Footer

No ababat nagan, adayot pakariribukan (Maudi a Paset)

Parikut ti Department of Education (DepEd) ti atiddog a nagan. Idi, saan a kiddawen dagiti titser ti certificate of live birth (birth certificate) dagiti   ubbing nga agenrol iti elementaria ngem gapu iti kinaadu ti agpasukat iti nagan ti ubing inton agturpos a pakadadaelan met ngarud dagiti dokumento a publiko ti DepEd, kiddawen itan dagiti titser daytoy a sertipiko no sumrek ti ubing nga agbasa iti Gred I.

"Siak pay ket ti makabasolen, ading," reklamo ti ininterbiok a titser ti gred wan a dina kayat ti mainaganan, "no apay kano a diak insurat a kumpleto ti nagan ti anakna  idinto ta idi inyenrolda ti anakda, ti laeng dua a nagan ti insuratda.

Maysa a pampubliko a dokumento ti rekord ti DepEd. Saan a mabalin a doktoren, isnopikan, sapitan, wenno nayonan. Panaglabsing iti linteg daytoy.

Maysa pay a pagparikutan ti ispeling dagiti nakaat-atiddog a nagan. Ayna, addanto pay napanaganan iti Maryella Krizzelionne Kriztofer Jozzabelle. Maysa laeng a  panagbiddut iti isurat a letra, dakkel a parikuten ti makinnagan.

Kas ti nagan daydiay inanakmi iti buniag,  agpinnabasol dagiti agassawa no ania ti rumbeng a masurot: Aprilinne wenno Aprilyn? Ti babai ti mangipappapilit iti immuna. Irikiar met ti lalaki ti naudi. Agenrolen ti inanakmi iti buniag iti Day Care Center ket rugianen dagiti dadakkelna a sursuruan ti anak nga agsurat. No ni babai ti mangisuro, isurona ti Aprilinne. No ni met lalaki ti mangisuro nga agsurat ti anak, usarenna   met ti Aprilyn. Pagangayanna, naulawen ti anak. Dinan kayat ti agsursuro pay nga agsurat.

Insingasingmi a mapanda mangala iti certificate of live birth iti National Statistics Office (NSO) wenno iti opisina ti civil registrar. Sinurotda ti balakadko. Natakuatanda laengen a Baby Girl Abrilyn ti nakarehistro a nagan ti anakda. Ania  pay nay, tuloy latta ti pinnabasol! Nadakamat pay a nagbiddut ti nurse a nangisurat iti nagan ti ubing idi naganak ti ina idiay ospital.

Sabali pay a pagparikutan ti kaadda iti prefix a Baby Girl, Baby Boy, Honey Girl, Honey Boy ken dadduma pay.  Kadagiti dadduma (saan amin) nga addaan iti prefix a kakastoy,   dida  ikabkabil dayta kadagiti dokumento a pirpirmaanda. Nalabit nga iti panunotda, apay a Baby Boy wenno Baby Girl ti isuratda idinto a saandan a baby, agtawenda metten iti nalabes a duapulo wenno tinedierda metten. Wenno adda payen  apokoda iti tumeng. Ngem biddut daytoy! Lalo kadagiti dokumentado a papeles a kas iti eskuelaan ken iti trabaho. Iti trabahom, saan a mabalin a dimo ikabil dayta Baby Boy wenno Girl iti Social Security System, PhilHealth ken dadduma pay a rekordmo ta inton kamatem ti benepisiom, pagalaendaka pay nga umuna iti birth certificate ket no awan a naikabilmo, kuestionarandanto dagiti papelesmo. Dimtengen ti indulto!

Maysa pay a  pagparikutan ti panagaramat iti Ma. ken Maria. Santo pay la sumapit dayta Marya. No ania ngamin ti pudno a nakasurat idi inrehistro ti anak, no Ma. wenno Maria wenno Marya, daytoy koma ti masurot.  Daydiay klasmetko idi, Marita ti isursuratna a naganna. Gayam,  Maria Rita ti pudno a naganna. Nagparikut isuna.

Ti panagaramat iti letra "H" ti nagparikutan pay dagiti dadduma.    Adda idi  panawen a nagbalin nga uso  ti kinaadda ti letter "H" iti nagan, kas iti Bhenjamin, Jhonathan, Mhelinda, Bhelinda ken dadduma pay. Idi saanen nga uso, naitinnag dayta letra "H",  maisupadin iti rekord ket  kapilitan a nagpetision ti akinnagan iti korte tapno maiyannurot ti naganna iti rekord.

Fashion. Trend iti panagpili iti nagan. Naaayat la unay ni Pinoy nga agtutulad ken sumurot iti makunkuna a fashion iti saan nga  umno a panagaramat iti nagan.  Dakkel a biddut dayta.

Manon dagiti special proceedings kadagiti regional trial courts gapu kadagiti petision iti pannakasukat wenno pannakabaliw iti nagan wenno pannakasukat iti first name nga ar-aramaten ti nagpetision  tapno maipasurot iti rekord iti opisina ti civil registrar a rumrummuar iti linawas ditoy TAWID NEWS MAGASIN? Saan nga ab-ababa iti 500 iti tinawen wenno addaanen iti saan a nakurkurang ngem 5,400 a court proceedings sipud pay naipasngay ti Tawid! Kastoy ti kaaduna.

Ania ti pagdumaan ni Fe Ty ken ni Perceverandine Antoinette Chrysanthemum   Magnolia de los Concepcion  Buenaventura wenno ni  Maryella Krizzelionne Kriztofer Jozzabelle Batungbakal? What’s in a long name a kunada?#