Footer

No collection of school fees, inulit nga imbilin ti DepEd Superintendent

BANTAY, Ilocos Sur – Inulit nga imbilin ni DepEd Provincial Schools Superintendent Rogelio Galat a tungpalen koma dagiti mangisursuro ti pammilin ti sekretario ti DepEd nga awan ti kolektaenda a kuarta iti panaglulukat dagiti klase.

Daytoy ti imbatad ni Galat kas reaksionna kadagiti maidanon kenkuana a report a kaadda dagiti pagadalan a mapapati a nagkolekta iti kontribusion kadagiti agbasbasa iti pagadalan publiko iti probinsia.

“Imbagak kadagiti mangisursuro a masapul a surotenmi a nainget ti DepEd order mainaig iti no collection of fees policy,” kinuna ti superintendente idinto imballaagna kadagiti mamaestra a “…pangaasida ta isardengda ta maikontra dayta iti linteg, no saan, mangipilakami iti maitutop nga administrative sanction iti asinoman a maduktalan a naglabsing iti pammilin.”

Kinuna ni Galat nga ipatungpalna a nainget daytoy a banag agsipud ta “uray ti Sekretario (DepEd) ken ti regional director ket naistriktoda iti implementasion iti daytoy a pammilin.”

Segun ken ni Galat, naannayas ti panaglulukat dagiti klase ditoy probinsia itay Hunio 10 nupay adda dagiti tinawen a problema a sangsanguen ti ahensia nga idauluanna kas dagiti matarimaan a pasdek-pagadalan, teacher’s items ken libro.

“Everything is going alright, except dagiti perennial problems kas iti ma-repair nga school building…, teachers’ items ken delivery of so many volumes of textbooks,” kinuna ni Galat.

Nupay kasta, adda limtuad a problema iti Cabugao North Central School gapu iti mapapati a singasing ti district supervisor a pannakaiyalis iti sabali a pagadalan dagiti nakaenrolen nga ubbing nga agnaed kadagiti barangay iti ruar ti poblasion agsipud ta agsobran ti bilang dagiti agbasa iti nasao a pagadalan.

Nagturong a mismo ni Galat iti nasao a pagadalan tapno ammuenna a mismo ti situasion ken marisutna ti risiris iti nagbaetan ti prinsipal ken ti district supervisor mainaig iti enrolment ditoy a pagadalan.

Iti met DepEd Vigan City Schools Division, naammuan ken ni Vigan Central School Principal Catalina F. Lagasca, ken ni Burgos Memorial School East Principal Josefina de Vera nga awan ti ania a problemada iti panaglulukat dagiti klase iti pagadalanda.

Kinuna ni Lagasca nga inyunay-unayna a saan nga agkolekta dagiti mangisursuro iti babaenna iti aniaman a kontribusion iti panaglukat dagiti klase kas panangtungpal iti pammilin manipud iti turayenda iti DepEd.

Impalgak met ni de Vera a ngimmato ti enrolment ti BMSE iti 347 pupils manipud iti 327 ket namnamaenna a manayonan pay ta adda dagiti maladaw nga agpa-enrol.

Impalgak pay ni de Vera a mangted ti Vigan City government babaen ken ni Mayor Eva Marie S. Medina iti shampoo ken sugod nga aramaten dagiti ubbing a pangikkat iti kutoda.#