Banner News: Northern Luzon addaanen iti 41 a kaso ti COVID-19 — Tawid News Magazine - Weekly Ilocos News 📰

Northern Luzon addaanen iti 41 a kaso ti COVID-19

BAGUIO CITY — Dumanunen iti 41 dagiti nagpositibo iti Coronavirus disease 2019 (COVID-19) iti Northern Luzon. Maibasar daytoy kadagiti inruar a pakdaar ti Department of Health (DOH) ken dagiti lokal a gobierno iti tallo a rehion iti Northern Luzon.

Addaan kadagiti positibo a kaso ti COVID-19 dagiti probinsia ti La Union (2), Ilocos Sur (1) ken Pangasinan (12) iti Region 1; Isabela (4), Nueva Vizcaya (2) ken Cagayan (6) iti Region 2, ken Abra (2), Benguet (2) ken Baguio (10) iti Cordillera Administrative Region.

Maipalagip nga ti umuna a kaso ti COVID-19 iti intero a Northern Luzon ket ti 35-anios a seaman a taga-Manabo, Abra. Kinumpirma daytoy ni Abra Governor Joy Bernos idi Marso 14.

Ti umuna a kaso iti Baguio City ket maysa a 61-anios a babai a naggapu iti Italia. Kinumpirma daytoy ti DOH-CAR iti maysa a press conference idi Marso 23.

Dagiti kabaruan a kaso ti COVID-19 iti Cordillera ket ti 48-anios a lalaki iti Abra; tallo a babbai ken uppat a lallaki iti Baguio, uppat kaniada ket senior citizens; ken ti dua a babbai iti Benguet nga agtawen ti 34 ken 6.

Kabayatanna, nangiparuar met iti pablaak iti Facebook ti umuna a kaso ti local transmission iti Baguio a ni Joel Junsay, 52-anios, residente ti New Lucban, ken kameng ti City Heath Office. Awanan isuna iti travel history iti ruar ti siudad, ngem nakarikna ti sintomas idi Marso 12. Malaksid iti pablaakna, nagpirma pay ni Junsay iti pammalubos a maiwaragawag iti publiko ti detalye ti kasasaadna para iti napaspaspas a contact tracing.

Kalpasan ti pannakakumpirma iti pasiente ti COVID-19 iti Abra, simmaruno ti pasiente manipud iti Bayambang, Pangasinan a natay bayat iti pannakaospitalna idiay Lung Center of the Philippines idi Marso 20.

Iti simmaruno nga aldaw, nangiruar met ti pablaak da Caba Mayor Philip Crispino ken ti asawana a ni Councilor Donna Crispino a nagpositiboda iti sakit. Dagiti dua nga opisial ti umuna a kaso ti COVID-19 iti probinsia ti La Union.

Segun iti pablaak ti DOH-Ilocos Center for Health and Development idi rabii ti Marso 28, adda ti tallo a kabarbaro a kaso ti COVID-19 iti Rehion. Dua kadagitoy ket adda iti probinsia ti Pangasinan, sa ti maysa ket adda iti Tagudin, Ilocos Sur, ti umuna a kaso ti COVID-19 iti dayta a probinsia.

Iti Rehion 2, impalgak ni OIC Director Dr. Leticia Cabrera ti DOH-CHD Cagayan Valley nga adda ti innem a nainayon a kaso ti COVID-19 idi Marso 27. Tallo iti innem a pasiente ket agkakabagian manipud iti Alicia, Isabela. Dagiti agkakabagian ket pakairamanan dagiti aggasawa: 27-anios a lalaki ken ti 25-anios a masikog nga asawana, ken maysa a 52-anios a babai.

Adda met iti Tuguegarao ti tallo pay a baro a kaso ti COVID-19. Dua kadagitoy, ni PH839 ken PH841, ket agpada a nars ti Cagayan Valley Medical Center a naakaran manipud kenni PH275, ti umuna a pasiente a nagpositibo iti nasao a sakit iti CagayanValley. Ti maikatlo a pasiente, ni PH893 ket maysa a 73-anios a babai.

Ti kaudian a kaso iti Rehion 2 segun iti pablaak ni Dr. Napoleon Obana, hepe ti Region 2 Trauma and Medical Center, idi malem ti Marso 28 ket maysa a lalaki a nars a taga-Bayombong, Nueva Vizcaya. Mapapati a naakaran ti nasao a nars gapu iti panangasikasona kenni pasiente PH774, ti umuna a kaso iti dayta a probinsia.

Nair-irut nga addang

Kabayatan iti agtultuloy a panagngato ti bilang dagiti agsakit iti COVID-19, nangrugin a mangimplementar dagiti lokal a gobierno iti nair-irut pay nga addang tapno maliklikan ti panagwaras ti sakit.

Nangrugi idi Marso 28, inmandar ni Mayor Benjamin Magalong a saanen a mapalubusan dagiti biahero a sumrek iti siudad ti Baguio. Dagiti laengen addaan napateg a panggep ken trabaho, kasta met dagiti agkasapulan kadagiti nasisita a banag ti mapalubusan kadagiti checkpoint.

Kasta pay a kiniddaw ti mayor a mapalubusan koma a mairuar ti nagan dagiti positibo iti sakit adda laket pammalubosda. Panggep ti nasao nga addang a mapaspasan ti pannakaisayangkat ti contract tracing. Kuna ti mayor a paset daytoy ti pananglapped iti panagwaras iti sakit.

Kadagiti naglabas nga aldaw, nangiyetnag pay iti direktiba ni Magalong a nangpairteng iti Enhanced Community Quarantine (ECQ) kadagiti lugar nga addaan kadagiti kaso ti COVID-19. Karaman kadagitoy dagiti komunidad ti Loakan, Kias, Fort Del Pilar ken Atok. Inyetnag pay ti Mayor ti total lockdown iti Barangay Pinget gapu iti nalukay a panangipatungpal dagiti opisial kadagiti paggannurutan ti ECQ.

Iti Nagulian ken Bauang, La Union, mapalubusan laeng dagiti lugan a lumabas iti munisipio ngem maiparit nga agsardeng wenno bumaba dagiti pasahero. Dagiti laeng addaan nalawag a panggep, empleado iti gobierno ken frontline service providers ti mapalubusan a sumrek ken bumaba iti uneg ti ili.

Iti met Pangasinan, inyulog ni Governor Amado Espino III ti Executive Order 15-2020-B a mangikabkabil iti intero a probinsia iti “extreme ECQ.” Pinirmaan ti gobernador ti direktiba idi Marso 25 kalpasan iti pannakakumpirma ti nayon a kaso ti COVID-19 iti probinsia. Babaen iti nasao nga EO, naikabil dagiti munisipio ti Rosales, Malasiqui ken Bayambang iti total lockdown.

Iti Cagayan Valley, naimplementar metten dagiti maseknan a lokal a gobierno ti protocol para kadagiti barangay nga addaan nagpositibo iti COVID-19. Segun iti DOH-CHD Cagayan Valley, prioridadda tatta ti contact tracing dagiti nakaluganan ni PH275 ken PH840.

Segun iti direktiba ti DOH ken DILG, dagus a maipatungpal ti extreme ECQ iti ania man a lugar nga addaan positibo a kaso ti COVID-19. Iti ECQ, malappedan ti panagruar dagiti residente iti babbalay ken iti barangayda. Responsibilidad met ti lokal a gobierno ti panangisigurado dagiti kangrunaan a kasapulan dagiti agnaed kadagiti lugar a mapatawan iti ECQ.