No apay a siitan ti bunga ni Guayabano (Umuna a paset)

SAAN laeng a da Anangka, Durian, Rimas, ken Pakak dagiti prutas a burtongan wenno simmiit dagiti bagida iti sibubukel a Kayolandia. Kasta met ni Guayabano.

Ngem ti pakaidumaan ni Guayabano, addayo ken naluklukneng dagiti siit iti bungana. Aglalo no natangkenanen. Pagilasinan a dandanin maluom.

Nakasilsilap pay ti kudil ti bungana no naluomen. Makaguyugoy a saramsamen.

No apay a kasta, maysa nga istoria a namsek met iti adal.

DATI a nalinis wenno nadalus ti bunga ni Guayabano. Kasla sukog ti bunga ni Mangga. Laeng, dakdakkel bassit.

Kaabay ti pagnaedan ni Guayabano da Durian, Anangka, Rimas ken Pakak. Nagtengngaanda pay ketdi.

Iti daya, ni Rimas.

Iti laud, ni Pakak.

Iti amianan, ni Anangka.

Ken iti abagatan, ni Durian.

Aminda, addada iti laud a paset ti Kayolandia.

Naragsak met pay la idi damo ni Guayabano iti naedna. Nabaknang ti daga a nagtakderanna. Saanna a parikut ti taraonna.

Idi bassit pay laeng ni Guayabano, igiggigir ni Rimas iti sobra a pudot no agtangkayag ni Apo Init. Linlinonganna kadagiti sangana.

No nagligsayen ni Apo Init, ni met Pakak ti mangsalsallukob kenkuana.

No dumteng ti amian, apagisu laeng ti mangay-ayam ken ni Guayabano. Di ipalubos ni Anangka ti napigsa nga angin a mabalin a mangtukkol kenkuana.

No met agabagat, adda dita ni Durian a manglinged ken ni Guayabano.

Permi a yamyaman ni Guayabano kada Rimas, Pakak, Anangka ken Durian.

Ngem nagbaliw ti amin idi agbungan dagiti kaarrubana. Ket idaydayaw dagiti tao a makaraman kadagiti naimas a bungada.

Nagbalinda a nalastog.

“Siak ti kaimasan iti bunga,” ilanglangsot ni Durian.

“Wen, a, ngem nagbuyokka met,” inlibbi ni Anangka. “Idinto a siak, nagsam-it dagiti bungak. Nabangloda pay.”

“Saan man a nasam-it dagiti bungak, naimasda met a malinubian,” kinuna met ni Rimas.

“Siak,” saan met a nagpaudi ni Pakak, “kas met laeng ken Rimas a di nasam-it ti bungana. Ngem naimas met a masida aglalo no mapiggotan.”

“Uray siak, mabalin met a mapiggotan no naganus pay,” inyallawat a dagus ni Anangka. “Kilnatenda pay a kilawen, a!”

Mapangpangilangil latta no kuan ni Guayabano.

“Sika, Guayabano, kasano met ti bungam?” maysanmaysa a saludsodda kenkuana.

“Saanko pay a masinunuo, gagayyemko, ida,” kinuna ni Guayabano a sipapakumbaba. “Saanak met pay a nagbunga.”

“Agbungaka ngata?” impaggaak ni Pakak.

Nakipagkatkatawa met da Durian, Anangka ken Rimas.

Nasair ti rikna ni Guayabano. Ngem saan lattan a nagun-uni.

Sakbay nga iridep ni Guayabano, sangkakiddawna ken ni Prutasilang a diosa dagiti kayo a maaddaanto koma met iti bunga. Iti kasta, adunto met a tattao ti maay-ayo kenkuana. Ken makatulong kadakuada a mangted iti enerhia a kasapulanda iti inaldaw.

(ADDA TULOYNA)