Ni Atanud Ferdie

Sarita ni Jobert M. Pacnis

(Maudi a Paset)

 

 

INTUGAWKO bassit ta kasla napakil ti takiagko  iti ‘yan dagiti nakakamada nga irik idi apagisu a sumrek ni mam. Ket kunam metten no nakakita iti di katatawan ta kasta unayen ti namay-anna kaniak.

“Hoooyyy, Don Dexter, dika innala ditoy tapno suelduanka a nakatugaw laeng!” imbirakakna. Nagparang la ket ngarud ti akakna a permi ti panagyudyodna.

“Kaitugtugawko laeng, mam, ta kasla napiltang ‘toy takiagko,” inkalukagko.

“Rason! Ala, inka agbunag kadagiti nakilon nga irik ta ikamadam ida!” imbugtakna.

Kapilitan  a timmakderak. Agngilngilangil ni Insan Iliong a nakapasungad kaniak.

“Pasensiaam laengen, insan, ta kastana no makarugi. Ammomon, a,” nagtalangkiaw, “kasta ti epekto ti agmenopos.”

Napakatawaak. Naalay-ayan bassit ti riknak.

Saan laeng a sisiak ti naungtan kadayta nga aldaw. Pati dagiti padak a kargador. Nasukalanda ngamin nga agkakarakrus idi malpas ti pangngaldawmi. Ngem apay koma ket saan pay met nga oras ti trabahoda?

Iti kamalman dayta nga aldaw, simrek ni Babbul, ti barito nga adda bulanbulanenna ditoy ilimi a Pimmatupat, iti solar da  mam. Awan ti di makaam-ammo kenkuana ta adda laeng a pasalsali iti plasa no kasta nga aldaw ti dapon. Uray kastana, ammona ti mabaon. Agkargador iti nateng ket ik-ikkanda no kua iti kuartana wenno prutas a kanenna. Saan la ketdi a saksaktan, saan ng agdangran.

Nakita ni mam ti panangulina iti lumlumdag a bunga ti papaya iti lauden ti kosina. Dayta, permi a panangyagyagna kadaytoy.

“Nagkuna nga alaem dayta?” nakaparpardas dagiti imana a nangpatit iti bislak ken ni Babbul idi makaulog daytoy.

Napadiwig pay ni Babbul. Kellaat nga immatap dagiti matana. Darupenna koma ni mam ngem naimbag ta napardas dagiti padak a trabahador a nangigawid kadaytoy. Inulodda ti barito nga inruar iti solar.

No apay nga iparit ni mam nga alaen ni Babbul ti papaya ket dina met ngarud kayat. Kadawyan a matmatnag no dimi masigudan.

Napaneknekak itan a no asino pay dagiti addaan, isuda pay ti kakirmetan.

IMMALLATIW manen ti amomi iti FHM kadayta nga agalas kuatro iti malem ti Sabado. Masansanen a kasta. Nagdadakkelan pay a tsitsiria ti bitbitna. Isu siguro ti pagpapausanda nga ibusen ken ni Myla bayat ti di maungpot a panagsarsaritada. Ngem ti nadlawanmi ken ni Insan Iliong, kasta unay metten a paisputing ti amomi. Nagkiting payen ti maong a siortpantna. Idi, segun ken ni Insan Iliong, no ania ti suotna iti bigat, daytan ti suotna agingga iti malem. Dina pay ammo nga estimaren ti bagina. Lumipistik pay itan!

Ngem kas iti sigud, dina manen iniddep ti telebision. Nakaar-ariwawa pay met ngarud. Sabagay, saan met ketdi a dakami ti agbaybayad iti kurientena.

“Dexter!” inayabannak idi agsubli kalpasan laeng ti tallopulo minuto. Manarimaan a sagsagadak dagiti naiwara nga irik iti wangawangan ti bodega.

“Apay, mam?” insardengko ti ar-aramidek ket namrayak a pinampag dagiti pagan-anayko.

“’Panka man tumaray iti dua a red wine ‘diay plasa.”

“Aginumkayo, mam?” No nangal-alaak iti riknak a nagintonar.

“Isagutko ken ni Myla. Kasangayna ita ket agbubultingkam ‘ton rabii.”

“Bulting, mam?”

“Aginom ti kayatko a sawen! Nayanakkan sa met idi kalman?”

Saanakon a nagtagtagari. Inagawaak nga innala ti kuarta sa sinakayak ti agpugakpugak a Suzuki a motor iti ampir ti bodega. Kasla adda tibina idi kugtarak ti siliniadorna. Di la ketdin makagatang iti baro ni mam.

