NUTRITION CORNER: Masursuruan dagiti ubbing mangan kadagiti prutas ken natnateng

Adu dagiti mayat nga agbaliw ti estilo ti panagbiagda ket adaywandan dagiti saan a nasalun-at a makmakan.  Ngem ti problema, nagrigatda a kanen dagiti prutas ken nateng.

Insingasing dagiti nutritionists a kasapulan laeng nga uminum iti juice tapno naim-imas. Mangpespes iti kalamansi wenno oranges. Napimpintas pay no gumatangtayo iti juicing machine tapno maikabil amin a pulp wenno parte ti prutas tapno maipaunegtayo amin a partena a makantayo. Kas ti saba, no ditay kayat a kanen, ukisantayo, ipisok iti blender, ikkan iti gatas wenno tsokolate ket naimasen. Ket no kayattayo tay nasam-it, ikkantayo iti honey wenno diro. No saan, ikkantayo iti brown sugar wenno tagapulot.

Mabalin pay a mangiparabawtayo iti cheese, cream wenno chopped nuts iti rabaw ti nablender a prutas.  Wenno parabawan iti ice cream, condensed milk, cream wenno shredded chocolates ti mismo a prutas  a naukisan.  Iti kastoy, napimpintas ti kitana ken adda variety ti makan aglalo no para kadagiti ubbing.  Dagitay met nateng, no ditay kayat ti dinengdeng, mabalin nga intay mangituno kadagiti kamote slices. Wenno laokan iti adu a nateng dagiti lutuen nga ikan ken karne. Kas koma ti Hawaiian adobo nga adda piniana ken adu a kita a nateng.

No kastoy ti pamay-am, uray pay dagiti ubbing ket makasursuroda ti mangan kadagiti nateng ken prutas.  Saanton a problema ti panagtalinaed a napigsa ti immune systemda ket malabananda dagiti stress iti biagda.  Saan payen a problema ti kinalukmeg, diabetes ken dadduma pay a sakit.#