Footer

NUTRITION CORNER: Tumulong ti kamatis a manglapped iti kanser

Saan la a nasayaat a pagpaimas iti dinengdeng wenno dadduma pay a luto ti kamatis no di pay napateg iti salun-at agsipud ta nabaknang iti potasio, Vitamin A, Vitamin C ken lycopene nga agtrabaho a kas antioxidant a mangsalaknib kadagiti selula ti bagitayo.

Ammoyo kadi nga iti maysa a panagadal nga insayangkat ti Harvard, naduktalan a basbassit ti risgo nga agsakit iti prostrate cancer dagiti lallaki a nalaing a mangan iti kamatis? Kasta met a naduktalan iti sabali a panagadal a makatulong ti kamatis a mangprotektar kadatayo iti stomach ken lung cancer?  Itudo dagiti nagadal a ti lycopene a masarakan iti kamatis ti makagapu iti daytoy.

Saan la a dayta, naduktalan pay a babaen ti lycopene, dakdakkel ti gundaway a ditayo agsagaba iti sakit ti puso. Pabassiten ti lycopene ti inflammation ken pabassitenna ti LDL cholesterol ket nasalsalun-at ti pusotayo.

Kasapulan ngarud nga adda latta kamatis iti lamisaantayo tapno nasalsalun-at ti bagi ken pusotayo.#