Ni Savellano latta ti bise gobernadorko: Cong. Ryan Singson

VIGAN CITY –  “Saan a mabalin dayta. Saanko nga ipalubos,” daytoy ti nabatad a pakaammo ni Cong. Ryan Singson mainaig iti mapapati nga agwarwaras a damag a saanen a ni Vice Governor Deogracias Victor Savellano ti ipagpagnana a katiketna iti masungad nga eleksion.

“Kayatko nga ilawlawag daytoy nga issue. Adda kano mangibagbaga a ni Ryan Singson ti governor, ket ni daytoy maysa ti bise gobernadorko. Saan a mabalin daydiay…” kinuna ni Singson bayat ti interbio ti media kenkuana itay nabiit.

Innayon ni Singson a dina ipalubos dayta ta no isu ti mapasamak, saan nga agprogreso ti Ilocos Sur.

Inlawlawag ni Singson a no sabali ti bise gobernador, dadaelenna ti “panagmaymaysatayo” iti Ilocos Sur, “kontraenna dagiti arapaaptayo a proyekto ken serbisio.”

Nagwara itay nabiit ti damag a saanen a ni Tagudin Mayor Roque Verzosa ti ikamkampania ti grupo ni dati a Bokal Efren Rafanan, Sr. a para gobernador no di ni Cong. Singson.

Kinuna ni Singson nga am-ammonan ti ugali ti kasangoda iti politika idinto a pinalagidanna ti kasango ni Savellano gapu ta “pinagbalinna a negosio ti politika”.

Inyunay-unay ni Singson a “nagpintas ti relasionda” iti katuganganna ket agparehoda a  mangitantandudo iti panagdur-as iti kultura ken turismo iti probinsia ket kasapulanna unay ni Savellano tapno maitultuloy dagiti programana iti probinsia a kas iti Kannawidan Ylocos Festival ken dagiti nairugi a programa ni Gov. Luis “Chavit” Singson.

“… Kas makitatayo… iti final leg ti kampania… agaramidda iti desperate move… us-usarenna ti naganko para iti “pansarili” (a pagsayaatanna),” kinuna ni Singson idinto nga innayonna no “kasta kadi ti kayatyo a lideryo iti Ilocos Sur?”#