Ni Atanud Ferdie

Sarita ni Jobert M. Pacnis

(Maikadua a Paset)

DAMO nga aldawko iti trabahok a kas kargador. Balo a baket ti amomi, ni Manang Alma.  Iti panagkitak, kasla nalapgis a Mae Bautista ti pammagi ken panagruprupana. Segun ken ni Insan Iliong, apagsagpatna kano a singkuenta. Lima tawenen a simmina daydi Manong Edilberto a lakayna. Naistrok kano. Dida naparaburan iti anak.

Nadaripespesakon iti ling-et nga agbumbunag kadagiti irik nga immay impakilo itay ni Lakay Itong a taga-Brgy. Immabot. Nalawa ti talonna idiay Sitio Dimmaplac a nagbedngan ti barangaymi. Damag nga armendo ti lakay ngem awan pay ti nadamagmi a “kimmawiwit” kenkuana. Agkapuyotanda ken ni Atanud Ferdie.

Sineniasannak ni Insan Iliong idi malpasmi nga inkamada dagiti irik iti bodega.

“Mapanta pay agmerienda,” kinunana.

“Sadino?” inamadko.

“Dita bangir ti kalsada. Agbatil patongta.”

“Saannatayo a pagmeriendaen ni ma’am?”

Naglibbi laeng ni Insan Iliong.

Nadanonanmi ni Atanud Ferdie iti Cenalop Panciteria. Panagkitak, kaiserserbi pay laeng ti orderna ta agpispissuol daytoy iti pingganna. Nasinit sa pay ta kasta unay ti panagamil ken panagpug-a-pug-awna a nadanonmi.

Agabay laeng ti FHM ken Corexam a pagtrabahuanmi. Isu a di karkardayo ngarud a kanayonkami nga agrana ditoy pagmeriendaan. Nasayaat met tapno maramanak dagiti kanayonna idi nga ipaspasindayag a batil patong nga arig pagingatna kano laeng.

“Miss!” pinayapayan ni Atanud Ferdie ti serbidora. “Dua man pay a pansit para kadagiti kabarangayak ken atanudko!” kinunana. “Aglalo ket din sa pay ammo daytoy atanudko ti raman ti makuna a pansit batil-patong!” Timmaliaw pay dagiti nadanonmi a kostumer.

Kennam, ‘tanud! naikubuar ti unegko. Ngem inisemak laengen. Agparbengka, bagi, binagbagaak ti bagbagik. “Wen, man, ‘tanud, tapno ammokton ti pakasarsaritaan ti batil-patong a pansit,” sa kinunak. “Ken agyamanak iti panagordermo, ‘tanud, ngem adda pagbayadko.” Ngem ti kinaagpaysona, awanton ti pagpletek nga agawid apaman a mabayadak ti meriendak. Papletiannakto lattan ken ni Insan Iliong.

Naipasabat kaniak ti maang-anger a karne ti baboy idi makalas-udkami ken ni Insan Iliong iti bodega dagiti irik. Segun kenkuana, pangaldawennakami ti amomi. Ken agpamerienda kano met sagpaminsan no mayat ti ul-ulona. Ngem kaaduan a bukodanmi kano ti mamerienda.

Napakatayak iti malanglang-abko a sabor ti malutluto a sidaen iti dakkel a kaldero iti sikigan ti balay ti amomi. Ni Manang Lita a katulongan ti agikiwkiwar. Lumukmegak no kastoy, nakunak iti nakemko.

Napanak imminum iti bomba ti danum iti asideg ti paglutlutuan ni Manang Lita. Apagisu met a rummuar ni Manang Alma.

“Naimbag nga aldawmo, mam,” indaydayawko.

Nagtung-ed laeng. “Naluton, sika, Lita?” sinaludsodna iti katulong nga inun-una laeng iti walo a tawen iti tallopulo ket pito nga edadko.

“Mabalbalinen, mam,” naisungbat.

Pinalukatan ni Manang Alma ti dakkel a kaldero. Naipasabat kaniak ti ayamuom ti mapalpalukneng a luppo ti baboy. Nariknak la ket ngarud ti bisinko.

“Ala, alaem ‘diay napabladen a balatong idi rabii ta ipisokmon ditoy kaldero,” imbilinna ken ni Manang Lita. “Saanmon nga igisar pay ta nangina ti manteka. Uray ta nasabor metten ta kaldo.”

Ket napabulladak idi yaon ni mam ti sanganayon a luppo ti baboy. Impanna iti dakkel a bowl sa inserrekna iti uneg. Gapu ta nakalukat ti ridaw, nakitak no kasano nga impanna daytoy iti uneg ti freezer ti ref.

Ket idi mangankami, awan a pulos uray sangkalapgis  la koma ti karne a kakulkulangtot ti balatong. Ti lattan saborna ti mangipakita a nasagpawan iti karne.

“Isagpawnanto manen iti sumaruno nga aldaw ‘tay nakitam a karne,” kinuna ni Insan Iliong idi agturongkamin iti dakkel a pinuon ti akasia, nga abay ti Panciteria, iti bangir ti kalsada tapno ditakami nga agpalpa. Adda nairanta a pagtutugawan ditoy. Napariir pay.

Di pay nabarbaraan ti panagtugawmi idi mapasungadanmi ni Atanud Ferdie a permi ti pasagawisiwna ken panagingatna.

“Komusta, ‘tanud?” intapikna iti abagak. “Naimas sa ketdi ti sindayo, a, ta permi a makadanon pay itay ti angotna dita opisinak kabayatan a pappapintasek ti kostumerko.”

Lugsit, inkubuar ti unegko. Opisina kunana ketdin ti pangdaldalusanna iti minatay!

“Sika met, Ferdie,” immirugrog ni Insan Iliong. “Nabayagen nga agabay ti pagtrabahuanta ket ammomon ti galad ti amomi. Agkantiawka manen…”

“No apay ngamin, a, a kasta dayta balkasia nga amoyo? Nagadu ti kuartana. Ngem kirmet met. Imutannakayo a trabahadorna! Dina ket matultulad ti amok a gayyemna a dina ipalubos a makurkurangankami iti taraon. Kas ita, imbaliktad ti impangaldawna kadakami.”

Talaga a buisitennak daytoy nga atanudko. Ayna, addanto la panawen a makabalesak kenka, kinunkunak iti unegko.

“Komusta met ngay, ‘tanud, ti anak ti amom a sabsabongem?” inamadko ketdi nupay masemsemsem ti riknak. “Sinungbatannakan?”

“Ngannganin, ‘tanud,” kasla kasiguraduan a politiko a nagkuna. Nagbilang manen iti piek a di pay nagpessa dagiti itlog.

“Agpainumkanto man ngarud, Ferdie,” kinuna ni Insan Iliong kenkuana.

“Awan danag, ‘Nong, napalawlawan. Agumakayton ken ni Atanud Dexter iti kappukan apaman a sungbatannak ni Myla,” intapiktapikna iti abagak. “Blakleybelto pay, a, ti pagayusentayo!”

Angin, pui! diak manen nasarkedan ti riknak.

(Maituloyto)