NUTRITION CORNER: Husto a nutrision, kasapulan iti sports

Importante ti husto a nutrision babaen ti pannangan a nasayaat no aktibotayo iti sports. Kasapulan a limitaran ti mangan kadagiti addaan ti saturated fats, transfats, sodium ken asukar.  Kasapulan pay a nayonan ti kanen tapno masungbatan dagiti pagkasapulan ti ad-adu nga enerhia iti sports.  Saan laeng a ti pannanagan iti carbs wenno carbohydrate foods wenno panaginum ti sports drinks.

Saan a kasapulan ti special a makan wenno supplements tapno magaw-at ti peak performance level iti sports.  Masapul laeng ti umno a taraon iti umno a kaadu nga inayon iti fitness plan.

Dagiti teen athletes ket addaanda iti sabali a kasapulan iti nutrision. Gapu ta ad-adu ti panagpaling-etda ngem dagiti saan unay nga aktibo nga agtutubo, kasapulanda unay ti extra calories.  Daytoy ket para iti panagdakkelda ken iti sports performanceda.  Kasapulanda ti 2,000 inggana’t 5,000 calories kada aldaw tapno masungbatan ti masapulda nga enerhia depende no kasano ti kaaktiboda.

No saan unay a makaanay ti kanenda, madadaael dagiti maselda ken saanda a magun-od ti peak performanceda.  No bassit ti ipaunegda a calories iti kada aldaw, saanda unay a napartak ken napigsa. Saanda pay a mamantener ti kinadag-senda. Saanda pay a dumakkel a nasayaat ken maadaanda iti problema ti salun-at.#