Sarita: Ni Manang Jenny (Umuna a paset) | Tawid News Magazine - Weekly Ilocos News 📰

Ni Manang Jenny (Umuna a paset)

“KUNAM no asino!” agpupungtot ni Ma’am Alyn, adviser ti 9-Ruby, a simrek iti dayta nga agsapa ti Lunes. Uray la pimmatak dagiti dadakkel a matana. Maikadua pay laeng a lawas manipud panagseserrek ngem addan paka-stress-anna.

Single pay laeng ni Ma’am Alyn iti edadna a sumagpat a tallo a dekada. No apay a kasta, nalabit gapu iti kasla Ruby, ti Eat Bulaga, a pammagina. Sapay la nairana a kasta ti nagan ti seksion ti adbayseranna. Umanay la a pangkankantiawanmi kenkuna no makarugikami. Nadumaduma ngamin a klase ti bato ti nagan dagiti section ditoy Cabaybay West National High School.

Ngem awagannak met iti ‘lilong’ no kasta a pagaaduanmi. Kasano, siak ti kataengan kadakami iti edadko nga apagisu nga uppat a dekada.

Ammok lattan a ti post iti Facebook ti pagkaskastaan ni Ma’am Alyn. Napalabas ni Sir Dexter iti wall-na ti nasao a post nga adda pakainaiganna iti pagadalanmi. Binagkatna met nga im-post iti chatroom-mi a mannursuro iti CWNHS.

Maipanggep iti homeroom project da Ma’am Alyn ti post. Maysa a nagannak nga adda idiay Manila ti nagreklamo.

Tiles? Mk2long dyta t pnagbasa dgt annakmi? Nktam la a nagpa-tiles ti padam nga advser, tnuladmo metten! Inggit lang ang peg, ganern? Ania ti maitulongna dyta iti pnagbasa? Pangparigat la kadakami a nagannak. Kasta ti linaon ti post.

Iti apagbiit, nagsasarutsoten dagiti nagkomento. Adu ti simmawsaw a dida ammo ti sibubukel a pasamak. Kasla nakaangotda iti padaya a lima a nuang ti naparti ket immarakda a dagus.

Ania pay, nagbalinkami aminen a dakes iti CWNHS! Saan laengen a ni Ma’am Alyn a maseknan la unay. Gapu iti social media, nadayyeg ti pagadalan iti apagkirem a kanito.

Idi la Biernes a naangay ti umuna a homeroom meeting. Agpapada ti agenda ti tunggal adviser: mapili dagiti baro nga opisial ti PTA, mapagsasaritaan dagiti kayatda nga ipatungpal a proyekto, maala no asino dagiti miembro ti 4Ps, ken ti disiplina dagiti ubbing.

Kalpasanna, naangay ti general meeting iti kabarbaro a gymnasium. Napili dagiti set of officers ti sibubukel a PTA. Ginundawayan metten ti awan pay makatawenna a prinsipalmi, ni Sir Lito Sierto, ti nangyam-ammo iti bagina kadagiti agdadamo nga agpabasa kadagiti annakna iti eskuelami. Imbaslagna payen dagiti planona iti sibubukel a CWNHS.

Iti kuarto ni Ma’am Alyn, natinongda a pa-tiles-an a kas kadagiti room-mi iti Grado 8 nga idi pay napan a tawen a nalpas. Bassit la idi ti siningirmi kadagiti nagannak ta adda nangrugianmi a naur-or kadagiti am-ammomi.

Kaaduan kadagiti nagannak ni Ma’am Alyn ti nangkanunong iti dayta a proyektoda. Nailawlawag a no ma-tiles-an ti kuarto, nadaldalus a kitaen. Mapalag-anan ti rikna dagiti ubbing. Agbalin a conducive for learning a kunada ti aglawlaw.

Maysa pay a rason, maliklikan ti kanayon a panag-floorwax ken panaglampasoda. Mop ken danum laeng ti masapul. Ken sangkabassit a powder a sabon. Iti kastoy, makainut pay dagiti ubbing. Mapan ngamin a tallo a floorwax ti masapul tunggal panagdadalus. Beinte agingga iti beinte singko a pisos ti maysa a floorwax. No mamitlo wenno maminpatda nga agdalus iti makalawas, dakkel daytan a pagbibingayanda.

Ti ammo no Ma’am Alyn, okey daytan ta naipamitingna met. Ngem kamalman ti Biernes, apaman a nakaawidkami, rimmuaren ti post iti FB.