Addaak pay laeng iti batog ti FHM, nagsaiddek ket naiddepanen. Apagisu met a rummuar ni Atanud Ferdie. Nakalawlawa ti dusngiitna.

“Masapulmo ti lighter, atanud?” kinunana ketdin.

“Permi met nga isemmo, atanud?” sinaludsodko ketdi tapno madaybert ti saritaan.

“Sapaek ita ti agawid, ‘tanud, ta agsubliak damdama. Agkasangay ni Myla,” ta dina payen dayawen ti pannakaamona, “ket kinunana a tumulongak nga agisagana iti pagsasanguanda nga aggagayyem.”

“Talekmo pay ngarud no kasta, ‘tanud.”

“Ebidensia dayta a kayatnak ni Myla,” kasla kasiguraduan ti diablo nga atanudko. “Isagsaganamon ta panagabaymonto.”

Napaayek-ek ti unegko. Agpang-aw manen. Ania la ketdin, aya, ta nagdakkelan ti panagtalekna iti bagina. Ngem sabagay, asino koma pay ti agtalek iti bagina no dina yuna?

Nagandar met laeng ti motorsiklo kalpasan a pinagkettangna ti sibetko. Pinanawak ni atanud a mayat ti pasagawisiwna a kasla nangabak iti hueteng. Ngem uray ania ti ibagbagana, diak mamati a mapaayatna ni Myla.

KASLA namalmalo ti bagik iti kabigatanna. Aglaladutak a bimmangon. Ay-ayamekon ti danum iti ngiwatko idi agtartaray ni Insan Iliong a dimmap-aw iti paraanganmi.

“Apay, insan?” sinabatko. “Kas met la kinamatnakan ti pito nga agbuangger a kabalio! Dimo kunaen nga adda awag ni mam ket paspastrekennata ita nga aldaw ti inanata?”

“Nadamagmon?” serioso a saludsodna.

“Ti ania?” inawisko ti panagtugawmi iti sirok ti abokado a yan ti pagsisiestaak a balitang.

“Napuoran ti balay ni mam…”

“Ta apay?”

“Atapenna ni Babbul a nangipuruak iti silaw a de-gaas. Ngem saan a patien dagiti otoridad dayta. Ti kano di naiddep a telebision sakbay a napan naghapihapi ti mabalin a rason. Nagoberhit…”

“Ket ti bodega?”

“Pagsayaatanna, saan a nairaman, insan. Naatipa dagiti bombero nga inawagan ni Manang Lita.”

“Nasayaat met no kasta, insan, ta adda latta pagtrabahuanta.”

“Wen, insan. Ngem diak ammo no kayatmonto pay ti agtrabaho sadiay…”

“Ney, ta apay koma a saankonton a kayat?”

“Ni atanudmo a Ferdie…”

“Apay, nagbelladan iti kasangay ni Myla ket impannan? Nga amkem a kanayonnakto nga umay ‘sarungkaran’?”

“Saan, insan!” Immanges iti nauneg. “Napikot ti laglag!”

Kellaat a nagtibbayoak. Ni Myla ti nangpikot kenkuana? Di pay ket naitsamban a baed? “Ni Myla, insan?”

“Ayna, saan, insan! Ni boss-ta!” Pimgaak iti kasta unay.

“Kasano a napasamak dayta?” kasla diak pay laeng mamati.

“Nagiinumda kano kada Myla ken mam. Dayta, idi nabartekdan, di ammon ni Ferdie ti lubongna. Sinerrekna ti kuarto ni Myla ta ti ammona, okey kenkuanan ti balasang. Antagayam, ni mam ti adda didiay a nakaidda ta saannan a nayawid ti bagina. Ania pay, naspak ti rayaraya! Nupay nakariing kano ni mam, kinawiwitannan ni Ferdie ta nabayag gayamen a kursonadana!”

Siak met ti pimgaak iti nakasarsarangsang. Gunggonam, atanud!

Diak ammo no ania ti mariknak. Agragsakak ta nagtinnag ni Atanud Ferdie iti balkasia nga amomi? Wenno lumdaangak iti nakapay-an  ni mam?

Ngem basta ti ammok, saannakton a pangasen ni atanud! Ken rugiakto metten ti sumapul iti sabali a pagtrabahuak inton bigat. Wenno mangalaak iti ababa a kurso iti TESDA. Diak la kayat nga agbalin a boss ni Atanud Ferdie. Ania, amboyennakto iti kasta unay? Sampay laeng!#