‘Nia, Naayat Iti Pornograpia ni Kompad?

Salaysay ni Rilo A. Bedo

(Umuna a paset)

 

ALA, saan met ketdi a siksika laeng ti kasta ti lakayna, ‘Mare. Ta itoy a kasta unayen ti itatayok ti teknolohia, naglaka laengen ti akses kadagiti naalas a mabuya wenno pornograpia kunata kad’ lattan. Isu a dikan masdaaw no ‘ta selpon ni lakaymo ket napno iti scandal. Ken uray pay dayta laptop wenno netbukna. Ken isu payen ti sangkabuyana a DVD.

Ngem saan met a kasta idi kadendennayo?

Ala, normal met laeng dayta ket. Ta iti panaglabas ti panawen, ‘Mare, dumteng latta ti panagbalbaliw. Ngem rumbeng laeng nga alistoka a mangkamat, mangpaliiw kadagitoy a pagteng. Dika agpapaudi.

Wen, a, ‘Mare, ta ammom kadi nga adda ipasimudaag ti pannakaadik ni Kompad kadagiti kakasta a mabuya?

Dika ket ngata mamati. Ngem segun iti panagadal nga insayangkat ni Destin Stewart, maysa a clinical psychology intern idiay Unibersidad ti Florida, ipakita kano daytoy ti saanen a pannakapnek ni Kompad iti relasionyo, aglalo iti sex life-yo.

Ne, dika agmulagat iti dakkel, ‘Mare. Ibagbagak laeng ti agpayso.

Segun iti panagadal, naragragsak kan’ nga amang ti relasion dagiti agassawa, wenno uray dagiti agnobio ken agnobia pay laeng, a di man laeng mangtaliaw (wenno maadik) iti pornograpia. Ta addan dayta pannakapnek iti nagbaetanda.

Saan kano met ketdi unay nga isyo ti pornograpia iti nagbaetan ti agassawa. Ta maysa pay ketdi daytoy a katulongan tapno mapagtalinaed ti kinabara ti relasion aglalo no agdanggay dagiti ag-partner itoy a banag. Ngem no kastan a ti laeng maysa (a kadawyan a ti lalaki) ti naayat kadaytoy, dakesen. Sabalin ti kayatna a sawen.

Iti met biangmo, ‘Mare, makadadael la ketdi daytoy iti panagtalekmo iti bagim no maduktalam ni lakaymo a kasta laengen ti ayatna iti pornograpia. Ta apay metten a dayta ti nagbalin a “bisio” ni lakaymo.

Ta kasla ketdin awan ti mababaelam iti rapok iti ikamen. A kasla ketdin dimon a kabaelan a parugsuen ni lakaymo kadagiti kanito a kayatna wenno kayatmo a nanamen ti “diro” ni ayat. Kabaliktaden iti napalabas a no kadigdigosmo, addaytan ni lakaymo a mangkallabay kenka, agkanna ti puon ti lapayagmo santo arakupennaka iti nairut ken iyarasaasna nga ay-ayatennaka. Ayna, ket sumarunonton ti “panagngasab dagiti darikmat”.

Ket seknannaka dagiti saludsod. Nauma kadin kenka ni lakaymo? Wenno, sutilennaka ti panunotmo nga addan nasikkarudna a seksi ket insukatnakan agsipud ta kayarigam metten ti sabong a mangrugin nga agkupas ti kinalapsatna.

Agingga a dumteng iti punto a maapektaranen ti pannakilangenmo kenkuana. Ket no di maaluadan, sigurado nga agtungpal dayta iti panagsina.

Ta apay ngamin nga adda dagiti agar-aramid ti pornograpia? Saanmon a saludsoden dayta, ‘Mare. Dakkel a negosio dayta kunam sa! Isu a dikan masdaaw no apay a kasta laengen ti panagraira dagitoy.

Adda met ketdi dagiti agwarwaras a pornograpia a tinaktakaw laeng ti pannakaalana. Kasla koma dagiti naala kadagiti pribado a siled. Ta gayam, adda nakalemmeng a kamera a ‘mangsisiim’ iti aramidenyo iti partnermo. Inton kuan, adda gayamen iti merkado dagiti inaramidyo. Makapasiudot, di kadi?

Sabali laeng met ti ang-angaw a nasagangko— a   mabalin nga adda met kinapudnona. Apay kano a mayat dagiti agasmang nga alaan iti bideo ti innayatda? (Isuda pay a mismo ti mangala, a.) Wen, a, tapno addanto kano pakalaglagipanda inton didan kabaelan, ‘Mare. Ha-ha-ha!

Ngem ti makadakes, baka agwaras met dayta a bideo aglalo inton nalubon ti relasion dagiti agpartner.

Kas daydiay nagwaras a video ti panagkanaig ti maysa a doktor ken iti maysa a nalatak nga aktres.

Nagbalin a dakkel a kaso ti pannakaibutaktak ti kaadda ti nasao a video ket dimmanon pay iti korte.

Wenno ti video ti pannakinaig ti maysa a kolehiala iti nobiona a nagpiestaan a binuya dagiti gagayyem ti lalaki agsipud ta impatulod daytoy kadakuada.

Nagbalin a dakkel nga eskandalo dagitoy a napasamak a nangipaay iti dakkel a pannakaibabain kadagiti biktima a babbai.

(Adda tuloyna)