Numero 1 iti listaan ti Ilocos Region a drug pusher, natiliw iti buy bust operation

SAN FERNANDO CITY – Nanabtuog iti ima dagiti pannakabagi ti linteg ti numero uno iti listaanna nga aglaklako iti droga iti Ilocos Region bayat ti naisayangkat a buy-bust operation idi Enero 24.

Iti waragawag manipud iti Philippine Drug Enforcement Agency (PDEA), inaresto dagiti operatiba ti nasao nga ahensia ti di nainaganan a suspek, 25, taga-Barangay Lioac Norte, Naguilian, La Union kalpasan ti naballigi a buy-bust operation nga insayangkatda iti Barangay Lioac no sadino a linakuan ti suspek ti nagpammarang a buyer a maysa nga ahente ti PDEA iti uppat a sachet a naglaon iti mapapati a shabu.

Kinumpiska dagiti operatiba dagiti nadumaduma a drug paraphernalia iti ikut ti suspek agraman ti dua a sag-P500 a namarkaan a kuarta nga inaramatda iti buy-bust operation.

Segun ken ni Undersecretary ken PDEA Director General Arturo G. Cacdac, Jr., nabayagen a minonmonitorda ti suspek gapu kadagiti pannakainbolbarna iti panagraira ti shabu iti ili ti Naguilian ken Bauang, La Union idinto nga imbilinna kadagiti amin nga operating units ti PDEA ti panangkamatda kadagiti sindikato ti droga ken personalidad a naikabil iti listaan, pannakawara dagiti mailemlemmeng a laboratorio ken pagibodegaan kadagiti kemikal, ken pannakakumpiska kadagiti dakkel a bulto dagiti napeggad a droga ken kemikal.

Kanaig daytoy, kinuna ni PDEA Region 1 PIO Chief Bismarck Bengwayan nga ipakatda ti naing-inget a pannakaimplementar ti linteg maikontra iti droga babaen ti ad-adda a nakaykaysa ken organisado a sistema ti pannakirupak iti illegal a droga iti sapasap a pagilian.

Kinuna pay Bengwayan a kas panagtungpalda iti pammilin ni Cacdac agisayangkatda iti nasayaat ti pannakaplanonaĀ  ken dokumentado nga operasion a maiyalubog kadagiti probiso ti anti-drug law tapno maseguro nga awan ti abutna dagiti kaso a maipila maikontra kadagiti naglabsing nga agtungpal iti pannakaibalud ken pannakakonbiktarda.

Kabayatanna, dua pay a masuspetsa a drug pusher ti natnag iti ima dagiti ahente ti PDEA RO1 Pangasinan Sector Special Enforcement Team bayat ti panagilakoda iti uppat a sachet ti shabu iti maysa a nagpammarang a gumatang sadiay Palaris Street, Poblacion, San Carlos City, Pangasinan idi Enero 22.

Nasaklangan dagiti tallo a suspek iti panaglabsing iti Section 5, (Sale of Dangerous Drugs) Article II of Republic Act 9165 wenno ti ā€œComprehensive Dangerous Drugs Act of 2002.

Nasaklangan pay ti numero 1 iti listaan ti PDEA Region I a drug pusheriti panaglabsing iti Section 12 (panagikut iti drug paraphernalia) ti nasao a linteg. (Karaman ti report manipud iti PDEA-R1)

Ā