Yanna nga adat, nagtaud ti post iti maysa nga ina nga adda pay idiay siudad ti Manila. Ti inana, wenno ti lilang ti ubingmi a transferee pay met, ti nakimiting. A segun ken ni Ma’am Alyn, maysa pay kadagiti kaunaan nga immanamong iti proyekto.

“Bay-amon, ‘deng,” inyandingay ni Ma’am Lianne ken ni Ma’am Alyn. “Kastana ni Jenny!” ti nagposte iti FB ti kayatna a sawen.

Ngem sobra met unay, ma’am!” inngayemngem ni Ma’am Alyn. Isagsaganana dagiti ramitna nga agisuro.

Segun ken ni Ma’am Lianne, talaga nga adda tartarawit ni Manang Jenny. Kasla dagiti allon a babassit iti baybay no kasta a malem— natarappi a kunada. Narigat a salaan. Ammo ni Ma’am Lianne ta kabarioanda ngarud ditoy Cabaybay a nakaisaadan met la ti pagadalan.

Nagbasa kano idiay Manila ni Manang Jenny. Ngem dina pay nalpas ti kursona a Business Management, nakitarayen iti nobiona. Mayat kano ketdi ta adda kunkunana ti nakitarayanna. Ngem awan ti kallaysa a napasamak.

Gapu iti kinabuslon ti kuarta, napanuynoyan ti anakda idi agbasan daytoy. Pagdaksanna, saan a husto ti pannakatarabayna. Inagaw ti barkada ni Orly, nga estudiantemi ita.

Gapu iti dayta, napanunot ni Manang Jenny a yalis ni Orly iti CWNHS. Total, adda kano met ni Nana Iling nga inana a mangkitkita itoy. No labsen ti agsao, kaparaanganda ti eskuela. Mabantayan ngarud ni Nana Iling ti anakna.

Idi ipaenrol ni Manang Jenny ti anakna, kinunana a di mayulo ti ubing ti agbasa iti siudad. Riribuken kano dagiti barkadana. Ibul-bully-da a kanayon. Isu a manmano a sumrek. Nagangayanna, failed amin a subject-na iti Grado 9.

Ngem kinapudnona, ni pay gayam Orly ti bully iti pagadalanda. Kasano a di na-retained ket dayta la gayam makibilbiliar, agwalwalay ken makibarbarkada ti inub-obrana. Inluod pay dagiti computer games iti selpon.

Kayatna koma nga ilimed ti amin, a, ngem nalipatannan sa a naglapayag ti daga!

KINASARITANAKAMI ni Sir Lito a prinsipalmi kalpasan ti flag ceremony.

“Saantayo koma a tutopan dayta agsasao iti social media,” kinunana. “Ad-adda laeng a pagay-ayamannatayo.”

“Nagrigat ti agteppel, sir,” insungbat ni Ma’am Alyn. “Aglalo ket siak met ngarud ti adviser ti anakna. Simmawsaw payen ti dadduma a nagannak dagiti ubbingtayo idi.”

“No dayta adda dita abagatan ti kunam, ma’am,” kinuna ni Ma’am May, “aw-awatemon. Nasakit la ti nakemna ta naadbaysan idi dagiti annakna a mai-transfer iti kinaadu ti record-da. Agibalbales.”

“Koma no ammoda ti pudno a mapaspasamak iti eskuela!” immisugsog ni Ma’am Alyn.

“Isu ngarud a ‘tay kunakon,” nagtalinaed a nababa ti timek ni Sir Lito, “agulimektay’ latta. Maumadanto. Ti napateg, saan a datayo ti nagtaudan dayta a proyekto. Napagpapatangan dagiti nagannak. Ken saanka nga agkolkolekta, ma’am. Bay-am a ti tesoreram ti agsingir ken agiggem iti kuarta.”

“Wen, sir,” napakumbaba a sungbat ni Ma’am Alyn. “Planok pay ketdi, sir, a paisardeng ti proyektoda tapno malpasen ti saosao. Agpamitingak koma ‘ton bigat. Mabalin, sir?”

“Okey, ma’am. Nasayaat no yumanmo kadagiti nagannak ti isyu. Sapay ta ad-aduda itan a dumar-ay iti meeting.”

Apaglabes la a guduana dagiti nagannak ni Ma’am Alyn ti adda idi Biernes.

Kabigatanna, nakitak a naburnok dagiti nagsangpet a nagannak iti kuarto ni Ma’am Alyn. Sigurado la ketdi nga impaganetgetna kadagiti ubbingna ti idadar-ay dagiti nagannak kadakuada.

Kinadua ni Sir Lito idi rugianen ni Ma’am Alyn ti miting. Napanak metten iti office.

(ADDA TULOYNA)