Ni Ma’am Rosebelyn (Maikadua a paset)

AGPUPUNGTOTni Ma’am Rosebelyn iti dayta nga agalas dies iti agsapa ti Martes. Kasano, dua pay laeng kadagiti PTA officials ti adda iti impaawagna nga emergency meeting.

“Awan pay pannakikadua met dagita nga opisial!” impugpugtitna iti office-mi. Pinanawanna iti office-na dagiti dua nga opisial, ti tesorero ken representative ti Brgy. Ladaya. “Saanyon sa met nga imbaga kadagiti annak dagiti opisial nga adda meeting?” ta dakami pay ti pabasolenna.

“Amman, ma’am,” inturtured ni Ma’am Joe Ann ti simmungbat.

Kasano koma pay nga adda umammingaw kadagiti opisial ket ammoda metten ti kababalinmo, ma’am, kunak la koma. Am-ammokon dagiti ubbingmi. No adda madi a napaliiwda iti pagadalan, idanonda a dagus kadagiti nagannakda. Sa maysa pay, idi umuna ken maikadua a nagpamiting, ti lattan kaykayatna ti nasurot. No adda idi agsao kadagiti opisial, balandraenna a dagus. Kastoy, namaymayat… sangkakunana.

“Saanak la koman nga im-immay,” nangngegko a kinuna ti bise presidente idi rummuardan a PTA officials iti gate ti eskuela. Saandak a nadlaw nga adda iti plantbox iti asideg. “Awan met lugar ti kapanunotantayo kenkuana!”

“Wen ngarud,” inkanunong dagiti kaduana.

Napangilangilak la idin.

“No kastoy laeng, awan ti pagturongan ti pagadalan!” kinuna manen ni Ma’am Rosebelyn a pagna a pagna iti sanguanan dagiti lamisaanmi. “Dida pay matakderan ti kinaopisialda! Kasano a mapagpapatangan a nasayaat ti proyekto a kayatko koma a maaramid?”

Napangilangil laengen ti unegko. Nasao ti prinsipalmi iti naminsan a kayatna a patarimaan ti dati nga stage-mi a rinebba ti naglabas a bagyo ti atepna. Pangrugian a pondo ti naawat ti pagadalan a premio iti kallabes a pasalip ti munisipio itay Disiembre. Beinte singko mil daydi. Ngem duapulo ribu laengen idi yawatna ken ni Sir Erwin nga ADAS-mi (Administrative Assistant) ta yawatna kano ken ni Ma’am Jobheng a liquidation chairman. Inikkatna kano ditan dagiti nagastosna a napan kadagiti miting nga inannong ti ama ti ili.

 Ngem apay ngata nga inikkatna ket naka-OB (official business) met no mapan makimiting? Kayatna a sawen, masuktanto met laeng iti MOOE ti pagadalan ti nagastona.

ITI maysa nga agsapa, a kaaddak iti gymnasium, adda dimteng nga uppat a lallaki a damok laeng a makita. Diniretsoda ti dadael nga stage ti dati a mini-gym. Inasitgak ida ta awan man laeng ti nanguyog kadakuada.

“Apay, angkel?” sinaludsodko.

“’Maymi man kitaen daytoy trabahuenmi nga stage, sir,” kinuna ti kataengan kadakuada nga iti tantiak ket apagsurokna a limapulo.

“Dakayo ti nakasarita ni Ma’am Ana, angkel?” inamadko manen ta nangngegko idi a pagsapsapulen ti prinsipalmi ni Ma’am Ana kadagiti karpintero a mangtrabaho iti stage-mi. Ni Ma’am Ana ti binagaanna ta isu ti taga-Brgy. Cabaybay a nakaisaadan ti pagadalanmi. Ammona la ketdi dagiti mabalin a makontak.

“Saan, sir,” naisungbat idinto a binaonna dagiti dua a kakaduana nga alaanda iti dimension ti trabahuenda. “Ni prinsipalyo ti nangkontak kadakami.”

“Kasta gayam, angkel,” nagtungtung-edak. “Tagaanokayo?”

“’Diay sentro, sir.”

“Nagbarangaykayo ngarud nga immay ditoy wenno nanglikawkayo?” inamadko ta adda ti pagadalanmi iti lauden ti sabangan. Manipud iti sentro, duapulo minuto a biahe iti bangka sakbay a makagteng iti yanmi. No nadawel ti baybay, aglikaw dagiti agbiahe. Agdua oras no kua a biahe ti dyip.

