No. 10 iti drug target list, natnag iti buy bust operation

SANTA, Ilocos Sur – Dua pay a drug pusher ti natnag iti ima ti linteg babaen iti buy bust operation a naipakat iti ili ti Santa ken Sta. Lucia idi Hunio 29 ken 30.

Inaresto dagiti polis da Clarence Baldonado y Tolentino, 28, residente iti Barangay Marcos District, ditoy nga ili, ken ni Ricky Hermusora y Fortuna, 47, residente iti Barangay Burgos, Sta. Lucia kalpasan a nagpositibo ti resulta ti drug bust operation nga inwayatda maikontra kadagiti suspek.

Malaksid iti plastic sachet a naglaon iti mapapati a shabu a ginatang ni PO1 Benjamin Pascua, Jr. a nagpammarang a poseur-buyer ken ni Baldonado, nakasamsam pay dagiti polis kenkuana iti narolio nga aluminum foil ken ti dua a sag- P500.00 a marked money a nausar iti transaksion.

Naala met iti ikut ni Hermusora, No. 10 iti municipal drug target list iti Sta. Lucia, iti dua a plastic sachet a naglaon iti mapapati a shabu, ken P500.00 a nausar a buy bust money.

Napilaan ni Baldonado iti panaglabsing iti Section 15 ti RA 9165 ket nai-docket daytoy iti babaen ti Criminal Case No. 3966-N ken nairekomenda nga agpiansa iti P60,000.00 para iti temporario a wayawayana.

Naiyendorso metten ti kaso a panaglabsing iti Section 5, 11 ken 15 ti Article II ti RA 9165 maikontra ken ni Hermosura iti Candon Prosecutor’s Office.#