Footer

NPA kumapkapsuten : Phil. Army

NARVACAN, Ilocos Sur – Kumapkapsuten ti puersa ti New Peoples’ Army gapu ta maatiwdan iti nainget a kampania ti militar.

Daytoy ti impalgak ni Col. Loreto Rirao, agdama a commanding officer ti 503rd Infantry Brigade ti Philippine Army bayat ti naisayangkat nga Internal Security Operation (ISO) Assessment a naisayangkat iti barangay Sulvec, ditoy nga ili itay nabiit.

Segun iti nasao nga opisial,manipud idi bulan ti Enero, nakasakup ti 503rd Infantry Brigade iti innem a kampo ti NPA.  Kaudian ti pannakaduktal iti maysa a kampo dagiti rebelde a komunista idiay sitio Caset, barangay Maradodon, Cabugao, Ilocos Sur.

 Kinuna ni Rirao a  kangrunaan kadagiti amin a nagapuananda ti panangrubbuotda iti kangrunaan a kampo ti Abra Provincial Party Committee a masarakan iti Barangay Pacoc-Talampak, Lacub, Abra idi Abril 2 daytoy a tawen babaen ti 41st Infantry Batallion a nakabase iti Lagangilang, Abra.

Innayon ni Rirao a napakapsutan ti puersa ti NPA iti pannakatiliw ti 19 kameng ti NPA ken ti pannakakumpiskada iti 10 a high powered firearm.

“Ti di agsarday a gagem ti Army a mang-neutralize ken mangisayangkat iti counter terrorist attacks ket nagtungpal iti panakasakup ti kampo dagiti NPA ken pannakaala kadagiti nadumaduma a paltog  ken war equipment, propaganda materials, personal belongings ken dagiti subersibo a dokumento,”  kinuna ni Rirao.

Kinuna pay ni Rirao a di kabaelan dagiti NPA ti napagkaysa a puersa ti AFP ken PNP ket no agtultuloyda latta a lumaban iti gobierno, umadanin  ti pannakapaksiatda.#