Ni Manang Jenny (Maikadua a paset)

Breaktime. Addakami aminen iti office. Inistoria ni Ma’am Alyn ti nagpapatanganda kadagiti nagannak. Ituloyda kano ti proyekto. Immanamong payen dagiti naglangan idi Biernes. Tapno kano awan ti agsasao, inkeddengda a saandan a singiren ti pannakabagi ni Manang Jenny. A saanda a dinakdakamat iti miting ti katataona ta adda ni Nana Iling. Kinuna lattan ni Ma’am Alyn nga adda nagannak a nag-post iti FB maipanggep iti proyektoda.

“Adda manen post-na,” pagam-ammuan ta kinuna ni Ma’am Judith. ‘Kitaem, ma’am Alyn!”

“Naistoria ngatan ni Nana Iling ti napagmimitingan, ma’am. Nasilian. Ania ti ibagbagana?” inamadko ta saanko a gayyem iti FB ni Manang Jenny.

“Saanna kano a pagkurkurangan ti dina pannakasingir, sir,” kinuna ni Ma’am Judith. “Kabaelanna kano ti agbayad no para iti pagimbagan ti pakaipaayanna. Uray kano ag-donate iti ceiling fan wenno water dispenser, saan laeng nga agbayad iti para tiles nga awan ti maipaayna kadagiti ubbing!”

“Aglablabesen,” inngayemngem ni Ma’am Alyn. “No kabaelanna a talaga, di ag-donate no isu! Sao la ti adu kenkuana!”

“Agsapsapul la iti kaapana dayta,” inyallawat ni Ma’am Lina. “Adun ti nakaapana iti FB a kalugaranna.”

“Ania ngata no awagam, Ma’am Alyn?” insuhestion ni Sir Allon. “Baka dina laeng naawatan ti proyekto a kayat dagiti nagannak iti room-mo. Aglalo ket naidandanon met laeng kenkuana. Duma laeng siguro no sika ti mangibaga kenkuana.”

“Innalakon ti number-na, sir.”

“Maituredmo nga awagan?” sinaludsod ni Ma’am Beth nga agikamkamakam iti slide show para iti sumaruno a klasena. Maysa pay kadagiti single a kaduami. Aralin Panlipunan ti iggemna. Kasla nalapgis a Golden Cańedo ti rupana. Kalalainganna iti katayag ken pammagi.

“No mapunnuanak, talaga a tawagak!”

“Ania ngata, Ma’am Ruby,” binirngasak tapno umisem ngem nakamisuot latta, “no kapatangmo nga umuna ni Nana Iling? Ipakaammom ti ar-aramiden ti anakna. Sigurado a dina ammo ta awan la ketdi ti FB-na.”

“Napanunotko met daytan, sir,” kinuna ni Ma’am Alyn. “Ngem maamakak amangan no pagungtanna ti anakna ket aginnalada iti sao. Baka ag-highblood!”

“Saan met ngata a mapasamak dayta, ma’am,” kinunak. “Naragsak met ni Nana Iling a kasarsarita no kua. Ken naparagsit a kanayon. Awan met ngata ti sakitna a highblood. Nasaysayaat met laeng a maipakaammo kenkuana ti ar-aramiden ti anakna.”

“Kaduaenka a mapan ken ni Nana Iling, ma’am,” indiaya ni Sir Lito ti tulongna. Rimmuar iti cubicle-na iti suli ti office-mi.

“Saanen, sir. Siakto lattan.”

“No dayta ti desisionmo, isu ti masurot,” intungtung-ed ni Sir Lito. “Ngem no kasapulannakami, agunika laeng.”

“Wen, sir. Kabaelak daytoy. Adu metten ti nagdaldalanan iti kallabes.”

Panagaawidan iti malem. Nasiputak ni Ma’am Alyn a dimmagas iti balay da Nana Iling. Talaga a sinolona ti napan. Kaduaek koma ngem baka agkantiaw dagiti makakita kadakami a kaduami. Kastada no makarugida. No nagkuyog dagiti single a ma’am ken sir, makaramanda iti kantiaw a dina oras.

Naidawatko laengen nga agballigi koma ni Ma’am Alyn a mangpasardeng ken ni Manang Jenny. A maalana ti nakem daytoy a makitinnulong iti pagadalan.

