Footer

Nominasion para mapadayawan kadagiti mannurat, agpatingga iti Hulio 31:TMI Global

Ipakaammo ti Timpuyog dagiti Mannurat nga Ilokano (TMI) Global, babaen ken ni TMI Global President T. Gabriel Tugade, nga agpatingga iti Hulio 31, 2008 ti panagidatag iti nominasion para kadagiti sumaganad a pammadayaw: Ilokano Writers Lifetime Achievement Award, Posthumous Award for Ilokano Writers, ken Ilokano Writers Hall of Fame Award.

 

Dagiti pagannurotan: 

1. Mabalin ti uray asino man a mannurat nga Ilokano ti manginominar iti pilina a mannurat nga Ilokano para kadagiti pammadayaw babaen ti surat a pakailanadan dagiti rason para iti nominasion. Maipatulod ti nominasion agraman dagiti kasapulan a dokumento babaen ti email address a nailanad iti baba wenno maibuson iti sabali pay a mailing address a maipablaakto, tapno mapasingkedan ti nominasion ken/wenno kualipikasion ti nominee.

2. Mabalin nga inominar ti mannurat nga adda darana nga Ilokano nga agsursurat iti uray ania man a lengguahe no la ketdi mainaig dagitoy a sinurat iti literatura. Kasta met a mabalin nga inominar ti mannurat a saan nga Ilokano ngem agsursurat iti Iloko. Nasken a mailukon iti nominasion ti paulo dagiti sinurat ti maseknan a nominee ken ti nakaipablaakan dagitoy, kasta met ti naitulongna iti pannakatubay dagiti agdadamo a mannurat nga Ilokano ken dagiti dadduma a naaramidan daytoy a nangparangpaya wenno nakatulong iti idudur-as ti Literatura Iloko.

3. Nasken nga agtawen iti 50 wenno nasursurok pay ti nominee.

4. Saan a mapagduaduaan a ti nominee ket addaan prinsipio ken mangidaldalan a moralidad/etika.

5. Pinal ti pangngeddeng ti Komite nga agpili. Maipablaakto ti nagan dagiti mapadayawan iti Tawid News Magasin ken dadduma pay a pagiwarnak ken maiposte iti internet. Kasta met a mapakaammuanto dagiti mapadayawan babaen ti surat wenno email.

6. Maikkan iti sertipiko a pammadayaw dagiti mapili iti Nasional a Panagtitimpuyog ti TMIF-Global inton Oktubre 2008.

7. Ti Komite ti mangngeddeng no asinonto kadagiti mainominar a mannurat ti mairaman iti Ilokano Writers Hall of Fame.

8.Ipatulod ti nominasion kadagiti sumaganad nga e-mail address: [email protected], [email protected], [email protected], [email protected], ken [email protected], wenno iti uray ania kadagiti sumaganad nga adres: Aida C. Tiama, Archaeological Studies Program, Palma Hall Basement, University of the Philippines,  Diliman, Quezon City 1101; Hermilinda T. Lingbaoan-Bulong, University of the Philippines Press, E. de los Santos St., UP Campus, Diliman, Quezon City 1100; Jaime M. Agpalo, Jr., 125 Engineer's Hill, 2600 Baguio City; Roy V. Aragon,  Block 34, Lot 5, Wonderland Homes Subdivision, Santa Teresa, Iguig, Cagayan 3504; ken Jaime G. Raras, University of Northern Philippines Candon Campus; Candon City, Ilocos Sur 2710. (Roy Aragon)