Non-performing a polis, maiyalis, ballaag ni Chavit

VIGAN CITY – Imballaag ni Gov. Luis “Chavit” Singson a paiyalisna dagiti hepe ken dagiti polis no saan a nasayaat ti panagtrabahoda iti sanguanan dagiti nagsasaruno nga insidente ti pammapatay iti probinsia.

“Manipud tatta, diak kayat ti makangeg iti matay, uray ania a klase, drug pusher man wenno drug addict, nga awan ti makaammo,” kinuna ti gobernador idinto nga innayonna a  masapul nga agtrabaho amin a kapolisan para iti pannakatagiben ti linak ken talna iti probinsia agsipud ta dina kayat “dagiti kastoy a mapaspasamak iti probinsiatayo.”

Kinuna ti gobernador nga iti kallabes, gapu iti kaadu ti trabahona, impabus-oyna lattan iti provincial commander ken hepe dagiti polis ti pannakatagiben iti urnos ken talna idinto nga impakaammona nga isu itan ti agtake-over a mangkita iti peace and order ken mangmonitor iti maar-aramid iti probinsia.

“Provincial commander man wenno chief of police, maiyalisda no saanda nga ag-perform,” kinuna ni Singson.

Dinawat ni Singson ti itutulong dagiti umili iti pannakatagiben ti urnos ken talna idinto nga impaganetgetna a “maapektaran amin a trabahotayo no saan nga agsimpa daytoy a maar-aramid.”

Imbilin ti gobernador iti kapolisan ti police visibility nangruna kadagiti lugar a matatao tapno makita ida ti sapasap, saan ketdi a sada laeng agparang no tiempo ti sueldo.

Innayon ti gobernador nga imbilinnan ti panangidatag dagiti hepe ti polis iti linawas a report kenkuana tapno mamonitorna dagiti maar-aramid iti probinsia.

“Uray no inaldaw nga agsukattayo iti provincial commander, sukatantayo ida no saanda nga ag-perform,” imballaag ni Singson.

Imbilin pay ni Singson ti pannakaiparit ti agaramat iti helmet ken maistriktaran ti panagpataray dagiti motorista a sumrek iti siudad.

Kinuna ti gobernador nga imbilinnan ken ni Partible a  mabantayan  amin nga exit iti siudad.#