Sinursuran: No ania la unay ti ikarkarona (Umuna a paset) | Tawid News Magazine - Weekly Ilocos News 📰
sinursuran-banner-sqSinursuranNi Jobert M. Pacnis

No ania la unay ti ikarkarona (Umuna a paset)

IDI apagserrekna a kas adipen ti tisa, malagipna la unay ita, adda nadanonna nga istoria a kapadasan ti kaduada. Nagbalin kano nga adipen ti dati a pangulo ti pagadalan. Adipen a kasla saan a mannursuro ti pannakatratona.

No apay a kasta, gapu kano ta nangato unay ti panagkitana iti bagina daydi a daulo. Adda dita a baonenna ti mannursurona a mangkadua kenkuana iti seminar. Ti akem ti mannursuro? Para iggem kadagiti nakahanger a badona iti uneg ti luganna. Ken mangkita iti masapsapulna agingga a malpas ti seminar. Ti la kano pay maibabaonna nga awan pakainaigan iti kinamannursuro ti maysa a titser.

Ti nareklamo wenno kunaentayo nga adda maibagana iti yetnagna a pammilin, agbalin kano laeng a nakakaasi. Kas iti namay-anna iti maysa pay a mannursurona. Simmarungkar kano idi ti superbisor iti pagadalan tapno obserbarenna dagiti titser iti panagisuroda.

Ti napasamak, inlemmeng dayta a daulo ti lesson plan (saan pay a Daily Lesson Log ti awag idi) ti kagurgurana a titserna. Sa daytoy ti intudona nga obserbaren ti superbisor. Piman, naibabain ti mannursuro ta idi paala ti superbisor ti lesson plan-na, awan metten iti office a pagidisdissuanda nga agkakadua. Permi a nagkalimduosan a nagsapsapul. Ngem awan ta awan!

Naibabain iti husto ta nagparang a saan nga agisagsagana iti leksionna. Nupay impettengna a nagipasa iti lesson plan, awan met ti maipakitana a pammaneknek.

Kinutkutiman lattan ti nasao a mannursuro ti pannakapabainna.

Agingga a rimmuar lattan ti lesson plan-na kalpasan ti sumagmamano nga aldaw. Masinunuo ti mannursuro a saan a sinabotahe dagiti kakaduana ta awan pay sangapulo ti bilangda ket aggagayyemda amin. Agkakabaddungalanda ta isuda ngarud ti immuna a batch dagiti mannursuro sipud naluktan dayta bassit a pagadalan a pagisuruanda.

Ammo lattan ti nasao a mannursuro nga aramid ti prinsipalda ti amin. Daytoy ti maysa a nangiduron kenkuana tapno umakar laengen.

Malagipna ita dagita nga istoria ta kasla mapaspasamak metten kenkuana. Iti lagipna, maikasiam itan a boss-na ti agdama sipud nagbalin nga adipen ti tisa. Ket makunana nga adu ti nasursurona kadagiti immun-una a prinsipalna.

A pakaidumaan ti agdama!

Dina ammo no ania la unayen ti ikarkarona iti dauloda. Nadagsen ti dara daytoy kenkuana, dayta la unay ti nadlawna idinto a sumagmamano a bulanna pay laeng kadakuada.

No simpuonenna, awan met ti ammona a mabalin a nadagsen koma a naaramidna. Ti ketdi atapenna, dagiti adbayseranna ti makagapu. Iti laeng sango ti office ti kuartoda. Gapu itoy, kanayon a makitkita ti prinsipalda ti kababalin dagiti ubbingna. Kas koma no naariwawada iti kaawan pay laeng ti titserda. Wenno ti pannakaladawda a sumrek. Aglalo ket isuda laeng a grade level ti adda old site. Aminen a level, iti new site. Di kad isuda lattan ti kasla pakaitaltalimudokan ti imatang ti boss-da.

Ngem saanda met laeng ti kasta. Nakarkaro pay dagiti adda iti new site (iti solar iti ballasiw ti kalsada iti sango). Kanayonna met a bagaan dagiti ubbingna ngem gagangay sa itan dagiti ubbing ti kinagaraw, kinasutil, kinapilio ken papaanawa. Dida met maliklikan ti maladaw no dadduma ta agdammangda pay iti karayan sa aglugandanto manen iti traysikel iti iseserrekda iti pagadalan. No saanda pay a makamakam dagiti agbiahe a traysikel, kapilitan a magmagnadan a sumrek.

Atapenna pay no apay a kasta la unayen ti kinadagsen ti rikna ti boss-da ti awanen a nabatbati a disenio ti kuartoda. Ta kalpasan a dinadael ti nepnep a naglabas, saandan a binaliwan ta apagisu a naibaga kadakuada idi a mayalisda iti kuarto (iti new site). Mismo a ti agdama a boss-da ti nagkuna idi agmakabulan pay laeng daytoy iti pagadalan.

Inur-urayda dayta a mapasamak ngem awan met laengen ti pammilin. Isu pay ti namkuatanda a saandan nga impatuloy ti agpaerkon iti kuarto (ta addan nasolisit kadagiti am-ammoda— saan a nagpakontribusion ta baka no madaksan).

Siguro, inatap pay ti prinsipalda a dina ammo ti tumulong kadagiti trabaho iti pagadalan. Pagarigan daydi aldaw nga awan ti klasena. Innalana ti buneng a sangkaitugotna ket nag-trim iti masetas iti aglawlaw ti office kalpasan a namulaanna iti kammotit ti plantbox nga area-da kadagiti ubbingna. Napan idi ti prinsipalda iti new site.

Idi malpasna ti obrana, intugawna iti sango ti office-da. Dagiti na-trim-na, sinaruno nga inakup ti janitress-da. Iti dayta met a kanito a dimteng ti prinsipalda. Inggiya daytoy ti agak-akup iti aramidenna kadagiti mabalin pay a patubuen a sanga dagiti masetas.

Dita a nadlawanna a sangkakita ti prinsipal. Ken kasla agtantanamitim pay. Ipagpagarup siguro daytoy a dina ammo ti tumulong? Nga agtaktakder laeng nga agbuybuya? Impatona nga inobra ngata amin ti janitress dagiti na-trim-an ta adda pay iggem daytoy a buneng. Wen, timmulong met bassit daytoy a nagpaad kadagiti mula idi makita daytoy a nangyuna iti trabaho.

Iti maysa nga agsapa, binagaanna dagiti ubbingna nga iti Ground Improvement-da iti malem, usarenna pay laeng nga agklase tapno masulnitan ti aldaw a dida nakapagklase gapu iti napalabas a programa. Pagdaksanna, iti panaggapuna iti new site a nagklase iti dayta a malem, agdaldalusen dagiti ubbingna a nadanonna iti old site. Nakitana ti prinsipalda a mangbabaon kadagitoy.

Ti ammona, apagbiitda laeng. Isu nga intugawna pay laeng iti office numona ket nagsaruno ti klasena. Maikatlo koma iti room-na. Kinapudnona, adda payen ubbingna a nangayab kenkuana tapno agklaseda. Ngem imbagana a di mabalin ta adda ti prinsipalda a mangbabaon kadakuada.

(ADDA TULOYNA)