Nicole: biktima ti tradision ti kinamaag

Komentario ni Danilo Antalan

 

 

Iti ladawanna a naipablaak iti Philippine Daily Inquirer a na-picture iti dayta met laeng nga oras, 12/31/2012, sumagmamano a minutos sakbay a sumrek ti baro a tawen 2013, kaddua ni Stephanie Nicole Ella, 7 anios,  ti kabsatna a ni Ken ken dagiti tallo a padana nga ubbing a kakasinsinna.  Nakapimpintas ti kawesna a pink.  Nakaisem, nakaragragsak, nakain-inosente.  Buybuyaenda ti fireworks display dagiti kuitis, dumdumngeg kadagiti awan sardayna a paputok, agbuybuya iti panagraragsak dagiti tattao, ta minutos laengen, lumas-udtayon iti baro a namnama.

Ngem idi kuan, awan pakpakadana, awan patigmaanna, nagtuang lattan iti nagtakderanna.  Nagsayasay ti dara manipud iti ulona.  Iti baet dagiti makatitileng nga ariangga ti panangsabet iti 2013, nagikkis ti pamiliana.  Nangruna ta idi sakruyenda, nagsalungaygay metten ti ulona.

Bala ti paltog ti pimmalnek iti ulona.  Stray bullet ti awagtayo.  Bala ti paltog manipud iti di am-ammo nga ima, a nagatel a mangkalbit iti gatilio.  Ta daytoy ti wagasna iti panangsabetna iti baro a tawen, ti mangpaputok iti paltog nga imetna.  Ngem timmama metten ti naiwawa a bala iti parsua a mangrugrugi pay laeng ti panangtun-oyna iti kinataona.

Anian a biag ti isem iti ladawanna.  Napnuan ti ragsak ken namnama.  Napnuan ti potensial iti panagdakkelna.  Segundo laeng ti baet,  nagbalin ti isem nga ulimek nga umbi.  Napukaw ti isem, napukaw ti namnama, napukaw ti arapaap.  Napukaw ti pagilian ti maysa a parsua nga iti panagdakkelna ket maysanto nga asset ti daga a nakayanakanna.

Apay a nasakripisio isuna iti tradision ti kinamaag?  Apay a nagbalin a tradision ditoy pagiliantayo ti panagpaputok ti paltog tunggal baro a tawen.  Daytoy kadi ket ritual dagiti parsua a  ti panaggagatel ti imada ti relihionda.

Sayang?  Piman.  Maysa manen nga ubing ti natay.  Kas pannakatay dagiti inosente nga ubbing iti Sandy Hook Elementary idiay Newtown, Connecticut.  Kas iti pannakatay dagiti namnama ken arapaap tunggal maysa a kerubin a mangrugrugi pay laeng a mangapresiar iti lubong a makitkitada.

Adu ti natignay ti pusona iti napasamak kaniana.  Iti facebook ken twitter, adu ti nagsangit. Adu ti nangkondenar iti di nabigbig a suspek.  Adu ti natignay iti arapaapna. Maysa nga ubing a nalaing nga ag-drawing.  Mangipakita iti nasariwawek iti panunotna.  Maysa nga ubing nga aglaglagto laeng iti dayta a gundaway a kas kadagiti dadduma pay a padana nga ubbing nga agragragsak iti baro a tawen.

Anian, kayatna ti agpaubba ken ni Aquilino nga amana.  Ngem agsipud ta adda ni adingna, saan a napatgan ni tatangna.

Maysa laeng isuna kadagiti dadduma pay a biktima ti naiwawa a bala ken paputok iti panangpalubos iti tawen 2012. National Capital Region ti kaadduan dagiti biktima ta 398 dagiti naireport a kaso, maikadua ti Ilocos Region nga agdagup iti 59 a kaso ken maikatlo ti Western Visayas a 51 dagiti biktima.  Iti pakabuklan, agdagup iti 183 wenno 27 a porsiento dagiti ubbing nga agtawen 10 nga agpababa.  Kadagitoy a biktima, 20 ti gapu iti naiwawa a bala, kas kuna ti DOH nupay 41 ti bilangda iti biang ti PNP.  Dua ti natay iti bala, pakairamanan ti 4 anios a ni Ranjilo Nemer iti Mandaluyong.

Madi koma a panunoten a naisakripisio ni Nicole tapno laeng manen mariing ti sangkapagilian iti dakes nga epekto ti panagpaputok iti paltog a nagbalinen a tradision tunggal baro a tawen.  Wenno tapno mariing ti gobierno iti panangrepaso iti paglintegan ti pyrotechnic law.  Wenno tapno mariing ti polisia iti nainget a panangipakat ken responsibilidad kontra kadagiti tao a nagatel ti imana.

Ti laengen maikararagtayo:  sapay koma ta iti sumaruno a tawen, awanen ti inosente nga ubbing, ken amin a tattao, a mabiktima iti astray bullet.  Karaman iti kararagtayo iti pannakipagladingitstayo iti pamilia a naulila iti awan kaes-eskanna a wagas.

Sapay koma ta agbalin nga anghel ni Nicole a mangbantayto kadagiti amin nga ubbing tapno awanen ti mabiktima pay iti bala ti paltog iti baro a tawen.

Agyamankami, Nicole, iti isemmo iti ladawan nga imbatim kadakami itoy a baro a tawen.#