Ni Atanud Ferdie

Sarita ni Jobert M. Pacnis

(Maikatlo a Paset)

 

MAIKATLO nga aldawko iti trabahok idi awisennakami ti amomi a mangaldaw iti ruar. Pinaglugannakami iti multikab a pagbumbunagmi iti irik no bassit laeng ti mapanmi alaen. Ilibrenakami iti agdindinamag nga Alvarez Bulalohan wenno Utanes Sinanglawan iti puseg ti ili?

Ngem nasungbatan dagiti saludsodko idi paisardeng ni Manang Alma ti luganmi iti maysa a bungalow type a balay iti nagkurosan a beddeng ti ili ken Brgy. Quimmaggo iti laud. Adu ti tao a nadanonmi iti paraangan.

“Ala, dumsaagkayon,” inyunan ti amomi ti dimsaag. “Agkasangay ti anak ti komarik. Makaammokayon a mangikalukag kadagita bagbagiyo.”

Ania pay, inalistuanmin ti nangala iti pingganmi idi lumabas ti agiwarwaras iti sanguananmi. Numona ket mabisinkami unayen. Saankami a nagmerienda itay ta binagaannakami ti amomi nga isaganami ti boksitmi ta sigurado kano a mapagustuan madamdama. Gayam, umaynakami laeng idayo a mangaldaw.

Saan laeng a dayta ti napaliiwko a madi nga ugali ti amomi. Nalaing nga agbuya iti teleserye. Agmalmalem sa a nakalukat ti telebision iti kuartona iti maikadua a kadsaaran ti balayna. Mangngeg pay agingga iti yanmi nga agtrabtrabaho ti volume ti TV-na. Ken kasta metten ti paggaakna no adda kinayatanna nga eksena. Tawaganna laeng ni Manang Lita no agpayuli iti meriendana.

No narugianna met, dayta la mangarkarruba ti obrana. Adda talkenna iti bodega a kaanakanna ket daytoy lattan ti makaammo iti amin. Ngem no ti taraonmi ti pagsasaritaan, saan a dina biangan nupay ni Manang Lita ti agisagana.

Kanayon a mapan makipatpatang ken ni Myla. Agkabarkadaanda man. No ania la unay ti pagsasaritaanda. Pasaray malipatanna nga iddepen ti telebision no kasta a makikaarruba. Ngem saan met a maiddep ni Manang Lita ta nakarikep a kanayon ti kuarto ti amomi.

DOMINGO, awan serrekko. Sinapak ti napan immuraga iti para imbaliktad naimbag la a pagsasanguanmi kadagiti barkadak. Makapailiw met ti makikadua kadakuada a kameng latta ti SK. Tallo bulanen a dikami nagsesesion iti lamisaanmi iti kantina ni Manang Ester.  Ken tapno dida met kuna a nalipatakon ti naggapuak.

Pinangaldawmi kada tatang ken nanang ti dadduma iti inuragak. Nangiplesingak a dagus iti bagkatek inton kasinnarakko dagiti kameng ti SK.

“Yaman pay, barok,” kinuna ni tatang kabayatan ti pangaldawmi, “ta napanunotmo met laengen nga awan mamaay ti agbungil a kameng ti SK.” Permi a panangigupna iti kaldo. Impettakanna pay iti intunona a sili ti sairo. Kaykayatna daytoy ngem iti naartem. Nabangbang-i kano.

“Diak man ammo, ‘tang, ta kellaat lattan a kayatko a baliwan ti turong ti biagko,” kinunak. Madarugsoyak metten iti ling-et ta pinattogak iti artem a sili ti kaldok.

“Nasayaat dayta, anakko,” binagi met ni nanang. “Sikanto met la ti nakakaasi no dimo kitaen ti masakbayam.”

“Nasuroken a sisentami ken ni nanangmo,” pinerrengnak ni tatang. “Kaano ngay a mapanunotmo ti mangasawa?”

Ngannganiak la ket ngarud naipdokan idi igupek ti kaldo. Mangasawa? Asino koma ngarud ti mangayat kaniak ket am-ammoakon ditoy barangaymi kas pangulo ti SK idi. Tallopulo ket pitokon a kunak ngem diak pay naaddaan iti nobia. Addada met idi krasko ngem saanda a nagbanag ta kas nakunakon, naikay dagiti babbai gapu iti kina-SK-k.

“Anak?”

“Diak ammo, ‘tang,” ti laeng naisungbatko.

“Unaannaka ngarud ni atanudmo a Ferdie, a. Damag dita nga asawaenna kano nga asawaen ti anak ti boss-na.”

Napaayek-ekak. “Mamatpatikay met kadaydiay, ‘tang,” kinunak. “Puyotna laeng! ‘Ta sangapulo a sawenna, sangapulo ket maysa ti palso!”

“Amman kano, barok,” impetteng ni tatang. “Isu ti kanayon nga ibagbagana no mamatpatang dita SM.” Sirok ti Mangga a pagsusugalanda ditoy purokmi ti kayatna a sawen.

“Panagkunayo, tatang, kayat met ni Myla? Nagpintasan a babai ken kakalkalpasna iti kinamaestra, agsebba laeng iti maysa nga embalsamador nga adda ang-anginna?”

“Ne, apay a kasta ti panagsasaom iti atanudmo?”

“Masuronak kenkuana, ‘tang…”

Ti babawik a nagbalin nga atanud ni Ferdie. No apay ngamin nga idi agpabuniag ni Manang Olivia, innalanakam ketdin a dua! Manipud idin, umatiperper metten nga atanud ti pangawagna kaniak.

(Adda tuloyna)