Ni Atanud Ferdie

Sarita ni Jobert M. Pacnis

(Umuna a paset)

KASLA agkulkulagtit ti riknak kadayta a kaaddan ti trabahok. Saannakton a kantiawan ni Atanud Ferdie no kasta a labsannak iti iseserrekna iti Fabeeto Home of Mental Calm (nga aw-awaganmi iti FHM) a pagtrabahuanna. Embalsamador ngamin ti loko. Pagpangasna ti pinagikkatnan a kameng ti SK wenno Sedsed ti Kalsada ditoy barangaymi a Nagapogan.

Nabayag metten nga inar-arapaapko nga agikkat a kameng ti nasao a gunglo. Ngem kas kaatap ti masapulan a kapungan ti mabirokan a panggedan. Uray dianitor iti munisipio wenno kadagiti nadumaduma a pagadalan ti hayskul ditoy ilimi ket sapulenda pay ti diploma iti sekundaria. Ania ngarud ti ipakitak? Maikapat laeng ti nalpasko ta nabayuyoak. Agliblibasak idi iti pagadalan no panagbabayuyo. Uray pay no panagbabayabas.

Napalalo a pungtot da tatang ken nanang idi maammuanda dayta nga ugalik. Uray la naglamlamma iti ubetko daydi bislak a pinangmanso kaniak ni tatang. Permi a rungaabko. Kimkimietak iti sakit.

Ngem ti pakasuronak la unay idi, ni Ferdie a kaklasek iti Maikapat. Ken kaarrubak. Nasiimak iti igid ti alad a baet dagiti balaymi a permi ti ayek-ekna a nakaguyab kaniak. Agal-ala idi iti dirig a saramsamna.

Laglag! kinunkunak iti unegko.Dika pay la maiddalan iti dirig! inngayngayemngem ti unegko.

Daydin ti naudi a serrekko iti pagadalan. Saandakon a pinalubosan  nga agbasa. Kas iti kaaduan a nagannak, sayang kano laeng ti panawen ken kuarta kaniak. A kinayatak met. Kasano, adda tabtabbed ti ulok. Mabuisbuisitak no Math ti klasemi. Diak a maaw-awatan. Uray pay Science.

Ngem saan laeng a siak ti kasta. Sumangkautro met idi ni Atanud Ferdie. Ti laeng pagdumaanmi, adda siribenna a diak kabaelan. Kanayon a nangato dagiti eksamna, aglalo iti Math, idinto a pada a dina ammo ti agkontar. Kasano, kasla puek dagiti matana. Inabakna dagiti matak a namnamsek iti taraon a prutas ken nateng (ta isu met laeng ti maipaspasida dagiti nagannak kaniak). Awan mamaay dagiti impapaunegko a tiesa!

Saanak koma a masuron ken ni Ferdie no dinak kantiawan no kasta nga agkuyogmi nga  agawid.

“Nagkapuyka ngamin!” sangkakunana. “dinak la matultulad, gayyem, nga agkuti amin a mata, ima ken ulo no ageksamentayo!”

Masukalanka koma ket, sangkakunak latta idin iti un-unegko.

Dakkel unay a pagyamanak ta inserreknak ni Insin Iliong iti pagtrabahuanna. Nabayag idin nga aw-awisennak. Tallo tawenna idin a kargador iti Corexam Rice Mill and Palay Trading. Ngem diak pulos impangpangag. Kapigsak ngamin idi a nanamen ti kina-SK-k. Adda la bassit masapulanmi a makiraep, agdung-aw ti lamisaanmi iti kantina ni Manang Ester no dikami agsasango kadagiti kabaddungalak nga SK. Ngem kas karasay ti tudo iti kalgaw ti isasalogmi iti talon. Dayta laeng no awanen ti mairemediomi a pagsasanguan ken no awanen ti matakkaban a pato wenno netib a manok a pulotan ti nakatoka nga agiremedio.

Ngem iti panaglabas dagiti tawen, makunak a sinangpetannak met la siguron ti sangkapirit a nakem. Napanunotko a saanakon nga umub-ubing. Tumataeng met dagiti nagannak kaniak. No diak urnosen ti biagko, asinonto ti kamangak? Kasanonto ti masakbayak? Aglalo ket bugbugtongak nga inanak. Nagaget kano met idi ni tatang kas kuna ni nanang,  ngem no apay a saanak metten a nasunotan. No ania pay kano ti di ninamnama a mabukel, ta inlibasdak la a binukel,isu pay ti timmaud. Idi kukuada aminen a panawen, ta nagassawada ngaruden, idi addaak, isu met a dida makabukelen.

Ket kada rabii a yiladko, naatap kaniak ti ridep. Ti lattan agbalinto a biagko ti pampanunotek. Abusta la ngaruden diak nakaadal, no atiwek pay daydi naadalmi a Juan Tamad, agbalinto la ketdi a nakaay-ay-ay ti panagbiagko. Kasla makitkitak pay a kasta unay ti panangkantiawto kaniak ni Atanud Ferdie. Ken namak payen no pudno nga ibaknangnanto ti kinabalsamadorna kas iti itangtang-abna no kasta a makisesion kadakami iti kantina?

“Adayo dayta, ‘tanud,” inkatawak idi kenkuana.

“Ti kunam, ‘tanud!” kasla nakasigsigurado a nagsao giddato ti panangrakemna iti boy bawang a pulotanmi.

Naammuanmi idi agbayag a pakpakayabkabanna gayam ni Myla, ti balasang pay nga anak ti amona. Isu met laeng, kinunkunami a pinanawanna a kameng ti SK.

“Ngem adda ngata namnamam kenkuana, ‘pare?” inamad  ni Kompad Omar idi immay manen nakisango kadakami. Manarimaan a respetarenmi ti dua a billit-tangad a pulotanmi a naeskopeta ni Allon.

“Apay, awan bilibyo kaniak?” immusiigna kadakami idinto a pinagsinan-V-na dagiti tammudo ken tanganna a nangipatayanna iti timidna. Kunam no agpayso a nataraki.

Ngem panagkitak, agkakaingasda ken ni Gerald Napoles iti maysa a makapakatawa a programa iti GMA. Ngem ni kano ketdin Alden ti Aldub nation ti karuprupana. A pagay-ayek-ekanmi no makalikud.

(Adda tuloyna)