NUTRITION CORNER: Husto a nutrision, napateg iti sports

Importante ti husto a nutrision babaen ti pannangan a nasayaat no aktibotayo iti sports. Nupay kasapulan a limitaran ti mangan kadagiti addaan ti saturated fats, transfats, sodium ken asukar.  Kasapulan met a nayonan ti kanen tapno masungbatan dagiti pagkasapulan ti ad-adu nga enerhia iti sports.  Saan laeng a ti pannangan iti carbs wenno carbohydrate foods wenno panaginum iti sports drinks.

Saan a kasapulan ti special a makan wenno supplements tapno magaw-at ti peak performance level iti sports.  Masapul laeng ti umno a makan iti umno a kaadu nga inayon iti fitness plan.

Dagiti teen athletes ket addaanda iti sabali a kasapulan iti nutrision. Gapu ta ad-adu ti panag-workoutda ngem dagiti saan unay nga aktibo nga agtutubo, kasapulanda unay ti extra calories.    Kasapulanda ti 2,000 inggana’t 5,000 calories kada aldaw tapno masungbatan ti masapulda nga enerhia depende no kasano kaaktiboda.

No saan a makaanay ti kanenda, madadaael dagiti maselda ken saanda a magun-od ti peak performanceda.  No bassit ti ipaunegda a calories ti kada aldaw, saanda unay a napartak ken napigsa. Saanda pay a mamantener ti kinadagsenda. Saanda pay a dumakkel a nasayaat ken maaddaanda iti problema ti salun-at. (Imelda Castro-Rivero/PIA Vigan)