No. 1 most wanted person iti Ilocos Sur, naaresto

CANDON CITY – Natnag iti ima dagiti pannakabagi ti linteg ti maysa a kameng ti grupo dagiti gun for hire ken agisaysayangkat kadagiti krimen ditoy probinsia idi Agosto 5.

Inaresto dagiti nagtipon nga elemento ti Regional Intelligence Division (RID) iti babaen ni Police Supt. Julius Suriben ken direkta a superbision ni Police Senior Supt. Mariano Luis Versoza, Chief RID, ken ti Candon police nga indauluan ni Police Supt. Marlo A. Castillo ni Wilfredo Tolentino y Galapate, 40, alias “Opling”, ken residente iti Barangay Tamurong 2nd,  idi agarup alas 10:00 ti aldaw ti Agosto 5 iti Barangay Villarica, ditoy siudad a nagpaingan ti suspek.

Sumangsango ni Tolentino iti tallo a kaso ditoy siudad a pakaibilangan ti murder with serious physical injuries ken multiple less serious injuries a nai-docket iti babaen ti CC No. 2674-C, panagrames a nai-docket iti CC No. 2469-C, ken attempted homicide a nai-docket iti babaen ti CC No. 4820-4822.

Inyisio ni Judge Policarpio P. Martinez ti Regional Trial Court Branch 71, Candon City ti warrant of arrest mainaig iti kaso a murder maikontra ken ni Tolentino idinto a ni Judge Modesto L. Quismorio ti MTCC Candon City ti nangiyisio iti warrant of arrest mainaig iti kaso daytoy a panagrames.

Saan a makapagpiansa ni Tolentino iti kasona a murder ken rape idinto a P60,000 ti naituding a piansana iti kasona a homicide.

Balligi a naisayangkat dagiti polis ti pannakaaresto ni Tolentino babaen ti tip a naggapu iti maysa a Barangay Intelligence Network asset a naammuan laeng iti birngas a Santino.

Segun iti polis, ni Tolentino ti maysa kadagiti puntiria ti RID PRO1 COPLAN “MATADOR” kas miembro ti Rapada-Alviento-Maala Group, maysa a grupo a gun-for-hire ken agisaysayangkat kadagiti krimen iti rehion.

Naipaiman ti suspek iti kustodia ti polis ditoy para iti dokumentasion ken disposision.#