan iti tato nga agila ti rimmuar no di dagiti tallo a doberman, ti dua a dalmatian ken ti nakarupanget a bulldog a nakatisiert iti nalabaga ken nakasieds pay iti nangisit ken adda kagatna a bassit a basket. Saanda a tinaulan ni Mang Berto no di ket inangtotda pay ti lakay! Kinudkod ni Marco ti di met nagatel a tuktokna idi makiinnangtot met ti lakay a kartero kadagiti aso.

Nasiputan ni Marco a tallo a sobre ti inkabil ti kartero iti bassit a basket a kagatkagat ni bulldog ket timmarayen ti aso a simrek iti inaladan. Inap-aprosan ti kartero ti ulo dagiti aso ken nakipinnayapay pay a nagpakada kalpasan nga adda impasakmolna kadagiti aso manipud iti bulsana. 

 Nalipatanen ni Marco a susopen ti naiplastik a softdrink ken ti naisupot a mamon. Naikeddengna a kasaritana ti lakay. Immasideg.

“Ania ti kunam?” minulagatan ti kartero.

“No ania ti anting-antingyo, Mang Berto. No apay a dinakay taulan ti aso.”

Nagsabat pay dagiti kiday ti lakay a nanglangit a kunam la tinangadna ti nakamulagat nga init iti asul a langit.

“Anting-anting? Fiction laeng dayta!”

“Kayatyo a sawen, Mang Berto, awan ti anting-antingyo?”

“Awan!” nagpaggaak pay ti lakay.

“Apay ngarud a dinakayo man la taulan ti aso?”

“Apay, no di taulan ti aso, addan anting-antingna? Kalokoan!”

Kinamangda ti Gladiola Alley.

“Ania  ngarud ti sekretoyo, Mang Berto?”

“Apay a damagem?”

“Meter readerak ti BWD…”

Naggarakgak ti kartero. Nabagas ti perrengna ken ni Marco.

“Namitloakon a nakagat, Mang Berto. Kinagatnak pay dayta nangisit nga aso idta Dahlia Alley.”

“Ti nangisit a naganak?”

“Wen, naray-ab ti kabarbaro a pantalonko.”

“Kastaak  met idi,” nagkatawa manen ti kartero.

“Nakagatkayo metten iti inkay panagkarkartero?”

“Itoy a trabahotayo, dakkel a kabusortayo ti aso.”

“Apay ngarud itan a didakay pay taulan dagiti aso?”

Nabagas ti perreng ken isem ti kartero a lakay. Kinunana: “Ammom kadi daytoy? Kunana: ‘Ayat. Namnama. Pammati. Ngem ayat ti kangrunaan iti amin?’”

Ket no dayta ti balakad ti bisorko, kunana koma ngem kinaykayatna ti nagngilangil. Kinudkodna ti di met nagatel a tuktokna.

         (Maigibusto)