sinursuran-banner-sqSinursuranNi Jobert M. Pacnis

Ni Yolanda ken ti Kinataotayo

Kolum : Sinursuran

Ni Jobert M. Pacnis

(Maikadua a paset)

 

No koma maigaed lattan ti panagtrabaho, di kad’ ad-adu ti malpas!

Maysa pay, adu kano ti lapped iti dalan ni Sen. Lacson. Pakibiangan dagiti lokal nga opisial ti pannakaiwardas ti proyekto a mangtulong kadagiti biktima. Ta masakupanda kano ngarud ti lugar a pakaiwaywayatan daytoy.

Ngem ti nalawag, dida maaklon a sabali ti ‘bumida’ iti lugarda. Amkenda a maaramat daytoy a pangdadael dagiti kalabanda iti politika. Nalaka, aya, no maibandonto nga awan ti naar-aramidanda?

Ngarud, daytoy koma ti kitaen ni Sen. Lacson. Ipakatna ti linteg. Masapul dayta naan-anay a panangtengngelna iti pannagna dagiti proyekto. Iwalinna, di agpaapekto kadagiti puris iti dalanna. Maymaysa laeng ti pokusna.

Agtultuloy latta met ketdi ti ibabangon dagiti biktima iti bukodda a panglakagan nupay adda dita ti agsasanggala a parikut. Bayanihan, dayta ti maysa nga ipagpagnada.

Ti nakas-ang, itay laeng nabiit, naipadamag a maysa a call center ti rinaut ti NBI ta nasukalanda nga adda sabali a modus operandi daytoy. Saan a cybersex kas kangrunaan nga isyo kadagiti internet shop wenno call center iti agdama.

Modus ti grupo ti mangusar kadagiti biktima ni Yolanda.  Babaen ti internet, agsolisitda iti pinansial a tulong kadagiti nadumaduma nga organisasion, indibidual, gobierno iti nadumaduma a pagilian. Pagdaksanna, saan a dumanon dagitoy iti nakaisangratanna.  Pagbibingayan dagiti adda iti likudan ti sindikato.

Itoy nga isyo, mabalin a pudno ti ibagbaga dagiti dadduma a natiliw a naaramatda laeng. Nga isuda ket plain worker iti dayta a call center. Saanda nga ammo a ti laeng amoda ti agnumnumar kadagiti mapastrekda. Nupay kasta, saanda a matarayan ti linteg.

Maanag ngarud a rumbeng nga alerto iti ania man nga oras. Kitaentay’ koma a naimbag no maikanatad wenno maikaniwas dagiti nastrektayo a panggedan. Agsukisoktayo no isu ti masapul. Lehitimo kad’ met laeng ti nastrekak? saludsodentayo iti bagitayo.

Malaksid iti saan a pannakaidandanon kadagiti biktima dagiti para koma kadakuada, ilegal pay ti negosio ti call center. Awan ti permit-na nga agopereyt.  Inkurimed ti pannagnana. No kasta ngarud, nalawag nga adda ilemlemmeng daytoy.

Ni Yolanda, saanna laeng nga inyeg ti didigra. Inriingna kadatayo ti kinapateg ti nakaparsuaan… ti pannakasalaknib daytoy. A ti nakaparsuaan no isu ti aglabatiba, agdalus kadagiti imbuntuontay’ kenkuana a rugit, awan ti makaipawil.

Ni Yolanda, binukiradna ti kinatao dagiti lidertayo. Imparangna ti pudpudno a burikda.

Ni Yolanda, riniingna ti espiritu ti kinnayammet iti tunggal maysa kadatayo. Uray bassit a tulong no mapagtitipon, dakkel a banag para iti ibabangon.

Ni Yolanda, nagbalin a rangtay dagiti nangisit ti panagemna tapno manggundaway.

Ngem nupay ania ti mapaspasamak, dagiti biktima ni Yolanda, saandanto a sumuko. Sititibkerda latta a bumangon– nupay adda dayta naukrit a sanaang, liday, iti puso ken isipda—iti patinayon a kaaddatayo iti likudanda.

Agserbi koma ngarud ni Yolanda a kas eye opener ti tunggal maysa kadatayo. Gesdanen dagiti banag a makadadael iti nakaparsuaan. Babassit man daytoy nga addang, no mapagtitipon, it makes a difference a kunada.  Kas iti iit a nalap-it, no mapagtitipon, madalusanna ti sangabuntuon a rugit.

Iti gobierno, ipamaysana koma ti tumulong, mangkita iti nadaras nga ibabangon dagiti biktima ni Yolanda.  Ipakatna ti ngipen ti linteg.

Ket kadagiti met lokal a lider, makitinnulongda ketdi iti gobierno. Saan a dayta laeng bagbagida ti kitaenda.

Iti sadino man a paset ti pagilian, mabalin a sumangbay ti didigra. Sapay la koma ta agkakayammettayo a bumangon iti basnotna. Saan ketdi nga aramaten daytoy a panggundaway kadagiti kailian.#