Ni Manong Lexter

Imbiit ni Jobert M. Pacnis

NAMINSAN pay a sinirig ni Manong Lexter, 34, iti pettak a sarming ti agkubkublang nga aparadorna ti ala-Aljur Abrenica (kuna dagiti sutil a babakla iti pagpappapukisanna a Seguro Beauty Saloon iti puseg ti ilida a Sanchez Mira) kano a kinaguapona. Sakbay a tinallikudanna ti sarming, pinagletra-V-na pay dagiti tangan ken tammudo ti kanawan nga imana nga insigkat iti kakarkarti a timidna.

Naggasatkan, aya, Lexter, ta nasippawmon sa aminen a kinataraki idi agiwaras ti Dios, kinunana iti bagina.

Sinakayanna ti kabarbaro a motorsiklona a makabulan pay laeng a tintinnaganna. Mapan man ketdi iti banko ta kitaenna no simreken ti tagtagiurayna a bayad dagiti daniw, sarita, salaysay, photonews, jokes ken fotolafna iti magasin. Nabileg daytan nga ap-ap ti bulsana aglalo no adda iti sango ti babai nga ar-arapaapenna a maikutan— ken idatag iti altar.

Nakaisem kadayta a nalagipna. Kaaduan kadagiti lallaki ti mangikarkari nga idatagda iti altar ti sabsabongenda ta ay-ayatenda daytoy ngem iti suli ti panunot dagitoy, imposible a di dayta pannakaikutda iti “langit” nga ikarkari dagiti makaawis a bambantay ken rukib iti tengnga dagiti kasamsamonan.

Abnormal ti lalaki a di kasta ti adda iti panunotna no ar-armenna pay laeng ti babai, nakuna ni Manong Lexter iti isipna. Siak, aklonek a kasta, innayonna.

Panggep ni Manong Lexter a no simrek ti bayad dagiti sinuratna, awisenna ni Ronalyn a sabsabongenna. I-treat-na man ketdi iti Angel’s Ice Cream House iti sango ti CSU. Bareng maalanan ti nasam-it a “wen” daytoy.

Sabagay, nakunana iti bagina, imposible a dinak ayaten daydiay ket galanteak met. Mailibrek pay amin ida iti agkakaimas a taraon ‘diay balayda no sumarungkarak. No langa ti pagsasaritaan, awanen ti makunana pay. Ken agasem dayta nurse ken doktor idiay ballasiw-taaw ti ammona a nagannak kaniak?

Wen, kasta katalek ni Manong Lexter iti bagina.

Addan iti batog ti CSU. Asidegen iti banko. Iti pannakataliawna iti Angel’s, kasla makitkitana nga addada dita ken ni Ronalyn nga agmermerienda. Ket sungbatanen daytoy. Timmayok pay ti riknana kadayta a naisipna.

Dagus nga inserrekna iti ATM ti card-na idi makagteng iti banko. Ngem anian a pannakalpay dagiti abagana idi ag-balance inquiry. Awan pay simrek a bayad dagiti sinuratna. Ken nababbaba payen ngem iti maintaining balance ti nabati.

Sineknan ti danag ni Manong Lexter. Ti ammona, apagisu iti maintaining balance ti nabati.

Inkeddengna ti sumrek iti banko tapno agdamag. Narigaten no marikpan ti account-na. Di pay ket dina maawat ti subad dagiti nagbambannoganna a sinurat?

“Good morning, sir,” inkablaaw dagiti dua a guardia iti ridaw ti banko.

Nagsam-it man ti panagdengngeg ni Manong Lexter kadayta. Sir, diallo, ket kasla kayatnan ti agsubli nga agbasa dita CSU tapno ituloyna ‘di kursona a kinamaestro. Ngem anian ta tallo tawen a nag-first-year college gapu iti kinaarmendona. Malagipna, pati daydi maestrana iti Algebra, a naub-ubing kenkuana, inaremna pay. Isu a pinagsardengen dagiti dadakkelna a kakaasi nga agsuksukay iti talon ta, kas kadawyan a maibagbaga, sayang laeng ti kuarta.

Iti kaaddana iti uneg ti banko, impalawlawna ti panagkitana a nakangatngato ti timidna. Adu dagiti kliente a nadanonna. Kunam no asino itan nga anak ti milionario.

Intugawna iti igid. Inurayna ti batangna. Permi a pakuyegyegna a nakadekuatro.

Naayaban ti naganna. Dinarasna ti immasideg iti teller a nangawag kenkuana. Imbagana ti parikutna.

“Aguraykay’ laeng biit, sir,” kinuna ti teller nga uray la nakakigtotan ni Manong Lexter. Ta nupay nalailo ti timek daytoy, kasla met gumgumluong a reperi iti volleyball.

Sinapul a dagus ti teller ti naganna iti kompiuter.

Iti panagur-uray ni Manong Lexter, napataliaw iti likud. Uray la nagkulibagtog ti pusona idi malasinna ti nakatugaw iti malikudanna. Ni Ronalyn! Nakaisem daytoy kenkuana.

“Excuse me, sir,” pinagtimkan ti teller. Addayta manen ti gumgumluong a timek, a di met a makaunget.

“Yes, ma’am…”

“Isu met laeng a nababbaba ngem iti maintaining balance, a, ta nangiruarkay’ gayam iti sangagasut itay napan a bulan. Apagsurok la bassit a maintaining balance ti nabatbati idin…”

Imbes nga agsao pay ni Manong Lexter, kinarayaman ti lamiis. Nangngeg la ketdi ti amin iti uneg ti kinuna ti teller. Sangagasut, diallo…

Idi taliawenna ni Ronalyn, nakalibbin daytoy kenkuana.#