Ngumatngato a Kalidad

Ni Errol L. Abrew

Kolum: Nota Bene

  (Umuna a paset)

 

 

ITI  aguppat a pulo a dekada a panagpalpaliiwmi iti pinnulitika, mapaspasamak iti kagimongan ken iti biag a mismo, makuna a tunggal agpang a panagsayaat ti teknolohia ket kakuykuyogna ti di masasaan a panagsayaat met ti kalidad ti panagprotesta.

Masaomi daytoy iti yaatendermi iti makunkuna a One Million People’s March to Luneta itay napan a Lunes.  Iti daytoy dua a panagmamais pay a kunada sakbay a magtengmi ti kina-senior citizen a tawen, dimi latta malapdan ti rikna ken tarigagaymi a tumabuno kadagiti tignay-protesta a kasla man dimin naadaywan ti kinaaktibistami idi agtutubokami pay.

Ngem saan nga idiay Luneta ti nagturonganmi no di ket iti kaasitganen manipud ayanmi nga isu ti Siudad ti Baguio.  Ta segun kadagiti organisador iti Internet a social networking a nakaplanuanna, adda mapan a 30 a disso iti intero a pagilian a pakaangayan ti protesta.

Ket ditoy ayantayo a deppaar, adda naangay idiay Siudad ti Laoag ken Vigan, kasta met idiay Siudad ti Santiago, Isabela.

 

Adu a saludsod

 

Bayat ti panagtaray ti luganmi a Victory Liner nga umuli iti siudad, adu dagiti simmiplot iti panunotmi a saludsod?

Kasano ngata itan a panawen ti panagprotesta?

Sinno dagiti kabarbaron a grupo?

Ken adu pay nga umarngi a saludsod a namagpikapik la ket ngarud ti gagarmi a makipartisipar manen.

Ngamin ket sangapulo ket innem la ti tawenmi idi damomi ti makirali iti Kabataang Makabayan kas estudiante.  Dimi kalipatan daydi immuna a pannakiralimi gapuna idi umaddangkamin nga agpigpigerger dagiti saksakami iti buteng ken nerbios, dimi napuotan ti nakatinernet idi nakangngegkami iti kanalbuong ta umayen dagiti polis a dumarup.

Sipud idin, kanayunen nga iti sanguanan ti ayanmi tapno makitami dagiti kabusor kasta met a masiputanmi no adda mangibato iti pill box wenno agpabettak iti komporme.

Protesta kontra ken ni dati a Presidente Gloria Macapagal Arroyo ditoy La Union idi 2009  a kaduami dagiti multi-sectoral groups ti naudi a mass action a nakipartisiparanmi.  Impamaysamin ti nagsursurat ken dakami metten ti mang-cover kas kameng ti media dagiti simmarsaruno pay a naaramidda a mass actions.

Nasungbatan dagiti saludsodmi idin ta addakamin a makipulpulapol kadagiti nadanonmi. Nakunami iti unegmi a no aniaman ti pulos a di nagbalbaliwan ti tignay-protestada sipud pay timpuar daytoy nga aramid agingga kadagitoy a panawen, isu ti kaadda ken panangilungalong latta dagiti estudiante iti unibersidad.  Isuda a talaga ti adda iti sanguanan kadagiti amin a tignay-protesta, mangipaneknek a ti kaadda ti kinaidealista a nakaisigudan nga ugalien dagiti estudiante ket isu met ti mamagtignay kadakuada iti kaaddada iti liderato.

 

Adu nga umuna

 

Adu ti makuna a first, wenno kaunaan iti nasao a protesta kontra iti pork barrel.  Isu ti kaunaan a protesta a ti isyo ti kangrunaan a nagtungedan dagiti plano ken puntos. Isyo maipanggep iti pork barrel scam a ni Janet Lim Napoles ken sumagmamano a senador ken congressmen dagiti kangrunaan a nairaman.  Isu pay ti umuna a dakkel a protesta iti administrasion ni Presidente Benigno Simeon Aquino III a kimmandidato iti plataporma ti Nalinteg a Dalan.

Daytoy pay ti kaunaan a protesta a rinugianan dagiti social network iti Facebook ken Tweeter dagiti makunkuna a netizens.  Ken kaunaan a protesta nga awan ti makuna a pudno a liderna wenno ibagian dagiti maris-pinnulitika a grupo.

Pattapatta dagiti pannakabagi ti linteg a timmulong tapno mamantener ti urnos ken talna nga adda nasurok a 300,000 a dimmar-ay a nangnapnap kadagiti amin a bakante nga espasio iti Luneta.  Ket no ibuntok pay dagiti adda iti probinsia, dandani umaboten daydiay iti kaguduat’ million.

Nakakadkadlaw ti kinaurnos ken kaadda iti disiplina dagiti amin a timmabuno iti puraw a badoda a napagtutulaganda nga aruaten kas simbolo ti kinadalus ken kinalinteg dagiti umili a dida kayat dayta a pork barrel scam.

Adu dagiti dimmiskurso.  Ngem disenteda amin.  Awan ti nangngegmi a nagbassawang wenno nagsalawasaw numan pay adu ti naughty fingers a naitag-ay kas isusupiat iti kinababoy dagiti naidiskursuan a pulpolitiko.  Adda met kimmansion ken nagsalasala a nangiyebkasanda iti isusupiatda.

(Adda tuloyna)