Footer

Ni Mannurat ken ti politika (Maudi iti dua a paset)

Nagsaon dagiti natatakneng a mannurat. Nagaonen kadagiti plumada dagiti balikas ti iliw iti dungngo ti maysa nga  ina; ngem kas maysa a mannurat, ania ti akemmo ken pulitikam kadagiti makitkitam a moromoro ken sarsuela? Ania ti pulitikam kadagiti pannakakiwar kadagiti siliasi ken in-inut a panangsukmon kadagiti baak a basi iti kamalig?

Iti pagilian, adda dua a mannurat: ti awan dilana ken adda dilana.

Ngem daydiay awan ti dilana dina  naakem ti naikumit kenkuana a pagrebbengan ta kukua ti sabali a puso ti pusona; idinto ta ti addaan iti dila ket agin-inanan iti innem a metros iti uneg ti daga. Daytoy ti rason no apay nga adayo pay laeng ti parbangon. Saan pay a mapasamak dayta  baringkuas ken yuulog iti apagsipasip ta madama  pay laeng ti urok wenno batibat wenno di man ket naiturog ti puyat iti payegpeg gapu iti angdod ti naggarraigi a tikbalang wenno iti panaglikuslikos ti mutia iti diding.

Nakakulong dagiti anito iti garapon ti sariugma a nakaitublakan. Iti sumipnget, kasapulan ti manguskusip ken mangatang ken panagwarsi kadagiti bagas dagiti sirmata ti dur-as. Ngem nasken a maipasngay manen ni mannurat ken mabuniagan iti Nagan ti Ama, ti Anak ken ti Espiritu Santo iti Karayan Pluma…

Kas maysa a mannurat, saantayo a mangan iti puni ken makikiwar iti siliasi ti sinan-umbi; saantayo met nga lumidok kadagiti immab-abanda ken makidilamot kadagiti naglanglanganda; lumabastayo laeng, wen, ken umisem ken ibagatayo a saan a panagbain ti paay nga awis no di ket panagpammarang a  nabsog tapno maibatitayo dagiti pinilitayo a pinidut; a pakaammuanda nga inton agpatinggan ti tik-abda ammodanto a limmabastayo; wenno ammodanto ket ngatan a linabsantay ida;  iti malem, sapulendanto la ketdi ti nayon ti intay imbati kadakuada ken agsapuldanto met iti ad-adu, ngem sapuldanto a sapul didanto makasapul; ta aginana met ti waras a kas iti panaginana ti nagkallautang  a  bulong iti sab-ok ti angin; adda ti senial ti idadalan, ti ilalabas, ti pinidut nga imbati; a kas kadakuada adda met senial ti kinaasino ti agtagikua kadakuada.


Iti panagbitla ni Mayor Mary Jane C. Ortega ti San Fernando City kas naisangayan a sangaili iti napalabas a LABAW Book Launch, siraragsak a nangiwaragawag a makipagkaykaysa iti panangrambak iti ipapasngay ken pannakayalnag ti Labaw, ti umuna nga antolohia ti GUMIL La Union a namagtitipontipon kadagiti obra ti 24 a beterano ken agdadamo a mannurat iti Iloko (nairaman   ditoy ti maibilangen a klasikal a  a sinurat iti Ingles ni Manuel E. Arguilla, “How My Brother Leon Brought Home a Wife” nga impatarus ni   Constante Casabar, Idi Yawid ni Manong Leon ti Asawana.

“Masapul a maipasagepsep a nalaing ti isusubli ken idudur-as ti bukodtayo a literatura iti probinsia a La Union,” kinuna ti mayora. “Nabasakon ti libro. Maragsakanak a makaammo a nainayon ditoy dagiti aramid da appo mannurat a Hufana ken Arguilla. Kalikaguman ti ama ti probinsia, Gob. Victor F. Ortega, babaen ti panangidagadag ‘toy numo nga ina ti siudad a maikkan iti libro dagiti amin a biblioteka a masarakan iti probinsia ti La Union – pampubliko nga eskuelaan (elementaria ken sekundaria) iti barangay, munisipal ken probinsial nga agpang,” kinuna ti mayor.


Dagiti sumaganad dagiti nangabak kadagiti naangay a pasalip iti launching ti Labaw:

I.   On the Spot Literary Contests:

On-the-spot English Poetry Writing contest (Agdadamo/Estudiante) :   First Prize: Joyce Milanes, Dallangayan Oeste, San Fernando City; Second Prize:  Nivea Jane Urdas ti La Union National High School, San Fernando City; Third Prize: None

 On the Spot (Labaw-inspired Iloko Poetry Writing Contest (Beterano/Agdadamo): First Prize:  Danilo Caburian, Tanda dagiti Tugot; Second Prize: Henry Tangalin –Labaw ni Lam-ang; Third Prize: Leonora T. Corpuz  –   Lab-aw; Fourth Prize:  Epifania Gacayan –   Labaw: Naipasngayen; Fifth Prize: Milagros L. Renon –   Nagasatka, Labaw;

Consolation Prizes: Salustiano Digaoan – Pannakayanak ti Labaw; Edward Britos – Nakiddit Ngem…; Enriqueta Boadilla – Pannakayalnag ti Labaw

Labaw Literary Puzzle Winner: –  Epifania Gacayan; P500.00 raffle prize – Danilo Caburian; Special Fruit Cake raffle prizes – Edward Britos, Djuna Alcantara, Mila Renon, Leonora Corpuz, ken Fanny Gacayan.

Labaw Book Raffle – Dr. Tomas Villaflor, Rodgerry Rodriguez, Edward Britos, Salustiano Digaoan, Crisanto Palabay, ken Bert Bautista. #