Ngumatngato a Kalidad

Nota Bene: Kolum ni Errol L. Abrew

(Maikadua a paset)

 

Dagiti nagbaliwanna

 

Iti paliiwmi, adun ti nagnakeman dagiti demonstrador ken protestador nga umili.  Di la ket mailaksid a makuna nga adun ti dinur-asan iti kalidad ti panagprotesta no idasig kadagiti napalpalabas.

No idi ket dagiti ismo (imperialismo, burokrata-kapitalismo ken pasismo) ken dagiti benepisio laeng (kas pangarigan ti pannakaingato iti sueldo, wenno pannakaibaba ti tuition fee) ti gandat nga iyebkas ken isawang, itan ket pati metten dagiti isyo a kas koma iti graft and corruption ken pork barrel scam.

Ken iti puntos ti nasao a martsa, madlaw la unay a dagiti adda iti middle-class ti simmangkautro a nakipartisipar ken rimmaman saan a kas kadagiti napalpalabas a dagiti laeng mangmangged, estudiante ken mannalon a militante ti nagaget ken naregget a nakiparpartisipar.

Iti kaaddami iti Facebook, ti social networking iti lubong ti Internet a kakaduana ti Yahoo, Google, Tweeter ken umarngi pay a teknolohia ken aplikasion, makita no kasano ti kapegges ken kasamay dagiti agdama a teknolohia a mangpapardas iti komunikasion, pannakaiwaragawag kasta metten ti pannakaikeddeng kadagiti maawat nga impormasion.

No taliawen daytoy a panagbalbaliw uray iti apaglabes la a kallabes a duapulo a tawen, makuna a napartak unayen dagiti panagbalbaliw.  Panagbalbaliw ti kasla di mapupuotan a masanguanan nga impadton dagiti mabigbig a social thinkers kas kada Alvin Toffler, Marian Salzman, Ira Matathia ken dadduma pay, nga agbalinto a maysa a kagimongan a pakadanonan kadagiti makapa-alliaw, nakakaskasdaaw ngem addaan met nasayaat nga ibungana a pasamak ken pagteng iti masakbayan.

 

Teknolohia iti People Power

 

Manmano pay laeng ti addaan iti selpon idi daytoy a teknolohia ti komunikasion ti maysa kadagiti instrumento tapno agballigi ti Poeple Power idiay EDSA a kaduana ti radio.  Ti Radio Veritas ti inusar daydi Cardinal Sin tapno maipakaammo kadagiti umili ti ipapanda idiay EDSA a mangsalbar kadagiti soldado a rebelde ti RAM (Reform the Armed Forces Movement) da Sek. ti Depensa idi Juan Ponce Enrile ken ni Lt. Col. Gringo Honasan.

Agingga iti agdama, di latta met nagbaliw ti kinasamay ti radio kas ramit ti komunikasion aglalo kadagiti adda iti simpalnek nga aw-away.  Ta madanon ti radio ti di madanon ti pagiwarnak, selpon, telepono ken telebision.

Mabalin a kunaen a no awan ti radio ken selpon idi, di kas karina a nagballigi ti People Power.

Iti agdama a teknolohia ti makunkuna a wi-fi, wireless fidelity, naparpardas manen ti komunikasion.  Ket no naparpardas, mas nabilbileg ken nasamsamay met ti ibungana kas napadasanen dagiti immun-una a demontrador.

Ket gapu ta iti panaglabas ti panawen ket immadu dagiti agus-usar iti teknolohia ti selpon, limmaka ti presiona a nagbunga met iti napardas nga iyaadu dagiti kayatna ti maaddaan.

Ket no ad-adu dagiti agtagikua, isuda met dagitoy dagiti agbalin a potensial a kustomer, tagasuporta ken iti agangay ket agbalin a demonstrador ken protestador gapu metten iti kabarbaro nga adal ken panirigan a maammuan ken maadalda.

Ket maysa kadagiti kaudian nga ebidensia a mangipakpakita iti kinasamay ken kinabileg dagiti teknolohia iti agdama a panawen ti kapaspasamak a One Million People’s March to Luneta.

 

Ammo, adal, impormasion

 

Tallo a makuna a paggapuan ti power, bileg – kinabayolente, kinabaknang ken kinaadal, wenno kas mayusar iti daytoy a termino, naganentayo iti mpormasion.

Ti kinabayolente nga ibagian ti armas, ti kinabaknang nga ibagian ti kuarta ken ti adal nga ibagian ti impormasion mabalinda latta a kombertien ti bagbagida depende iti pakasapulan.   Maikkannaka iti kuarta wenno impormasion ti paltog.  Ti kuarta maikkannaka met iti ad-adu pay a kuarta wenno impormasion.  Ket ti impormasion maikkannaka met iti paltog wenno kuarta.

Ngem kadagiti amin a paggapuan ti bileg ti aplikasion wenno pannakaipakat ti adal wenno impormasion isu ti kabibilegan ken kasasayaatan iti amin.

Iti Internet ti sumangkautro a pagbibiagan dagiti impormasion.  Nakuna dagiti agpalpaliiw a no sumariaen ti tomo dagiti datos a timmaud sipud pay naimbento ti imprenta idiay China babaen ken ni Bi Sheng iti nagbaetan dagiti tawen 1041-1084 agingga iti pannakairugi ti Internet a teknolohia idi 1958, dina pay magudua ti kaadu ti tomo ti impormasion nga addan iti makunkuna nga Information Highway manipud nairugi ti komersial nga Internet idi 1995 agingga iti agdama.

Makuna pay ketdin a sobra unayen ti kaadu dagiti impormasion ket saanen a kabaelan a tarawidwidan iti sagtunggal netizen (umili iti Internet) a tarawidwidan no iti personal laeng a kapasidadna.

(Adda tuloyna)