Ni Manang Jenny (Maudi a paset)

Nasiimak la unay ti panagkinnita da Ma’am Brenda ken Ma’am Liza. Ammok lattan nga adda panagkedkedda. Abusta ngamin natapok ti dalan nga agturong iti lugar dagiti maseknan nga ubbingda, masapul nga agbangkada pay nga agballasiw iti karayan.

“Si-sige, sir,” kasla mapilpilitan a sungbat ni Ma’am Brenda.

“Daytoy nga Orly ti puon amin dagitoy!” pagammuan ta kinuna ni Ma’am Liza. Ne, ta ti met anak ni Manang Jenny ti sasawenna.

“Apay, ma’am?” sinaludsod ni Sir Lito.

“Iti panagimbestigami, sir,” inlawlawag ni Ma’am Liza, “naammuanmi a dayta nga Orly iti Grade 9 ti mangisungsungsong kadagiti ubbingmi. Aw-awisenna ida nga aglibas tunggal reses. Mapanda kano agpapayubyob dita pampantok,” agsigarilio ti kayatna a sawen. “No saan, aginumda iti nasanger!”

“Siguradoka iti dayta, ma’am?”

“Wen, sir. Impasulik a kinasarita ‘diay damona a narekrutda idiay room-ko. Ket impudnona ti amin.”

“Umay sa met la mangdadael ti obra dayta transferee nga ubingtayo?” nagkutikuti ti sangi ti prinsipalmi. “Ma’am Alyn, paayabamto man ti lilang ni Orly.”

“Kinapudnona, sir,” kinuna ni Ma’am Alyn, “naggapuak kenkuana idi malem-kalman. Imbagak ti ar-aramiden ni Ma’am Jenny. Ti babainna. Dimmawat iti dispensar. Baka dina kayat ti umay ditoy iti bainna.”

“Ket dina la kapatangen ti anakna?”

“Ammanto kano, sir.”

“Bareng ngarud no dumngeg ni Jenny.”

Malem. Kasla manen susuon ni Ma’am Alyn ti lubong. Adda kano manen post ni Manang Jenny.

Kinuha mo number ko, di ka naman tumatawag! Naduwag ka? Kasi alam mo na mali yang plano mo sa room ninyo?

Dayta ti impabasa kaniak ni Ma’am Lianne a linaon ti post.

“Aglablabesen!” imbaltog lattan ni Ma’am Alyn iti lamisaanna dagiti ramitna a nagisuro. Inruarna ti selponna. Nagi-dial. “Kitaek man ita no ania ti laingenna!”

Nagkikinnitakami a kaduana iti office. Awan ni Sir Lito ta adda awagna itay agalas dose ket nagpa-Dibision a dagus.

“Asino ti aw-awagam, bez?” inamad ni Ma’am Mariane.

“Daydiay man KSP a parent, ma’am,” kulang sa pansin ti kayat a sawen ni Ma’am Alyn. Madlaw ti suronna. Kasla nakabakbaketanen iti langana.

“Ay, ket tanangem, a, bez, ti makisarita ta dikayto ket aginnala,” impatigmaan ni Ma’am Mariane.

“No diak magustuan ti tabas ti dilana, makaraman kaniak, ma’am!”

“Saanka unay, bez. Easy lang a kunada. Laglagipem a maestraka. Masapul a nateppelka!”

“Agyamanak, ma’am!”

“Awan sa met sumungsungbat?”

“Agri-ring, ma’am…” likaw a likaw ni Ma’am Alyn iti lamisaanna. “He-hello… Good afternoon po. Ni kadi Manang Jenny daytoy?”

Nag-thumbs-up ni Ma’am Alyn idi agangay. Nakontaknan ni Manang Jenny. Idinto nga agur-uraykami laeng iti sumaruno a reaksion ni Ma’am Alyn.

“Ni Ma’am Alyn atoy, manang… ti adviser ni Orly nga anakyo.” Nalawag ti panangidagsen ni Ma’am Alyn ti ‘adviser’ a balikas. “Apay? kunayo?”

Nagkikinnitakami. Saan sa metten a malapdan ni Ma’am Alyn ti riknana.

“Napatawagakon, a, manang, ta dikay’ met la nga agsarsardengen iti social media. Ania la unay, aya, ti nakabasbasolak kenka?”

Insenias ni Ma’am Lianne nga i-loudspeaker ni Ma’am Alyn. Sa pay la in-ON ni Sir Adolfo ti bluetooth speaker iti office a no sadino ket nakakonektakami amin.

Ania pay, nakalawlawagen a mangngegmi ti sasawen ni Manang Jenny.

“Saanko a kapanunotan ti proyekto, manang, tapno ammom,” ni Ma’am Alyn. “Mismo a dagiti padam a nagannak ti akin-idea a kinanunonganda met amin. Isu nga isardengmo koma metten ti agiposposte iti kumporme la ditan. Ta no siak ti mapunnuan, ireklamoka! Naiskrinsiat amin nga impostem, manang!”

“Ka-kasta kadi, mam?” ne ta kasla metten nakukkokan a bisukol a sungbat ni Manang Jenny.

“Ken kayatko la nga ibaga, manang, a dakkel a parikutmi ita ti anakmo. Isungsungsongna dagiti ubbingmi iti dakes nga aramid! Agsigsigarilio ken agin-inum iti nasanger! No di agnakem, nasaysayaat laengen nga umaymo met laeng alaen ta pagbasaemon dita!”

“Alla, ading, saan kadi, a! Anusanyo koma ni Orly. Ad-adda a di makaadal no ditoy Manila. Isu nga impanko dita ta uray kaskasano, makabasa koma met.”

Nagiinnisemkami a nagkikinnita.

“Maanusanmi dagiti ubbing, manang, ta isu la ngarud ti akemmi ti mangisuro ken mangigiya kadakuada iti umisu a dana a taluntonenda. Ngem no dayta mapadpadakeskami pay laeng iti social media, panagkunak saankami a makari kadayta.”

“Pasensiaandak la koman, ma’am…” Ne, adda metten kabulonna a baningrot ti mangmangngegmi. “Nairana la a dakkel ti parikutko iti kadkaduak idi immawag da Orly ken nanang kaniak a nangibaga iti pannakabagida iti proyekto. Nakullaapan ti panunotko ket ti la napampanunotkon.”

Inisemannakami ni Ma’am Alyn. Nagta-thumbs-up-kami.

“Ikkatem koma ngaruden dagiti impostem, manang.”

“Ita met laeng, ma’am. Agyamanak,” saibbek. “Saanyo koma a baybay-an ni Orly. Agsubsubalitakto, ma’am.”

“Mangnamnamakayo, manang. Sige, agyamanak iti orasyo…” Ket iniddepen ni Ma’am Alyn ti selponna.

“Congratulations, Ma’am Alyn!” maysanmaysa nga inkablaawda kenkuana. “Naglaingka a nang-bluff ken ni Manang Jenny!”

“Nalagipko la daydi naadalko iti Psychology,” nakais-isemen ni Ma’am Alyn.

Ket diak man maawatan ti bagik ta kasla ad-adda a pimmintas iti panagkitak. Piman, kastoy a kastoy ti nariknak idi nagayatak iti dayag a nangpaleddaang met laeng kaniak idi agangay. A rason no apay nga agingga ita, dose tawenen ti napalabas, ket awan pay ti nangibaw-ingak iti atensionko.

Ayna, Manang Jenny, ania daytoy nga inaramidmo?