NSCC, CIS-Bayad Center, nagpinnirma iti kontrata

CAOAYAN, Ilocos Sur – Mabalinen dagiti kamkameng ti agbayad kadagiti billsda kadagiti nadumaduma nga ahensia iti Nueva Segovia Consortium of Cooperatives kas paset iti kontrata daytoy kooperatiba iti CIS-Bayad Center, Inc., daytoy ti impakaammo ni NSCC General Manager Divina Quemi itay nabiit.

Kinuna ni Quemi nga adu a miembro ti kooperatiba ti agproblema iti panagbayadda iti billsda kadagiti nadumaduma nga ahensia, kas iti SSS, GSIS, PhilHealth, Globe, Smart ken dadduma pay ket babaen ti kontrata a nagpinnirmaanda iti CIS-Bayad Center, Inc., mabalin dagitoyen ti agbayad iti billsda iti NSCC.

Naglukat ti opisina ti CIS-Bayad Center, Inc. itay nabiit.

Kinuna ni Quemi nga iti panangiyasideg ti NSCC kadagiti consumers ti serbisio iti panagbayadan iti bills, mapalag-anan dagiti miembro ta saandan a makipila pay kadagiti opisina a pagbayadanda kadagiti bills.

Innayon ni Quemi nga uray dagiti saan a kameng ti kooperatiba ket mabalinda ti mapan agbayad iti billsda kadagiti nadumaduma a sanga ti NSCC.

Kinuna ni Quemi nga ad-adalenda no kasano a mairaman dagiti bills iti koriente a mabayadan iti NSCC.#