NASAPAAK a simrek iti kabigatanna. Namrayak a dinalusan dagiti nagkaruotanen a gallon ti pinta a nagmulaak itay napalabas nga school year. Isemiliak dagiti bukel ti sili ken tarong apagisunto no dumteng ti panagtutudo a panangmulak manen iti dinalusak a solar ti pagadalan. Naimbagto laeng manen a pangalaan iti masida no kasta nga aldaw. Masulitakon nga agawid-awid iti aldaw gapu iti sobra a kinadagaang ti panawen. Sangapulo minuto la koma a motorek agingga idiay balay a pangaldawak. Ngem sipud itay napan a tawen, agbalbalonakon iti pangaldawko. No awan ti sidaek, agmarutmotak laeng idi kadagiti mulak ket addan ikammetko iti innapuy a di maaw-awan a balonko.

Apagleppasko ti nagisemilia idi naguni ti buzzer. Panaglilinian. Dagus a nagturongak iti open gymnasium a pakaang-angayan ti flag ceremony. Saanak pay a nakadandanon idi aguni ti selponko. Kinitak kabayatan ti pannagnak. Mensahe iti FB.

Sir, ania dayta isyu ti CWNHS iti FB?

Nagtaud dayta iti dati nga ubingko, ni Raihna. Nalpasnan ti Edukasion a kursona. Manarimaan ti panagurayna iti resulta ti LET-na.

Sinungbatak: Awan ti isyu, ‘basangko. Adda laeng dagiti saan a makaaw-awat iti paspasamak ditoy eskuela. Awan basol ti adviser.

Imbagak pay a nagannak a mismo ti akinproyekto iti pagpiespiestaanda nga isyu.

Kasta gayam, sir. Nagdanagak, a, ta kasla met la unayen nagdakes ti maar-aramid dita. Isakitko latta ti pagadalantayo ta ditaak ngarud a nagturpos iti hayskul.

Pagyamananmi unay iti simpatiam.

Sungbatanyo koma ngamin dagita agkomkomento, sir?

Imbagak ti pagtaktakderan ti pagadalan a dinanto tutopan ti adda iti FB. Ketdi, nakasagana nga agsungbat no personal nga adda agsaludsod wenno agimbestiga iti pudno a napasamak. A saan a maiparbeng ti siasino man kadakami ti makisinsinnungbat iti social media.

Kinasaritanakami manen ni Sir Lito kalpasan ti flag ceremony kas nakaugalianna. Adda pay duapulo minuto sakbay ti umuna a period. Kinomustana dagiti ubbingmi. No adda rimsua a parikut a masapul a maaksionan.

Kas iti sigud, dagiti agkat-cutting classes a Grade 7 ti inreklamo ni Sir Ador. Agpukawda kanon no kasta a period-na kadakuada. After breaktime iti agsapa ti orasna iti Grade 7. No agruruardan nga agmerienda, saandan nga agsubli pay.

Parikutmi ngamin ti kaadu ti pag-exit-anda. Baybay iti amianan ti eskuela. Awan ti aladna dita. Uray iti laud dagiti baro a kaipatpatakder a building, awan met aladna. Nasamek ketdi dita. Saanmi met ngarud a mabiangan ta kukua ta pribado a tao.

Adda met ketdi guardiami ngem maymaysana. Iti gate iti old site a yan ti office-mi ti paggigiananna. Aglikawlikaw met iti new site, a kalsada laeng nga agpabaybay ti baetna iti old site, no mawayaanna. Ngem saanna a a maguantaan amin a gunay dagiti ubbing.

“Saanmo pay, aya, a pinaayaban ti nagannak dagita nga ubbing, ma’am?” pinagsinnublat a kinita ni Sir Lito da Ma’am Liza ken Ma’am Brenda nga advisers ti dua a section ti Grade 7. “Nasayaat no mapungtilen ti madi nga aramid dagita nga ubbing ita ta nasapa pay. Grade 7-da pay laeng ngem problema idan. Damo pay laeng a bulan ti klase.”

“Naibilinmin, sir,” ni Ma’am Brenda ti simmungbat. “Ngem agingga ita, awan pay a nagparang dagiti nagannakda.”

“Kadagitay koma kaarruba dagiti ubbingyo ti pangibagaanyo,” insuhestion ni Sir Lito. “Saan la ketdi nga idandanon dagita maseknan nga ubbing ti bilinyo.”

“Nagsuratkami payen, sir,” insungbat ni Ma’am Liza. “Impaitedmi kadagiti kaklaseda. Ngem kaskasdi nga awan ti nagparang kadakuada.”

Napangilangil ti prinsipalmi. “Ag-home visitation-kayo,” pagammuan ta kinunana idi agangay. “Isakripisioyon ti mapan mangpasiar kadakuada.”

(ADDA TULOYNA)