No lunch break policy naideklara

CABUGAO, Ilocos Su r – Dua ti policy nga indeklara ti liderato ditoy nga ili itay nabiit: ti no lunch break policy ken ti pannakaited ti espesial nga assistance kadagiti senior citizens.

Kanaig daytoy, nagyaman ni Mayor Edgardo S. Cobangbang, Jr. kadagiti frontliners nga agserserbi iti munisipio  gapu iti pannakikooperarda iti daytoy a baro a polisia ti gobierno munisipal.

Kinuna ni Cobangbang nga agsisinnublat dagiti empleado kadagiti nadumaduma nga opisina ti munisipio a mapan mangaldaw ket adda latta mabati a mangasikaso kadagiti kalugaranda nga adda kasapulanda iti munisipio.

Kinuna ti mayor a napaliiwna nga agdudupudop dagiti tattao a mapan iti munisipio a makitransaksion bayat ti lunch break isu a napanunotna ti nasao a polisia.

Aktibo dagiti senior citizens ditoy nga ili. Iti kalkalpas a panagpiesta ti Cabugao, nakiparada dagiti senior citizens iti Social Services Day, ken nakipartisiparda pay iti Search for Lolo and Lola.#