“Nagbangka, sir. Nalinak ngamin…”

Nagtungtung-edak. “Ania itayen ti naganyo, angkel?”

“Lando, sir. Da Ariel ken Omar dagiti kaduak…”

Iti ala una iti dayta nga aldaw, minitingnakami ni Ma’am Rosebelyn. “Immay itayen dagiti mangtrabaho iti stage-tayo,” kinunana. “Agsublidanto kano kalpasan ti dua nga aldaw. Mainaig ditoy, kayatko a bagaantayo dagiti ubbingtayo nga agbunag iti darat dita baybay. Napianto la a mausar a pangpalitada kadagiti nagabuten a flooring.”

Kasta nga agpayso ti napasamak. Ngem iti laeng period ti TLE ken MAPEH ti nausar. Kapilitan a saanak a nakapagklase. MAPEH ti maysa kadagiti tallo a subject-ko. Agikamkamakamak pay ngarud ta adu ti topiko iti dayta. Saan nga umanay ti dua lawas tunggal component-na. Mano laeng a lawas ti maysa a grading period.

Ngem ania ngarud, isu ti bilin. Agtungpal tapno agbalin a nasayaat ken ni boss. Wen, boss pay ketdin ti awagmi ken ni Ma’am Rosebelyn no saanna a dengdenggen. Kasano, imbagana gayam kadagiti ADAS (Administrative Assistant) ken ICT coordinator-mi a masapul kano nga ammona ti ar-aramidenmi ta isu kano ti “boss-mi.”

Kadagiti nagkauna a prinsipalmi, imbilangdakami nga annakda iti babaenda. Saan a kasla daytay babaonenda. Dida man la imbagbaga nga isuda ti boss. Adingko, dayta ti awag kadakami daydi prinsipalmi sakbay ni Sir Dexler. Nagsam-it man a denggen. Ti met maysa, awagannakami iti naganmi. Nasamsam-it manen a denggen.

Ngem ni boss, Mr. Matias ti nagtangken nga awagna kaniak. Uray pay dagiti lallaki a kaduami. Mayat koma latta metten ngem nagdagsen ti panagiyibbetna no awagannakami. Saanna man laeng nga ammo ti nalamuyot a panagsao.

ITI pannakairugi ti pannakatarimaan ti stage, nagtalinaed dagiti trabahador iti TLE room. Nawayada a nakiusar kadagiti paglutuan ken lunglongan. Nga isu met laeng, ta idi agtanoy, naammuanmi a kabsat gayam ni Boss ni Angkel Lando.

“Kasla adda madi, a,” nakunak ken ni Sir Lito iti dayta a breaktime a panagkapkapemi iti kantina. “Impakontratana ti stage iti kabsatna…”

“Wen ngarud, sir,” inyayon ni Sir Lito. “Conflict of interest?”

“Kasta ti ammok. Saanna pay nga inyuman iti PTA ket kunana a maala iti pondoda ti dadduma a magastos ta di umanay ti naalatayo a premio ken ti MOOE ti eskuela.”

“Dayta ngarud ket. Kasano ngamin nga umayda pay makimiting dagiti opisial ti PTA ket kasta met ni boss. Di mangipirpirit!”

“Isu pay, a, sir. Ken no dayta kasta a bassit la a trabaho idi, saantayo a masapul ti agpakontrata. Bayanihan system ti maipakat idi. Nagraragsak dagiti nagannak nga umay makitinnulong. Reprepda pay nga umay!”

“Nasaomon, sir. Pagarigan laengen ti pannakabaliw ti atep ti amin a pasdek, nagdakkel ti nainut ti pagadalan gapu iti makunkuna nga ammuyo.”

“Nga isu ti inusar idi ni Sir Renato a naggatang kadagiti tugaw ken pinagpaaramid iti pathway.” Ni Sir Renato ti sinuktan idi ni Sir Dexler.

Agngilngilangilkami ken ni Sir Lito a nagturong iti klasemi idi aguni ti buzzer.

MADAMA ti ensayo dagiti ubbing para iti field demo. Makalawas laengen, Founding Anniversary manen ti pagadalan. Siak ti sound system operator. Kada year level, manipud Grade 7 agingga iti Grade 12, adda numeroda nga agpraktis tapno naan-annayas ti amin.

Apagleppas dagiti Grade 8, a maikapat iti listaan, idi nagturongda kadagiti dua a kantina iti sango ti gate agarup sangapulo a metro iti gymnasium a pakaang-angayan ti practice.

