Footer

Ni Nakapsut

Kolum ni Jobert M. Pacnis

(Tuloyna) 

 

Iti telebision, adda latta met a maipadpadamag dagitoy a kinamanakem dagiti drayber. Adda dita ti tsuper  a nangisubli iti bag ti pasaherona a naglaon iti rinibu a pisos. A mangpappapintas iti imahen ti pagilian kadagiti turista.

Ket itay laeng nabiit, ditoy  ilimi a Ballesteros, maysa met a traysikel drayber ti nangisubli iti napidutna a rutayrutay a bassit a bag. A naglaon iti rinibu a pisos.

Addaak iti health center kadayta a Pebrero 26. Iti nagparkingak, adda dita ti uppat a traysikel drayber a mangur-uray iti pasaheroda nga intulodda iti center tapno patudokda dagiti kayyanak nga ubbingda (kas kaniak).

Idi kuan, maysa manen a drayber ti dimteng. Idi malasinna ti maysa kadagiti nadanonko a drayber, “Nagkapsutka, yos!” kinunana a dagus. “No siak, a, ket diakon insubli!”

Naammuak a kadayta a Pebrero 24 (Domingo), nagpaili ti “nakapsut” a drayber kalpasan ti dua aldaw a dina panagbiahe tapno gumatang iti sidada. Kapigsa ti tudo. Idi kuan, iti igid ti kalsada, adda kano nakitana a rutrot/rutayrutay ken bassit a bag. Kasla kados ti langana ngem laeng ta nairanta a naipaaramid a maisakbat.

Gapu ta nakita ni “nakapsut a drayber” a kasla nalagda met pay laeng ti sakbatanna, sinardenganna daytoy (a labsalabsan laeng dagiti tao ken padana a drayber) tapno pidutenna. Panggepna ngamin nga alaen ti sakbatanna tapno isukatna iti kadosna a mapugpugsaten. Apagpidutna, impuruakna lattan iti uneg ti luganna ket nagawiden. Saan a nagpasahero ta gumatang la ngarud iti sidada ti rantana.

Idi makagteng iti balayda, linuktanna ti bag. Anian a siddaawna ta nareppet metten a saglilima gasut ken sagsasangaribu ti linaonna. Uray la napamulagat iti dakkel. Adda pay listaan a nakasurat iti dina maawatan a lengguahe nga iti abay dagitoy ket ti nadumaduma a gatad. Simrek a dagus iti panunotna a mabalin a dagiti kakabsat a Muslim ti akinkukua iti bag. Dagitoy ti agpapautang kadagiti negosiante idiay ili ken iti kabangibang nga ili.

Di ninamnama ni “nakapsut” a drayber ti dimteng a pasamak kenkuana. Inalusiis. Kadayta laeng a kanito a nakakita ken nakaiggem iti kasta  a kantidad. Ania ti aramidenna? Uray saanen nga agbiahe iti makatawen, saanto la ketdi nga agbisin ti pamiliana. Numona ket nagrigat ti agpasada iti kaaduda a drayber ket nagbassit met ti ilimi. Inayon pay ditan ti nagadun nga agus-usar kadagiti motor iti panagpailida.

“Awan met linaonna, kinunam koma lattan, a!” kinuna manen ni kassangpet a drayber ken ni Nakapsut. “Mabalin nga adda nakauna kaniak a nakapidut ket imbattalna lattan nga isu met ti napidutko.”

Natuntonanda ni Nakapsut ta adda gayam nakakita kenkuana a nangpidut iti rutrot a bag nga inladawan ti “napukawan” kadagiti tattao a masabatna idiay ili; ken kadagiti drayber nga agur-uray iti pasahero (ta nairana a dapon kadayta nga aldaw).

“Wenno saan,” insarurong met ti maysa, “innalam koma a dagus ti linaonna samo met la imbattal idiay plasa.”

“Simrek met dagita iti panunotko,” kinuna ni Nakapsut. “Ngem talaga a diak kabaelan. Makonsensiaak. Baka ket no  anianto ti katukadna dayta iti pamiliak. Baka no agsakitda wenno madisgrasiaak. Yad-adayom, Apo…”

Napaisemak iti kinuna ni Nakapsut. Ngem napatamedak iti sinaona. Kangrunaanna, iti inaramidna a panangisubli iti kuarta a napidutna (a kukua nga agpayso dagiti kakabsat a Muslim). Wen, saan nga isu ti “nakapsut.” Ti ketdi durog ti nakapsut. Isu? Natibker. Napigsa. Ta saan a pinasulisog iti sileng ti pirak! Kudos kenkuana!

Wen, saan nga agpayso a rason dayta kinakurapay tapno agaramidtayo iti di maiparbeng. Ken uray kasano ti kinakiro ti aglawlaw, makasalawtayo met latta kadagiti nabalitokan ti panagpuspusona. Saantayo koma ngarud a sapasapen amin a drayber.

Ta taoda met nga addaan iti kabukbukodan a panunot a maisupadi kadagiti kakaduada. Ikararagtayo ketdi nga umadu koma ketdi dagitoy a napudno, manakman, ken mapagtalkan a kas ken ni Nakapsut.#