NLPSC, sinelebraranna Foundation Day

CANDON CITY – Rinambakan ti North Luzon Philippines State College (NLPSC) ti Founder’s Day ken Recognition Day kas kabarbaro a pagadalan ti kolehio iti pagilian itay Hunio 15.

Kangrunaan a bisita ni sigud a House Deputy Speaker Eric Singson nga isu ti nangilungalong iti Kongreso ti pannakaipatakder ti pagadalan ken pannakabaliw ti nagan ken administrasionna.

Indauluan ni Dr. Caridad Abuan, agdama a regional director ti Commission on Higher Education (CHED) ken OIC ti pagadalan dagiti faculty and staff ken dagiti estudiante dagiti aktibidad a pakairamanan ti panagmula kadagiti agbunga a kaykayo iti compound ti pagadalan sa naisaruno ti misa ken programa iti NLPSC gym.

Sakbay a nagwayas a kolehio,  naawagan ti pagadalan a University of Northern Philippines-Candon Branch.

Dimmakkel iti 2,000 ti enrollees ti NLPSC ita a tawen manipud iti 1,700 idi napan a tawen.#