Night franchise ti traysikel, implementasion problema

VIGAN CITY – Implementasion ti makita ni Konsehal Juan Carlo Medina a problema no maaprobaran ti resolusion a maikkan dagiti traysikel nga agpaspasada iti rabii iti night franchise.

Kas sagudayen ti resolusion nga impila ni Konsehal Marquisse Kisses Agdamag, maikkan iti night franchise dagiti traysikelan nga agpaspasada iti rabii a kaadduanna a kolorum ken awan numeroda.

Kangrunaan a panggep ti nasao a resolusion ti pannakasaluad dagiti residente ditoy siudad nga aglugan kadagiti traysikel no kagapgapuda a nagbiahe, nangruna iti rabii.

Nupay kasta, limitado laeng ti prangkisa a maited nga agdagup laeng iti 50.

Ngem kinuna ni Medina a problema ti implementasion ti nasao a resolusion agsipud ta limitado ti bilang dagiti traffic enforcers.

Kinuna ni Medina a narigat a mamonitor no dagiti laeng maikkanto iti night franchise ti agpasada iti rabii agsipud ta agkurang dagiti traffic aide nga agduty iti rabii.

Nadakamat ni Medina nga adda idi naidatag a night franchise para kadagiti traysikel nga agpaspasada iti rabii ngem saan a pimmasa iti konseho.#