Footer

‘Nia, Naayat Iti Pornograpia ni Kompad?

Salaysay ni Rilo A. Bedo

(Maudi a paset)

 

Maibulgar pay dagitoy pribado nga aramid no insalda ti maysa kadakuada ti selpon a pinangalada iti bideo. Ti makadakes, karaman met ti memory card ta kasta ngarud ti pagalagadan dagiti pagisaldaan.

Ket ti yanna nga adat, adda met gayam limed a negosio dagiti selponsiap. Bukitkitenda dagiti memory card ket todas ni laing no adda dagiti pribado nga aramid a nalipatan nga inikkat wenno pinunas iti memory card.

Ania pay, kopiaen dagiti nangisit ti kararuana dagiti pribado a bideo. Dagitoyto ti ilakoda kadagiti sindikato. Intono kuan, di napupuotan dagiti maseknan nga adda gayamen nagwaras a video mainaig iti panagkanaigda.

Saanak nga agang-angaw, ‘Mare. Adu ti kastoy a negosio. ‘Su a masapul ti panagannad. No adda dagiti pribado nga aramidyo a nagang-angawanyo nga inbideo, punasem laengen tapno masiguradom a dinto agtinnag iti ima dagiti baribar ti kararuana a di la ketdi bumdeng a mangilako iti daytoy tapno adda panguartaanda.

Iti maysa a panagadal, nairaman a napagsaludsodan dagiti ag-308 a Puraw a kolehiala, edad 18-29. Rimmuar ditoy a kaaduan kadagiti adda partnerna (nobio wenno asawa) a naadik iti pornograpia ti saanen a naragsak iti relasionda. A bimmaba payen ti panagtalekda iti bagida gapu itoy.

Ngem kuna met ketdi ni Stewart a saan a ti pornograpia ti puon ti panagbaba ti panagtalek dagiti babbai iti kabaelanda a mangparagsak kadagiti partnerda. Ketdi, gapu iti rikna nga umagibas iti babai no kasta a maammuanna nga adik ti partnerna iti pornograpia. Mainsekiur, ‘Mare. Ditoy metten nga agramut ti apa wenno dinniskutir.

Nupay kadagiti Puraw a naiwayat ti panagadal, ‘Mare, mabalin a kasta met laeng ti resultana no kadatayo a Kayumanggi. Agbalin koma ngarud a tulbek daytoy tapno adalentayo, lalaki man wenno babai, ti bagbagitayo. Saludsodentayo: ne, apay metten a kasta ni Dungngo?

Tapno iti kasta, ‘Mare, dita pay laeng, makaaramidtayon iti addang tapno saan a marakrak ti nabayagen a relasion a binukeltayo iti partnertayo. Mabalin nga adda met agpayso pagkurkurangantayo iti partnertayo.

Kinuna met ketdi ni Stewart a ti inwayatda a panagadal ket kadagiti laeng addaan iti short-term a panagdenna. Kayatna a sawen, di pay masinunuo no pudno met daytoy kadagiti nabayagen nga agassawa wenno agnobio.

Nupay kasta, no nakaro kano unayen ti parikut wenno pannakaadik ti partner iti pornograpia, masapulen ‘tay makunkuna a pammagbaga (counseling) manipud kadagiti saykayatris wenno saykologo. Mabalin met ken ni Apo Padi.

Nasken met ti nasged a panagsarita dagiti agpartner. Pagpatanganda dayta a banag tapno saan a makaapekto iti binangonda a relasion. Kadagiti met babbai, saanda koma a gamden nga ikompara ti bagida kadagiti starlet nga adda kadagiti scandals. Mangdadael laeng dayta iti naannayas a taray ti panunotda.

Agbalin koma a napudno ti maysan-maysa. Ibagada no ania ti kaririknada— dagiti kayatda a mapasamak. Ta babaen ti naannayas a panagsarita, awan ti saan a marisut a parikut.

Ala ngarud, Mare, no saanka metten a naragsak iti relasionyo ken ni Kompad ta naduktalam a kaykayatna payen ti agbuya iti pornograpia ngem ti asikasuennaka no kalam-ekna, agtignayka met ngaruden. Inkay’ pagpatangan ti mapaspasamak. Baliwanyo a pasam-iten ti panagdennayo. A daytay man ketdi kasla idi damdamoyo pay laeng ti agdenna.

Diak met ketdi kunaen a nakasentro laeng ti ragsak ti agassawa kadayta sex a makuna. Maysa laeng daytoy a banag.

Ngem saan koma a daytoy laeng ti mangrakrak iti nasam-it a panagdenna.

Ta laglagipem, ‘Mare, adayon ti nagtengyo ken ni Kompad. Agbalin laeng a nakakaasi dagiti ubbing no diyo marisut ti tumamtamnay a panagdennayo.#