sinursuran-banner-sqSinursuranNi Jobert M. Pacnis

No ania la unay ti ikarkarona (Maudi a paset)

Gapu ta saan met laengen a malpas nga agpadpadalus ti prinsipalda, rimmuar ket pinayapayanna dagiti dadduma nga ubbing. Intundana dagitoy a nagdalus iti likud ti office ta adu manen ti nagtinnag a bulong ti bittaog ken lugo.

Idi malmalpasdan, binagaanna dagiti ubbingna nga ibellengdan dagiti nadalusanda ta mapan bassit iti kantina iti nagbaetan ti old ken new site. Napan dimmawat iti napudot a danum dita ta pangipisokanna iti bulong ti serpentina a naalana iti mulana iti bakrang ti office. Kellaat ngamin a simmakit ti tianna.

Apagisu a mainumna idi ti serpentina idi dimteng ti kamaestroanna. Nagpatpatangda bassit. Pagammuan, simmungad ti prinsipalda. Diniretsona ti guardia iti asidegda ket sinaludsodna ditoy no ania kano ti ob-obraenda iti kantin.

Inyal-aludoyda metten iti kamaestroanna ti nagturong iti office. Isu met nga agsasangpet dagiti kakaduada ta nalpasen ti maudi a period iti malem. Idi kuan, addan ti prinsipalda. Permi metten ti panagsasao daytoy.

“Diyo pay mabantayan dagiti ubbingyo no agpadaluskayo! Kasano ngarud nga agtrabahoda no kasta ket adda dita a sabali ti ob-obraenyo!” kunana metten.

Ammona lattan nga isu ti pangpangngegan ti prinsipalda. Ngem apay, isu kadi ti nagpadalus? Nalawagen ti patanganda kadagiti ubbingna nga agklaseda koma iti dayta nga oras. Ken no dayta di binantayan, saanna laeng a nakita ti kaaddana a nangmando kadagiti ubbingna.

Ti dakes nga imbunga dayta, inyetnag ti boss-da nga awan ti agawid, ubbing man wenno titser, agingga a di nagalas singko. Ken awan ti agtalinaed iti office no nalpasen ti maudi a klase. Mapanda a mannursuro kadagiti kuartoda tapno agpadalusda. Ti mabati nga oras, agklaseda kano iti maipanggep iti disiplina.

Manipud pay idin, nagbalinen a nagares ti pannakisarsarita (a nasurat ditoyen) ti prinsipalda. Saannan a tungtungpalen ti ibagbagana iti miting. Kaudian ditoy ti saona a dinan serkan ti klase tapno agobserbar. Tapno saan pay nga isu nga stress dagiti mannursurona! Umanay kanon kenkuana ti ilalabasna kadagiti kuarto.

Ngem saan a kasta ti napasamak sipud iti dayta a panagpungtotna. Gapu ta sango ti office ti yanda, nayuna ti kuartoda (dua a seksion) a grade level a kellaat a binantayan ti prinsipalda. Ngem nagtakder laeng daytoy iti nagbaetan dagiti dua a ridaw. Nagsuratsurat iti iggemna a papel kabayatan ti panagsiripsiripna iti agsumbangir a kuarto.

Kalpasan a nakaklase, ken rimmuaren iti kuartoda, nagturongen iti office. Sinerrek met a dagus ti prinsipal ti pinanawanna a kuarto. (Naammuanna idi agangay, imbaga dagiti ubbingna, nga imbaskag kano ti prinsipal kadagiti ubbingna dagiti negatibo a naobserbarna iti panagklasena.)

Kamalman dayta, napaayaban iti office ti kaduana nga adbayser. Post conference gayamen. Sa nayaramidan iti COT wenno Classroom Observation Tool (a masapul ti tunggal mannursuro iti panagaramidna iti RPMS iti panagtunged ti klase) ti nasao nga adbayser.

Ninamnamana a maisaruno metten a ma-post conference. Ngem awan ti kasta a napasamak!

Kalpasan ti maysa nga aldaw, imbilin ti prinsipalda nga ilistada ti oras kayatda ti ma-observe para iti COT. Nangted daytoy iti papel a pagisuratan.

Inkeddengna a saan nga agsurat ta mangnamnama a ma-post conference-to met laeng. Ta no saan nga observation daydiay napasamak kenkuana, saan koma a nayaramidan iti COT ti kaduana nga adbayser. Ken awan ti karbengan ti prinsipal nga agibaga kadagiti ubbingna kadagiti negatibo a naobserbarna idi agisursuro. Sangkakuna idi dagiti nagkauna a prinsipalna a dagiti maobserbar iti maysa a mannursuro, masapul nga iti laeng nagbaetan ti prinsipal ken ti titser. Pagpatanganda ti amin tapno agdur-as ti titser. Saan a dayta itsismis kadagiti ubbing pay met!

Ngem na-post conference met laengen amin a nagisurat iti iskediulda a maobserbar iti dayta a lawas, saan met laengen a ma-post conference. Damagenna la koma no observation daydi napasamak a panagtalinaed ti prinsipalda iti nagbaetan dagiti ridaw ngem naalana ti nagbain. Apay, sinerkak kadi ti klasem tapno ibagam nga observation? amangan no kunaen daytoy kenkuana.

Sumaruno a lawas, adda pay dua a nagpaiskediul iti dayta a Lunes. Uppatdanto laengen a di pay na-observe.

Idi nalpas ti prinsipalda ti inobserbarna iti dayta nga agsapa (ta iti ala una ti maikadua), kinuna daytoy a sumrekto lattan iti klase dagiti makursonadaanna kalpasan ti maudi a nagpaiskediul.

Medio nagparikna kenkuana a kasla daytoy ti kayat a serkan lattan ti klasena. Ta dagiti tallo a kaduana a di pay na-observe, nakimiting idiay munisipio ti maysa. Dagiti met dua, iti Mierkoles (a naipa-Huebes ta adda dar-ayan a miting ti prinsipalda) ti nayunan nga iskediulda. Awan klase iti dayta a Martes ta anibersario ti EDSA.

Nupay kasta, kinunkunana a saan ngata met ta mamati pay laeng nga observation ti napasamak iti kallabes. Ta nayaramidan met iti COT ti kaabayna iti kuarto idinto a dina met sinerkan!

Ngem anian ta idi agklasklase iti alas dos iti malem, kellaat lattan a simrek ti prinsipalda. Naimbag laeng ta major-na ti klase nga isursurona. Dayta laeng ta saan a ti isagsaganaanna iti husto a klasena iti sumuno a lawas ti naobserbar kenkuana.

Iti dagupda a mannursuro, isu laeng manen ti naobserbar nga awan iti iskediul. No ania la unay ti ikarkarona, a!

Ngem paset met ketdi dayta ti sistema. Kuna ngarud dagiti nataengan nga ad-adda a matenneb ti maysa a patadem no agdalan iti pudot ti apuy.  ●