Ni Nakapsut

Kolum ni Jobert M. Pacnis 

 

NO mapagpapatangan dagiti drayber kadagiti pampasahero a lugan (traysikel, dyip, bus ken van), agsisimparat ti kapanunotan ti tunggal maysa kadatayo segun iti padasna.

Managkulding dayta, mabalin nga adda agkuna.

Wenno, bastos dayta! Adik pay!

Ipikar met ti dadduma: Balasubas dayta a drayber! Ta siningir ida ti maseknan iti sobra.

Sobra? Maipalagip la ket ngarud kaniak ti siudad ti Tuguegarao ditoy Tanap. Kababain man ngem nagbalinen a trademark daytoy dagiti balikas a capacity, double pay, ken special. Adda pay mangontrata kadagiti traysikel drayber nga agud-udaod iti nailet ken nakapudpudot a siudad.

Saan a mailibak daytoy a kinapudno. Iti lima a tawen a panagtalinaedko iti siudad gapu iti panagbasak, nagbalinak a saksi, ken nakapadas metten, kadagitoy a pasamak.

Ti siste? No dimsaagkan iti bus (awan pay van idi nga agbibiahe) a naggapu iti ilim, addaytan dagiti kumunolkunol a drayber a sumabat. Nakaam-amoda met a makipatang kenka. Di kad’ maawiska met nga aglugan. Pagdaksanna, inton addakan a nakasakay ket agtartarayen ti lugan, ibaganton ti drayber a double pay (dobliem ti regular a pasahe). No saan, aglalo no medio adayo bassit, capacity ti ibagada. Saanka metten a makareklamo ta nakaluganka ngaruden.

Inglisero dagiti drayber iti siudad, kunada ngarud. Agpapan kadagitoy, mapaspasamak latta ti nasao a senario. Ngem depensa dagiti drayber, aramid kano laeng dayta dagiti kolorum ti luganna a nagtaud pay kadagiti kabangibang nga ili.

Ngem agingga a di agtignay dagiti opisial ti nasao a siudad, kasta metten dagiti ahensia nga akinsakup itoy, saanto a maikkat dayta a naalas a pannakabigbig dagiti drayber. Kasla mantsa a kimpet iti pagan-anayda a di maikkat iti uray mamin-ano a gelgel.

Kadagiti met nalinteg a drayber, nasakit daytoy a birngas (Inglisero) kadakuada ta pakairamramananda. Ngem masapul ti naan-anay a panagkakayammet tapno mabugiawen dagitoy abusado a drayber iti ikubda. Opisial, drayber ken dagiti maseknan nga ahensia, masapul ti panagkaykaysa. Kasta met dagiti pasahero. Dida koma bumdeng a mangipulong kadagiti maseknan dagitoy nga abusado a drayber tapno maikkanda iti leksion.

Tip met kadagiti damona ti dumap-aw iti siudad:

Saan nga ipadlaw ti kinaagdadamo iti siudad. No sinabatdaka dagiti drayber ket damagenda ti papanam, dimo koma sasawen a kasla dimo ammo ti yanna. Diretsoen lattan ti drayber.

Itulodnak man idiay _____, kunaen lattan. Ngem no inglisennakan, tallikudamon. Agamparaka laengen kadagiti aglabas a traysikel. Naynay ngamin a dagitoy agsabat ti pasahero kadagiti terminal ti abusado.

Saan met la ketdi a ti nasao a siudad ti adda kastoy a parikutna. Mapaspasamak met kadagiti dadduma a siudad ken uray payen kadagiti babassit nga ili. Ngarud, saantayo nga agbalin a biktima. Ilabantayo ti karbengantayo a kas pasahero.

Ngem ketdi, no ammotayo met nga adayo ti papanantayo, saan met ngata a dakes a doblientayo ti pamasahe. Wenno nayonantayo ti regular a pasahe segun iti agubbog iti pusotayo. Ta pudno man met a narigat ti sasaaden dagitoy kakabsattayo a drayber. Pangato a pangato ti gasolina ken dagiti magatang a paset ti luganda nga agdadael.

Kadagitoy nga ipapanko iti siudad, mapaspasamak latta, kas nasaon, dagitoy a panagsabat dagiti drayber kadagiti pasahero kadagiti terminal ti bus ken van (a kaaduan itan). Ngem pulos a didak maingles ta ammokon daytoy a siribda. Dagitay ketdi nataengan (mapan a sisentana) ti ad-adda a pagluganak.

Apay? Adda panagbain dagitoy. Maamakda nga aginglis. Ngem inton maitulodnakon, saan a diak nayonan ti pamasahek aglalo no awan ti mapidutna a kaduak.#