Footer

Northcap Review Centers, sinuspende ti CHED

BAGUO CITY – Tallo a bulan ti suspension nga impakat ti Commission on High Education (CHED) iti maysa a review center a naipasdek ditoy ken dagiti sangana iti intero a pagilian.

Kinuna ni CHED Chairman Emmanuel Angeles a sinuspendeda ti Northcap Review Centers iti intero a pagilian kalpasan a napaneknekan ti mapapati a panagkolektada iti processing fee iti aplikasion dagiti narses para iti panageksamenda iti Professional Regulation Commission ngem mapapati nga imbulsa ti nagkolekta nga administrator ti nasao a review center.

Naireklamo ti Northcap Review Center a nakabase ditoy a siudad gapu iti mapapati a panagsingir daytoy iti processing fee idi Hunio kadagiti estudiante a nurse para iti aplikasionda nga ageksamen iti PRC ngem naduktalan dagiti estudiante a saan a nairaman ti naganda iti listaan dagiti nageksamen iti June 20 Nursing Board Exam.

Mapapati a maysa a Vivian Lazaro, administrator ti nasao a review center, ti nagkolekta iti bayad manipud kadagiti estudiante.

Kinuna ti CHED nga iti insayangkatna a panagimbestiga, napudasdasan nga adda kinapudno dagiti reklamo dagiti estudiante nga adda kuarta a nakolekta kadakuada kas processing fee ti aplikasionda nga ageksamen ngem saanda a nairaman iti listaan dagiti nageksamen.

Kinuna ti CHEd a saan laeng a ti review center ti Northcap ditoy siudad ti nasuspende no di pay amin dagiti review centers daytoy iti nadumaduma a paset ti pagilian.#