Mabisinda ket ngatan ta pasado alas nueben iti agsapa, nakunak iti nakemko. Sabagay, mabayag met pay sakbay nga isuda manen ti agpraktis.

Nakigtotak laengen idi agtataray dagiti ubbingmi nga agsubli. Ab-abogen ida a kasla baka ni Ma’am Rosebelyn! Umarikiak pay. Apaglas-udna iti gymnasium, innalana ken ni Ma’am Kathlene ti mikropono a madama a mangkitkita kadagiti annakna a manarimaan nga agensayo.

“Advisers of Grade 8, what are you doing? Dagita ubbingyo, nagruruarda manen!” imbir-itna. “Agpraktiskayo kunak ngem kasta met ti maar-aramid!”

Nagkinnitakami ken ni Ma’am Bheng a padak nga adviser ti Grade 8. Nakatakder iti likudak nga agbuybuya kadagiti manarimaan nga agpraktis. Nakamisuot.

Dagiti manen ubbingmi ti nakitana, naingayemngemko. Idi pay a pagpupungtotanna dagitoy. Nadlaw payen dagiti ubbingmi. Ket segun kadakuada, nayistoriada kanon kadagiti nagannak kadakuada. Gapu siguro ta ti laeng Grade 8 ti adda iti old site a yan ti office isu a dagitoy laeng ti makitkitana. No koma padasenna met ti agpagnapagna ditoy new site a yan ti kaaduan nga adalan? Ngem ‘diay laeng met opisinana a yanna!

Kanayon a sisiimenna dagiti ubbingmi ken ni Ma’am Bheng. Pagammuan, addanto manen iti room-mi no kasta nga addakami iti new site nga agisursuro.

“Nagtapok dagiti tawayo!” kunkunana kano. “Diyo pay ammo a dalusan! Kastakayo ‘diay balbalayyo a dina ammo ti agdalus? Dinakay man la bagbagaan ti adbayseryo!”

Nga ipulpulong met dagiti adalak. Kasano a di natapok ket nakatiktikagen ti panawen. Panaraten ti playground ta asidegkami ngarud iti baybay. Awan la bassit no agangin, agalibungabong ti tapok ket ipugsona kadagiti kuartomi ken ni Ma’am Bheng.

Saan a sadut dagiti ubbingmi iti Grade 8. Nagagetda ketdi ta no kasta a sumangpetdan iti agsapa, alaenda a dagus ti sagad ket agkaykayda iti playground iti nagbaetan ti office ken ti kuartoda. Nakaad-adu dagiti bulong ti lugo nga agregreg ta kapigsa dagitoy ti aglupos. Regular ti panangdalusda kadagiti tawa.

Pagrigatanna, kalpasan ti breaktime, nakaad-adu manen ti bulong ken plastic. Kasano, dagiti taga-new site nga aggatang iti kantina iti old site, iwarada lattan dagiti pagkaananda. Masiguradomi ken ni Ma’am Bheng a saan a dagiti ubbingmi ti agiwarwara ta nabagaanmi ida. Adda para siput no adda kaadalanda nga agiwara.

Ket apaman a makita ni Ma’am Rosebelyn ti nawara nga aglawlaw, dagiti manen Grade 8 ti pagpupungtotanna. Serkenna dagiti kuartomi ket pagungtanna dagiti ubbingmi. Iti dayta a kanito, addakamin ken Ma’am Bheng iti new site a pagklaseanmi. Dina met ngarud ibaga kadakami.

Iti naminsan pay, pinagsasawanna dagiti naladaw iti klase iti umuna a period iti agsapa. Rason met dagiti ubbingmi, maymaysa ti luganda a rummuar iti barioda kalpasan a makadammangda iti karayan. Masapul nga agiinnurayda.

No apay a dagiti la Grade 8 ti ung-ungtanna a maladaw ket nakaad-adu iti higher grades. Aglalo kadagiti adda laeng iti asideg ti pagadalan. No ngamin koma mapan met agpaliiw iti gate ‘diay new site!

“Datayo la ti makitkitana, sir, ma’am,” kinuna dagiti ubbingmi no kasta a bambantayanmi ida nga agdalus kalpasan ti klase iti malem.

“Agan-anuskayo, a, ta dakayo ti adda ditoy asideg ti opisinana,” kinuna ni Ma’am Bheng. “Saan a bale ta ‘ton ag-Grade 9-kayo, saannakayton a makitkita a kanayon.”

(AGGIBUSTO)