No agmulaka iti ayat

ITAY laeng nabiit, inkeddeng ti Sandiganbayan a nakabasol iti plunder ni napadisi a Presidente Joseph Estrada ket sinentensiaanna a mabalud.

Arig di pay nagmawmaw ti arimbangaw a pinarnuay ti pannakasentensiana (umuna a gundaway iti pakasaritaan ti pagilian), adtoyen dagiti tignay nga ikkan ti Malakaniang ni Estrada iti pardon.

Idi damo, ipetpetteng ni Estrada a saan nga umannugot iti pardon ta segun iti daytoy, no inawatnan ti pardon, kaawatan nga akuennan nga adda kinapudnona dagiti naipabpabasol kenkuana.

Kinuna pay ni Estrada a no awatenna man ti itangtanggaya ti Malakaniang, daytay absolute pardon, kayatna a sawen, nga awan dagiti kondision iti pannakapardonna kas iti panangannugotna kadagiti naipabpabasol kenkuana.

Iti kaudian, imparipirip ni Estrada a kayatnan nga awaten ti itangtanggaya ti Malakaniang a pardon. No matuloy daytoy, posible a rummuar a siwayawaya a tao iti isasangbay ti Paskua.

Rason dagiti mangipagpagna iti pannakapardon ni Estrada ti nabayag metten a pannakaibaludna, no maibilang a pannakaibalud ti panaggianna iti resthousena iti Tanay, iti innem a tawen bayat ti pannakausig ti kasona, lumakayen ken maikkan koma iti respeto ti posision nga iniggamanna sakbay ti pannakausigna iti plunder.

Ngem dakamatenmi ditoy ti kaso ti maysa a kahero iti maysa a munisipio a nakedngan a mabalud iti naunday a panawen gapu laeng ti pannakakaudna iti nakurang a P20,000 iti kaha.

Sabali laeng ti nadagsen a pannakasentensia ti maysa nga empleado a nagkakaso gapu ta natiliwan a pinasuksokan ti maysa nga addaan iti kaso tapno maitantan ti pannakausigna iti korte.

Kadagiti nadakamat a kaso iti ngato, ribu laeng ti nagbasolanda. Iti kaso ni Estrada, ginasut a milion. No ar-arigen, siping laeng ti kaibatogan ti imbolsa dagiti dua nga ordinario nga empleado no maidilig iti impisok ni Estrada kadagiti bangkona a mapapati a napataud babaen ti panangaramatna iti puestona.

No bilang maited a sigida ti pardon ken ni Estrada kalpasan ti pannakasentensiana, ipaduyakyakna ti kaadda iti dua a klase ti hustisia iti pagilian: maysa para kadagiti marigrigat ken nababa ken sabali para kadagiti babaknang ken nabileg.

No kastoy laeng ti mapaspasamak, saan a makaited iti pagmennamennaan ti pannakasentensia ti maysa a nangato nga opisial ti turay a kas ken ni Estrada. Ad-adda laeng a mapatured dagiti dadakkel nga ikan nga agaramid iti maikaniwas agsipud ta arigna laeng masipatda iti dakulap no maidarum ken makednganda a nakabasol iti korte.

Ngem iti panirigan dagiti dadduma, adda naun-uneg a rason no apay nga itangtanggaya ti Malakaniang iti pardon ni Estrada. Tallo laengen a tawen ti panagindeg ni Pres. Arroyo iti Malakaniang. Kalpasan dayta, posible a maipilaan met iti plunder a kas ken ni Estrada.

Posible nga agmulmula iti ayat ti Malakaniang tapno agapitto met iti ayat inton adda iti situasion a sangsanguen ni Estrada.#